မြေကြီးကရွှေသီးနိုင်ပါတော့မလား

မင်းအဂ္ဂ

အာကာ၀ဠာတခွင် မှိုင်းညို့ညို့ဆင်လျက်မိုးသားတိမ်လိပ်တွေ တရွေ့ရွေ့ နှင်လာကြပြီ။ မုတ်သုံလေ နှင့်အတူမိုးစမိုးပေါက်တွေကလည်း တဖြောက်ဖြောက်ကြွေကျလာကြပြီ။ မုတ်သုတ်လေအား ကောင်းရာမှမိုးရွာ သွန်းမှုကလည်း ကောင်းလာချေပြီ။ ကျေးလက်တောရွာတွေမှာဆိုဖားကလေးတွေ ဟိုတစ်စု၊ သည်တစ်စု အော်မြည်သံတွေကလည်း မိုး၏ရသကိုပေးစွမ်းလျက်ရှိသည်။ ရာသီဥတု ဖောက်ပြန် ပြောင်းလဲလာမှုကြောင့်မခံမရပ်နိုင်အောင်ပူပြင်းခြောက်သွေ့နေခဲ့ပြီးမှ ဇွန်လ နောက်ဆုံးပတ်တွင် ရခိုင်၌ မိုး၏ရနံ့ကိုစတင်ခံစားလာ ၇ခြင်းဖြစ်သည်။

သည်လို မိုးသံကြားသည်နှင့်မြေပုံမြို့နယ်၊ လွန်းလုံးပိုက်ကျေးရွာမှ လယ်သမားကြီး ဦးထွန်းထွန်းဝင်းတစ်ယောက် အခြား လယ်သမားများနည်းတူ လယ်တောထဲသို့ဆင်းရချေပြီ။ တကယ်တော့လယ်တောထဲသို့ ဆင်း၇မည့်အချိန်က ပုံမှန်ထက်ပင် နောက်တောင်ကျနေပြီ။ရခိုင်ဓလေ့အ၇ လယ်သမားများသည် သင်္ကြန်ပြီး နောက် ၄၅ ရက်ကြာလျှင်လယ်တောသို့ဝင်ကြ၇သည်တဲ့။ သို့သော် ရခိုင်က တောင်သူများအဖို့၇ခိုင်ပြည်ကြီး ကို အင်ငြိုးတကြီးဖြင့် မွှေနှောက်တိုက်ခတ် ဖျက်ဆီးသွားခဲ့သည့် အလွန့်အလွန်အားကောင်းသော မိုခါဆိုင်ကလုန်းမုန်တိုင်းကြောင့်ပျက်စီးသွားခဲ့သည့် အိုးအိမ်အဆောက်အအုံများကို အရင်ဆုံး ပြန်လည်ပြုပြင်တည်ဆောက် နေခဲ့၇သည်။ ပြန်လည်ထူထောင်ရေးလုပ်၍ပင် မပြီးနိုင်သေး။ မုတ်သုန်မိုးကဝင်ရောက်လာပြီမို့ လယ်သမားများမှာ လယ်တောထဲသို့ ဆင်းကြ၇တော့သည်။

မိုခါမုန်တိုင်းကြောင့် ဦးထွန်းထွန်းဝင်းတို့လို၇ခိုင်က လယ်သမားတွေအဖို့ သည်နှစ်က ပြီးခဲ့သည့် နှစ်တွေထက်ပိုကျပ်တည်းသည့်နှစ်ပင်။ စိန်ခေါ်မှုတွေလည်း တော်တော်များနေ၇သည့်နှစ်။ ပြီးလျှင် ကိုယ့်ကို ကိုယ်လည်း မေးခွန်းထုတ်နေရသည့်နှစ်။ သည်နှစ် လယ်ဘယ်လို လုပ်၇ပါ့ ???

လယ်မြေထဲဆားငန်ရေဝင်ရောက်ပျက်စီးမှု

ပြီးခဲ့သည့် မေလ ၁၄ရက်က ရခိုင်သို့ဝင်ရောက်တိုက်ခတ်သွားခဲ့သည့် မိုခါမုန်တိုင်းကြောင့်စစ်တွေ၊ ပုဏ္ဏားကျွန်း၊ ၇သေ့တောင်၊ ကျောက်တော်၊ မြောက်ဦး၊ ပေါက်တော၊မြေပုံနှင့် ကျောက်ဖြူစသည့် မြို့နယ်တွေ က လယ်သမားတွေမှာကြီးကြီးမားမား ပျက်စီးဆုံးရှုံးသွားခဲ့၇သည်။ ပင်လယ်ကမ်းရိုးတန်း နားကမြို့နယ်တွေ မှာဆို ဆည်မြောင်းတာတမံတွေကျိုးပေါက်ပြီးလယ်မြေတွေဆားငန်ရေ ဝင်ရောက်ကာ ပျက်စီးသွားခဲ့သည်။

ဦးထွန်းထွန်းဝင်းတို့မြေပုံမြို့နယ်မှ ငမန်းရဲကျွန်းတာတွင်ဆိုလျှင်လည်း လယ်ဧကအမြောက်အများဆားငန်ရေဝင်ရောက်ကာ ပျက်စီးသွားခဲ့သည်။ ယင်းအထဲ သူ့တွင်လည်း လယ်ဧက ၄၀ခန့် ဆားငန်ရေ ဝင်ရောက်ပျက်စီးသွားခဲ့သည်ဟု ပြောသည်။

“စပါးစိုက်ပျိုးနိုင်တဲ့ဧကတွေကိုအကုန်လုံး ဆားငန်ရေဝင်သွားတာ”ဟုဦးထွန်းထွန်းဝင်းကပြောသည်။

ဆားငန်ရေဝင်ရောက်သွားသည့်လယ်မြေတွေကတော့ များသောအားဖြင့်ဆားပျော်ဝင်မှုတွေကြောင့် ပုံမှန်လယ်မြေတွေလို စပါးဖြစ်ထွန်းမှုမကောင်းနိုင်တော့ပေ။ သို့သော် ဦးထွန်းထွန်းဝင်းကတော့ သူ၏ ပျက်စီး သွားသည့်လယ်မြေများကိုပါ ထွန်ယက်ထားပြီး စိုက်ပျိုးကြည့်ဦးမည်ဟု ဆိုသည်။ အထွက်နှုန်းကောင်း၊မကောင်းကို စပါးပေါ်ချိန်မှ သိနိုင်တော့မည်ဟုလည်းစိတ်မကောင်းစွာဖြင့် ပြောသည်။

ဦးထွန်းထွန်းဝင်းတို့လိုဆားငန်ရေဝင်ရောက်၍ လယ်ဧကများပျက်စီးသွားသူများထဲတွင် ပေါက်တောမြို့နယ်၊ရွာချောင်းကြီးကျေးရွာမှ လယ်သမား ဦးမောင်သန်းတင်လည်း တစ်ဦးအပါအဝင် ဖြစ်သည်။

သူသည် ရွာချောင်းကြီးတာတမံတွင် စိုက်ပျိုးလုပ်ကိုင်သူဖြစ်သည်။ မိုခါမုန်တိုင်းကြောင့်ရွာချောင်းကြီး တာတမံ ကျိုးပေါက်သွားခဲ့ရာ သူ၏ လယ် ၂၁ ဧကလည်းပါဝင်သွားခဲ့သည်။

စစ်ကောင်စီကမူမိုခါမုန်တိုင်းကြောင့် ရခိုင်ပြည်နယ်အတွင်း ဆည်မြောင်းနှင့်ရေအသုံးချမှု စီမံခန့်ခွဲရေး ဦးစီးဌာနကထိန်းသိမ်းထားသော ရေငန်တားတာ၃၂ ခုအနက် တာ (၈)ခုသာ ရေကျော် တိုက်စားခြင်းကြောင့်ကျိုးပေါက်ပျက်စီးသွားခဲ့သည်ဟု ထုတ်ပြန်ထားသည်။

ယင်းတာတွေကတော့ ပေ ၁သောင်းခန့်ပျက်စီးသွားသည့် မောင်တောမြို့နယ်မှ ခြံပြင်တာ၊ ပေ ၆ထောင်ခန့်ပျက်စီးသွားသည့် မြောက်ဦးမြို့နယ်မှကုလားပုန်းကျွန်းပတ်တာ၊ ပေ ၁၆၅၀၀ ခန့် ပျက်စီးသွားသည့် မြေပုံမြို့နယ်မှ ငမန်းရဲကျွန်းတာအပိုင်း(၁)၊ ပေ ၆ ထောင်ခန့်ပျက်စီးသွားသည့် ငမန်းရဲကျွန်းတာ အပိုင်း(၂)၊ ပေ ၄၉၀၀ ကျော်ပျက်စီးသွားခဲ့သည့်၇သေ့တောင်မြို့နယ်မှ ကျီးကျွန်းတာ၊ ပေ ၄၃၀၀ ကျော်ပျက်စီးသွားခဲ့သည့် ပုဏ္ဏားကျွန်းမြို့နယ်မှ မက္ကလာကျတာ၊ ပေ ၆၀၀ ကျော် ပျက်စီးသွားသည့်တန်ခိုးတာနှင့် ပေ ၁ ထောင် ကျော် ပျက်စီးသွားသည့် စစ်တွေမြို့နယ်မှဝါဘိုတာတို့ဖြစ်သည်ဟု ဆိုသည်။

မုန်တိုင်းကြောင့် ပျက်စီးသွားသည့်တာများတွင်အစိုး၇ပိုင်တာများသာမက ဒေသခံများစုဖွဲ့ပိုင်ဆိုင် သော ပုဂ္ဂလိကတာအများအပြားလည်း ပါဝင်ခဲ့သည်။ သို့သော် ဒေသခံလယ်သမားတွေကတော့ပျက်စီးသွား သည့် တာတွေထဲက အစိုး၇ပိုင်ဆည်တွေမှအပ ကျန်သည့်ပုဂ္ဂလိကတာတွေကို စစ်ကောင်စီက ပြန်လည် ဆည်ဖို့ပေးခြင်းမရှိခဲ့ဟု ပြောကြသည်။

ဦးမောင်သန်းတင်တွင်ဆိုလျှင်လည်း ကျိုးပေါက်သွားသည့်တာကိုစစ်ကောင်စီက ဆည်ဖို့ပေးခြင်းမရှိ၍ မိမိအစီအစဉ်ဖြင့် ဆည်ဖို့ခဲ့၇သည်ဟုပြောသည်။

“ကိုယ့်ဟာကိုယ်အကုန်အကျခံဆည်ဖို့ပြီး ကိုယ့်နည်းကိုယ့်ဟန်နဲ့ ကိုယ့်လယ်ကိုတော့ ထွန်နေပြီလေ” ဟုဦးမောင်သန်းတင်က ပြောသည်။

ထွန်ယက်ရန်ကျွဲနွားများ သောင်းနှင့်ချီ သေဆုံးသွား

သည်နှစ် လယ်သမားတွေအတွက်နောက်ထပ် စိတ်ရှုပ်နေရသည်မှာ လယ်ထွန်ယက်ရန် ကျွဲနွားများ ရှားပါးနေမှုပင်ဖြစ်သည်။မိုခါမုန်တိုင်းကြောင့် ကျွဲနွားကောင်ရေ သောင်းနှင့်ချီသေဆုံးသွားခဲ့ရာ ကျွဲနွားတွေဖြင့် ထွန်ယက်ကြ၇သည့် လယ်သမားတွေမှာသည်နှစ်တော့ ထွန်စက်တွေကိုသာ အားကိုး၇တော့သည်။

စက်သုံးဆီဈေးနှုန်းတွေ တစ်နှစ်ထက်တစ်နှစ်မြင့်တက်လာ၍ ထွန်စက်ဖြင့် ထွန်ယက်ခတွေကလည်း မြင့်တက်လို့နေသည်။ဥပမာ ယခင်နှစ်က လယ်တစ်ဧကို ထွန်ယက်ရန် ကျပ် ၃ သိန်းပေး၇ပါကသည်နှစ်တွင် ကျပ် ၃ သိန်းခွဲ၊ ၄ သိန်းအထိ မြင့်တက်နေသည်ဟု လယ်သမားတွေက ပြောသည်။သည်ဈေးနှုန်းက တစ်မြို့ နယ်နှင့် တစ်မြို့နယ် ပုံသေမရှိဘဲကွာခြားမှုရှိသည်။

အဲသည်လိုထွန်ယက်ခဈေးကြီးသော်လည်း လယ်သမားတွေအဖို့ရှိစုမဲ့စုပိုက်ဆံတွေဖြင့် ထွန်ခိုင်း၇ တော့သည်။ အခြားလယ်များကိုထွန်ယက်နေချိန်နှင့်တိုးပါက မိမိတို့လယ်ထွန်ယက်မည့်အလှည့်ကျရောက်ရန်လည်း ရက်ကြာရှည်စွာ စောင့်ဆိုင်းနေရမှုများ ရှိနေသည်ဟု ဆိုကြသည်။

တစ်ဘက်တွင်လည်း အားလုံးကပ်ဘေးဆိုက်လို့ ဒုက္ခရောက်နေချိန် ခေါင်းပုံမဖြတ်ဘဲ အမျိုးသားရေး စိတ်ဓာတ်ဖြင့်ထွန်ယက်ခဈေးပိုမတောင်းသည့် ထွန်စက်ပိုင်ရှင်များလည်း ရှိနေပြန်သည်။

ရသေ့တောင်မြို့နယ်၊ဇီးကိုင်းကျေးရွာမှ လယ်သမား ဦးမောင်တင်ဝင်းကသူတို့ရွာဘက်တို့တွင်ဆိုလျှင် အားလုံး ဘေးဒုက္ခကျရောက်နေချိန်မို့ပုဂ္ဂလိကထွန်စက်ပိုင်ရှင်တွေက ထွန်ယက်ခကို ဈေးပိုမတောင်းရဲဘဲယခင်နှစ်ဈေးနှုန်းအတိုင်းသာ တောင်းယူကြသည်ဟုလည်း ပြောသည်။

“အခက်အခဲတွေနဲ့ကြုံနေ၇တဲ့အချိန်မှာ ထွန်တဲ့သူတွေလည်း အဲလို အရမ်းကြီး လည်း မတောင်းရဲဘူး။အဲလို သက်သာတဲ့နည်းနဲ့ မိသားစုပုံစံမျိုးပေါ့လေ။ အလွန်တရာလည်းတောင်းလို့လည်း အဆင်မပြေဘူး။ ဘာလို့လဲဆိုရင်ဒီလောက်အခက်အခဲဖြစ်နေချိန်မှာ တစ်ယောက်နဲ့တစ်ယောက် ဝိုင်းဝန်းကူညီပေးကြဖို့ပဲ အရေးကြီးတယ်လေ”ဟုသူ့ရွာဘက်ရှိ ထွန်စက်ထွန်ယက်မှုအခြေအနေကိုပြောပြသည်။

စစ်ကောင်စီဘက်ကတော့ မုန်တိုင်းသင့်ရခိုင်ဒေသတွင်လယ်ယာများ အချိန်မီထွန်ယက်ပေးနိုင်ရန် ထွန်စက်ပေါင်း ၈၃ စီးကိုစက်မှုလယ်ယာဦးစီးဌာနက ငှားရမ်းပေးလျက်ရှိသည်ဟု ထုတ်ပြန်ထားသည်။

ယင်းထွန်စက်တွေကတော့စစ်တွေမြို့နယ်မှာ ၃၅ စီး၊ ၇သေ့တောင်မြို့နယ်မှာ ၁၄ စီး၊ကျောက်တော် မြို့နယ်မှာ ၁၃ စီး၊ သံတွဲမြို့နယ်မှာ ခုနစ်စီး၊မြောက်ဦးနှင့် မင်းပြားမြို့နယ်တွေမှာ လေးစီးစီ၊ ကျောက်ဖြူ၊ အမ်းနှင့်မောင်တောမြို့နယ်တွေမှာ နှစ်စီးစီတို့ဖြစ်သည်ဟု ဆိုသည်။

ထွန်စက်ငှားရမ်းအသုံးပြုရာတွင်လယ်သမားတွေဘက်က စက်သုံးဆီတစ်ခုတည်းကိုသာ ကျခံရမည် ဖြစ်သည်။ငှားရမ်းလိုသည့်လယ်သမားတွေအနေဖြင့် ရပ်ကွက်၊ ကျေးရွာအုပ်ချုပ်ရေးမှူးများမှတဆင့်စာရင်း ပေးကာ စက်မှုလယ်ယာဌာနနှင့် ချိတ်ဆက်ငှားရမ်းနိုင်သည်ဟုလည်း ထုတ်ပြန်ထားသည်။

စိုက်ပျိုးစရိတ်ချေးငွေများလည်း မချေးနိုင်

၇ခိုင်က မုန်တိုင်းသင့်လယ်သမားတွေမှာသည်နှစ်အတွင်း မြန်မာ့လယ်ယာဖွံ့ဖြိုးရေးဘဏ်မှ စိုက်ပျိုးစရိတ်ချေးငွေများကိုလည်း ထပ်ယူရန် အခက်အခဲတွေရှိနေကြပြန်သည်။

၇ခိုင်တွင် ပြီးခဲ့သည့်၂၀၂၂ ခုနှစ်က သည်လို စပါးစိုက်ပျိုးရာသီတွင် ရက္ခိုင့်တပ်တော်(AA)နှင့်စစ်ကောင်စီတပ်တို့ တကျော့ပြန်တိုက်ပွဲများ အပြင်းအထန်ဖြစ်ပွားခဲ့သည်။ယခု မုန်တိုင်းသင့်ခဲ့သည့် ဒေသတွေ မှာ အပြင်းအထန်ဖြစ်ပွားခဲ့ကြခြင်းလည်းဖြစ်သည်။စစ်တွေမြို့မှာဆို အပြန်အလှန်တိုက်ပွဲမဖြစ်ပွားခဲ့သော်လည်းအရပ်သားပြည်သူများကို AA သံသယဖြင့်စစ်ကောင်စီက အဖမ်းအဆီးများ ကြမ်းခဲ့သည်။

သည်လိုတကျော့ပြန်တိုက်ပွဲပြင်းထန်ခဲ့မှုကြောင့် တိုက်ပွဲဖြစ်ပွားရာဒေသတွေကလယ်သမားအများစု သည် လယ်ယာလုပ်ငန်းကို ပုံမှန်ထွန်ယက်စိုက်ပျိုးနိုင်ခြင်းမရှိခဲ့ပေ။ အချို့လယ်သမားတွေကတော့စိုက်ပျိုး စရိတ်ချေးငွေတွေကိုချေးယူပြီး ခဲရာခဲဆစ်လုပ်ကိုင်ခဲ့၇သည်။သို့သော် လယ်သမားအများစု လုပ်ကိုင်နိုင်ခြင်း မရှိခဲ့၍ ပြီးခဲ့သည့်စပါးအထွက်ရာသီတွင် ၇ခိုင်ပြည်မှ စပါးအထွက်နှုန်း သိသိသာသာကျဆင်းခဲ့၇သည်။ယင်းသို့ အထွက်နှုန်းကျဆင်းပြီး တွက်ခြေမကိုက်ခဲ့၍ လယ်သမားများချေးယူထားသည့်စိုက်ပျိုးစရိတ်ချေးငွေ များကိုလည်း သည်နှစ်မှာ ပြန်လည်ပေးဆပ်နိုင်ခြင်းမရှိခဲ့ကြပေ။

ပြီးခဲ့သည့်နှစ်က တကျော့ပြန်တိုက်ပွဲဒဏ်ကိုဆိုးဆိုးဝါးဝါးခံခဲ့၇သည့် ၇ခိုင်မှမြို့နယ်များသည် ယခုနှစ် တွင်မိုခါမုန်တိုင်း၏ဒဏ်ကိုလည်း ကြီးကြီးမားမားကြုံခဲ့၇ပြန်သည်။ယင်းဒေသမှလယ်သမားတွေအဖို့ “ကံဆိုးမသွားရာ မိုးလိုက်လို့ရွာ”ဟုပင် ဆို၇မည်လား။တိုက်ပွဲများကြောင့် စပါးအထွက်နှုန်း မကောင်း၍ လယ်သမားများ စိုက်ပျိုးစရိတ်ချေးငွေများကို ပြန်မဆပ်နိုင်ဖြစ်နေရချိန်တွင်မိုခါမုန်တိုင်းက ထပ်မံနှိပ်စက်ခဲ့ရာ ချေးငွေတွေကို ပြန်ဆပ်ရန်မှာ လုံး၀မလွယ်ရေးချာ့ မလွယ်ဖြစ်သွားခဲ့၇သည်။ ယင်းသို့ ပြန်မဆပ်နိုင်၍ ယခုနှစ်မိုးစပါးစိုက်ပျိုး ရန် စိုက်ပျိုးစရိတ် ချေးငွေတွေကိုလည်းထပ်မံချေးယူနိုင်မည်မဟုတ်တော့ဟု လယ်သမားတွေက ပြောသည်။

ပေါက်တောမြို့နယ်၊ သပြေကျွန်းရွာမှလယ်သမား ဦးပန်းသာထွန်းက “မဆပ်နိုင်ဘဲထပ်ယူလို့ ရရင်တော့ လိုချင်တာပေါ့။ မုန်တိုင်းနဲ့ ဆားငန်ရေတွေ ဝင်သွားတဲ့အခါကျတော့မြေဆီ အရင်းအနှီး အတွက်ရောပိုက်ဆံလိုတယ်။ ထွန်စက်နဲ့ထွန်ရင်လည်း စက်ဆီက ဈေးကြီးတဲ့အခါကျတော့ဆီအတွက် ငွေလိုတယ်”ဟုပြောဆိုသည်။

မြန်မာ့လယ်ယာဖွံ့ဖြိုးရေးဘဏ်ကတော့စိုက်ပျိုးစရိတ်ချေးငွေများကို ၁ နှစ်လျှင် အတိုးနှုန်း ၅ ရာခိုင် နှုန်းဖြင့်ထုတ်ချေးပေးနေသည်ဟု စစ်ကောင်စီပိုင်သတင်းစားများတွင် ကြေညာထားသည်။တောင်သူတစ်ဦး ချင်းအတွက် အများဆုံး ကျပ်သိန်း ၇၀၀၊ တောင်သူအစုအဖွဲ့တစ်ဖွဲ့အတွက် အများဆုံး ကျပ်သိန်း ၅၀၀၀ အထိ ၇ယူထုတ်ချေးနိုင်သည်ဟုလည်းဆိုထားသည်။ ချေးငွေ ပေးဆပ်ရာတွင်ထော်လာဂျီ၊ လက်တွန်းထွန်စက်ချေးငွေအတွက် ၃ နှစ် ၃ ရစ်၊ အဆိုပါစက်များမှအပ ကျန်စက်ကိရိယာများအတွက်၅ နှစ် ၅ ရစ် ပေးဆပ်နိုင် သည်ဟုလည်း ဆိုထားသည်။

ဈေးမြင့်တက်နေ၍ ဓာတ်မြေသြဇာလည်း မသုံးနိုင်

၇ခိုင်မှ လယ်သမားတွေမှာယခုနှစ်အတွင်း အသက်ရှူ၇ခက်အောင် အဘက်ဘက်က ကျပ်တည်းပြီး အခက်အခဲကြုံနေ၇ခြင်းဖြစ်သည်။မုန်တိုင်းကြောင့် လယ်ယာမြေတွေ ဆားငန်ရေဝင်ရောက်ပျက်စီးခြင်း၊ထွန်ယက်ရန် ကျွဲနွားရှားပါးမှု၊ လုပ်သားအင်အားရှားပါးမှု၊ ထွန်ယက်ခဈေးနှုန်းမြင့်တက်မှု၊ စိုက်ပျိုးစရိတ်ချေးငွေ ပုံမှန်လိုချေးယူနိုင်ခြင်းမရှိမှုစသည့် အခက်အခဲအကျပ်အတည်းများကိုအလူးအလဲခံနေကြ၇သည်။ ကုန်ဈေးနှုန်းများ တစ်နေ့တခြားမြင့်တက်နေသည်ကလည်းတမှောင့်။ သည်လောက်ပဲလားဆိုလျှင်လည်း မဟုတ်ပြန်။ နောက်ထပ် အခက်အခဲတစ်ခုလည်းရှိနေပြန်သေးသည်။

မြန်မာနိုင်ငံတွင် စစ်တပ်ကအာဏာသိမ်းလိုက်သည့် ၂၀၂၁ ခုနှစ်မှစတင်ကာ ကုန်ဈေးနှုန်းများ အဆမတန်မြင့်တက်ခဲ့၇သည်။အာဏာမသိမ်းခင်က ဓာတ်မြေသြဇာတစ်အိတ်လျှင် ကျပ် ၅ သောင်းအောက်သာရှိခဲ့သော်လည်း အာဏာသိမ်းပြီးနောက်တွင် ကျပ် ၈ သောင်းခန့်အထိမြင့်တက်သွားခဲ့သည်။သည်နှစ်တွင် ဆိုလျှင် တစ်အိတ်လျှင် ကျပ် ၁ သိန်းခန့်အထိရှိနေပြီဖြစ်ဟုလယ်သမားတွေက ပြောသည်။ ယင်းသို့ အဆမတန်မြင့်တက်နေ၍ မည်သည့်နည်းနှင့်မျှသုံးနိုင်တော့မည်မဟုတ်ဟု ပေါက်တောမြို့နယ်မှ လယ်သမားဦးမောင်သန်းတင်က ပြောသည်။

“မြေဆီ တစ်အိတ်ကို၄- ၅ သောင်းလောက်ဆိုရင်တော့ ကျနော်တို့အနေနဲ့ ကြဲနိုင်ပါတယ်။အခုကတော့ ၉ သောင်း၊ ၁သိန်းဖြစ်သွားတော့ ကြဲဖို့ကလည်း မလွယ်ဘူးလေ”ဟု မြေဆီ၊ မြေဇာသြဈေးမြင့်တက်လာ၇သည့် အပေါ် သူက ပြောသည်။

ဓာတ်မြေသြဇာမသုံးပြန်လျှင်လည်း စပါးအထွက်နှုန်းကမကောင်းနိုင်ဟု ဆိုပြန်သည်။ ဥပမာအားဖြင့် ဓာတ်မြေသြဇာသုံးလျှင်စပါးတင်း ၁၀၀ ထွက်ပါက မသုံးလျှင် တင်း ၄၀ ခန့်သာထွက်နိုင်မည်ဟုတွက်ပြသည်။ ယင်းကြောင့် လယ်သမားတွေဘ၀ ဖူလုံနိုင်ရန်အတွက် မြေဆီ၊မြေသြဇာဈေးနှုန်းများကိုလည်း စစ်ကောင်စီက လျှော့ပေါ့ထိန်းညှိပေးစေလိုသည်ဟုဦးမောင်သန်းတင်က တောင်းဆိုသည်။

“တောင်းဆိုချင်တာကတော့ မြေဆီဈေးနှုန်းတွေလျှော့ပေါ့ပေးစေချင်တယ်။ စက်သုံးဆီဈေးတွေ မတက်၇အောင် နည်းနည်းပါးပါးထိန်းညှိပြီးတော့ ပေးစေချင်တယ်”ဟုဆိုသည်။

မျိုးစပါးအခက်အခဲ

အထူးသဖြင့်မိုခါမုန်တိုင်းကြောင့် လယ်သမားတွေမှာ အဆိုးဝါးဆုံးပျက်စီးဆုံးရှုံးမှုကတော့သိုလှောင် ထားသည့် မျိုးစပါးပင်ဖြစ်သည်။ မျိုးစပါးတွေပျက်စီးသွားခဲ့ရသည့်အတွက်သည်နှစ်အဖို့ ရခိုင်က လယ်သမား တွေ ခေါင်းမီးတောက်နေကြ၇သည်။

“မျိုးစပါးကတော့ လုံလုံလောက်မရဘူး။မျိုးစပါးက အရေးတကြီး လိုအပ်ပါတယ်။ အစိုး၇ ဘက်ကလည်း မျိုးစပါးတွေပေးမယ်ဆိုပြီး မပေးသေးဘူး”ဟု မြေပုံမြို့နယ်၊လွန်းလုံးပိုက် ကျေးရွာမှ ဦးထွန်းထွန်းဝင်းက မျိုးစပါးများ လတ်တလော အရေးတကြီးလိုအပ်နေမှုကိုဖွင့်ဟပြောပြသည်။

မုန်တိုင်းကြောင့်ပျက်စီးသွားသည့်မျိုးစပါးများထဲတွင်လည်း လုံး၀ပျက်စီးသွားသူများရှိသလို တချို့ တဝက် ပျက်စီးသွားသူများလည်းရှိသည်။များသောအားဖြင့် မြေနိမ့်ပိုင်းဖြစ်သည့် စစ်တွေ၊ မြေပုံ၊ ပေါက်တော၊ ကျောက်ဖြူစသည့် ပင်လယ်ကမ်းရိုးတန်းနှင့် နီးသည့်ဒေသများတွင် ဒီရေတက်၍ တစ်ဖုံ၊မြစ်ရေမြင့်တက်၍ တစ်မျိုး လုံး၀ ပျက်စီးသွားကြသည်။ ၇သေ့တောင်၊ ပုဏ္ဏားကျွန်း၊ကျောက်တော်နှင့် မြောက်ဦးစသည့်ဒေသတွေ မှာတော့ မျိုးစပါးတွေကိုသိုလှောင်ထားသည့်ခေါင်မိုးတွေ အမိုးလန်သွား၍ မိုးစိုပျက်စီးသွားခြင်းဖြစ်သည်။

ယင်းသို့ခေါင်မိုးလန်ပြီး မျိုးစပါးပျက်စီးသွားသည့်နေရာတွင်လည်း လုံး၀ပျက်စီးသွားခြင်းမျိုးတော့ မဟုတ်။ အပေါ်ယံသာ မိုးစိုသွားခဲ့ခြင်းဖြစ်သည်။

မြောက်ဦးမြို့နယ်၊ သာယာကုန်းကျေးရွာမှလယ်သမား ဦးကိုကိုဌေးကတော့ “ဒီဘက်မှာတော့ မျိုးစပါးကလည်းသိပ်ပြီး ရှာမ၇တာနဲ့ မိုးစိုသွားတဲ့ဟာတွေကိုပဲ နေလှန်းပြီး ကြဲပက်ဖို့ပြင်ဆင်ထား၇ပါတယ်”ဟုသူတို့ရွာဘက်တွေမှာ ကြုံနေ၇သည့် မျိုးစပါးအခက်အခဲကို ပြောပြသည်။

၇ခိုင်ကမုန်တိုင်းသင့်ဒေသတွေမှာ မျိုးစပါး ၁ တောင်းကို ယခင်ကကျပ်တစ်သိန်းကျော်ခန့်သာ ရှိခဲ့ သော်လည်း မုန်တိုင်းတိုက်ပြီးနောက်လက်ရှိတွင် ၁ သိန်း ၆ သောင်းမှ ၁ သိန်း ၈ သောင်းအထိရှိနေသည်ဟုလယ်သမားတွေက ပြောကြသည်။ ယခုကဲ့သို့ ဈေးနှုန်းတွေမြင့်တက်နေ၍ဝယ်ယူသုံးစွဲရန် ပိုက်ဆံအခက်အခဲရှိ နေကြသည်ဟုလည်း ဆိုသည်။

ယင်းကြောင့်မျိုးစပါးများ လုံး၀ ပျက်စီးသွားသည့် လယ်သမားများက မပျက်စီးဘဲ ကျန်နေခဲ့သည့်မျိုးစပါးပိုင်ရှင် လယ်သမားများထံမှ နားလည်မှုဖြင့် ချေးငှားထားရသည်။ယင်းသို့ ချေးငှားရာတွင် ယခုနှစ် မျိုးစပါး တစ်တောင်းချေးပါက လာမည့်စပါးပေါ်ရာသီတွင် ချေးထားသည့်တစ်တောင်းအပြင် နောက်ထပ် တစ်တောင်းနှင့်အခွဲကိုပါ ပြန်ဆပ်ရန်ကတိပြုထားကြခြင်းဖြစ်သည်။

ပြော၇မည်ဆိုလျှင်ယခုနှစ် ရခိုင်ကမုန်တိုင်းသင့်လယ်သမားတွေအဖို့ နံပါတ်တစ်အရေးကြီးဆုံးသော လိုအပ်ချက်မှာမျိုးစပါးပင်ဖြစ်သည်။ မျိုးစပါးသာမရှိလျှင် ဘာမှ လုပ်၍ မ၇။ မျိုးစပါးကသာ အခရာကျလှသည်။ ယင်းကြောင့် လယ်သမားတွေကတော့ မျိုးစပါးအရေး ရတက်မအေးနိုင်ဖြစ်နေကြ၇ခြင်းဖြစ်သည်။

စစ်ကောင်စီရောင်းမည့်မျိုးစပါး တင်း ၇ သောင်းကျော်

စစ်ကောင်စီကတော့၇ခိုင်ဒေသက မိုခါမုန်တိုင်းသင့်လယ်သမားတွေအတွက် မျိုးစပါး တင်း ရသောင်း ကျော်ကို စရိတ်မျှပေးစနစ်ဖြင့် ရောင်းချရန် ပြင်ဆင်နေသည်။အဆိုပါမျိုးစပါးတွေကို ဇွန်လ ၂၄ ရက်ကနေစပြီး စိုက်ပျိုးရေး၊ မွေးမြူရေးနှင့်ဆည်မြောင်းဝန်ကြီးဌာနက စစ်ကောင်စီပိုင် မော်တော်ယာဉ်တွေဖြင့် နေပြည်တော်မှ တဆင့် စစ်တွေသို့ပို့ဆောင်ပေးလိုက်ပြီဖြစ်သည်။

မုန်တိုင်းသင့် ရခိုင်ဒေသရှိမြို့နယ် ၁၀ ခုထဲက မျိုးစပါးများလိုအပ်သော တောင်သူများစာရင်းကိုစိုက်ပျိုးရေး၊ မွေးမြူရေးနှင့် ဆည်မြောင်းဝန်ကြီးဌာနက ကောက်ယူခဲ့ရာလယ်သမား ၁၀၁၀၅ ဦးအတွက် မျိုးစပါး တင်း ၇၃၃၉၇ တင်းလိုအပ်ကြောင်းကောက်ခံရရှိခဲ့သည်ဟု စစ်ကောင်စီက ဆိုသည်။

ယခု စစ်ကောင်စီကပေးပို့လိုက်သည့်မျိုးစပါး တင်း ၇ သောင်းကျော်ထဲမှာ ဧရာ၀တီတိုင်းမြောင်းမြ၊ ဝါးခယ်မ၊ မော်လမြိုင်ကျွန်းဒေသထွက် ပေါ်ဆန်းရင်မျိုးစပါး၊ဖျာပုံဒေသထွက် ကျားပျံမျိုးစပါး၊ ရန်ကုန်တိုင်း တွံတေးဒေသထွက်ပေါ်ဆန်းရင်၊ ပဲခူးတိုင်း ရေတာရှည်ဒေသထွက် နှံကောက်မျိုးစပါး၊နေပြည်တော်မှ ဂရိတ်ဝေါ GW-11 မျိုးစပါးစသည့်မျိုးစပါး တင်းပေါင်း၆၇၉၉၇ တင်းကို စစ်ကောင်စီက ဝယ်ယူခဲ့၇ခြင်းဖြစ် သည်။

ကျန်သည့် မျိုးစပါးတင်း၅၄၀၀ ကို ဂရိတ်ဝေါက GW-11 မျိုးစပါးတင်း ၅၀၀၀ နှင့် ရေတာရှည် ယွန်းလျှံလယ်ယာအထောက်အကူပြုစခန်းမှ ဦးအောင်မျိုးဦးကနှံကောက်မျိုးစပါးတင်း ၄၀၀ တို့ကို လှူဒါန်းခဲ့ ခြင်းဖြစ်သည်။

ယခုပေးပို့လိုက်သည့်မျိုးစပါးများ ရခိုင်သို့ရောက်လာပါကစရိတ်မျှပေးစနစ်ဖြင့် ရောင်းချသွားမည်ဟု လည်း ရခိုင်ပြည်နယ်စစ်ကောင်စီပြောခွင့်၇သူ ပြည်နယ်ဥပဒေချုပ်ဦးလှသိန်းက ပြောဆိုထားသည်။

စရိတ်မျှပေးစနစ်ဆိုသည်မှာ ထိုမျိုးစပါးများ၏ဈေးနှုန်းကိုတောင်းခံခြင်းမဟုတ်ဘဲ သယ်ယူလာသည့် စရိတ်ကိုတောင်းခံခြင်းဖြစ်သည်ဟုလယ်သမားများက ပြောကြသည်။

ယခုတောင်းခံမည့်စရိတ်မျှပေးပုံစံမှာနေပြည်တော်မှသယ်ယူလာသည့်စရိတ်ကိုတောင်းမည်လား၊ စစ်တွေမှ မြို့နယ်အသီးသီးသို့ထပ်ဆင့်သယ်ယူလာသည့်စရိတ်ကိုတောင်းမည်လားဆိုသည်ကိုလည်း လယ်သမားများသဲသဲကွဲကွဲ မသိ၇သေးပေ။ တချို့မြို့နယ်တွေက လယ်သမားများကတော့ စရိတ်မျှပေးဆိုပြီးအခကြေးငွေအများအပြားတောင်းခံလျှင် လုံး၀မယူဘဲ ပြန်လှည့်လာကြရန် ဆုံးဖြတ်ထားကြသည်ဟုလည်းသိ၇သည်။

သည်လို သဘာ၀ဘေးအန္တရာယ်ဆိုးကြောင့် ဒုက္ခအကြီးအကျယ်ရောက်သွား၇သည့် လယ်သမားတွေကို စစ်ကောင်စီကမျိုးစပါးတွေ ရောင်းချပေးမည်ဆိုသည်ကိုလည်း လယ်သမားတွေက သဘောမတွေ့ကြပေ။

မြောက်ဦးမြို့နယ်၊သာယာကုန်းကျေးရွာမှ လယ်သမား ဦးမောင်ထွန်းဝင်းက “ဒါက ကူညီတာမဟုတ်တော့ဘူး။ ရောင်းသလိုဖြစ်သွားပြီ။ လယ်သမားတွေမှာ အခု စားဖို့တောင်မှအနိုင်နိုင်။ ဝယ်၇မယ်ဆို ဘယ်က ပိုက်ဆံ၇မလဲ”ဟု ပြောသည်။

ယခုကိစ္စနှင့်ပတ်သက်ပြီး အသေးစိတ်သိရှိနိုင်ရန်ရခိုင်ပြည်နယ် စစ်ကောင်စီပြောခွင့်၇သူ ပြည်နယ် ဥပဒေချုပ်ဦးလှသိန်းကို နိရဥ္စရာက အကြိမ်ကြိမ်ဆက်သွယ်ခဲ့သော်လည်း ဖုန်းပြန်လည်ဖြေကြားခြင်းမရှိခဲ့ပါ။

မည်သို့ပင်ဆိုစေ ရခိုင်သို့ရောက်ရန်ရှိသည့်မျိုးစပါးများကို စစ်ကောင်စီက အလျင်အမြန်ဖြန့်ဝေပေးရန် လည်းလယ်သမားတွေက တောင်းဆိုနေကြသည်။ ယခုဆို ဇွန်လ ကုန်တော့မည်။ဇူလိုင်လ ပထမပတ်အထိ မျိုးစပါးတွေ လုံလုံလောက်လောက် မ၇ပါက ထွန်ယက်ပြီးသားလယ်မြေတွေမှာ အချိန်မီ စပါးစိုက်ပျိုးနိုင်တော့ မည်မဟုတ်ဟု လယ်သမားများကပြောသည်။ ထို့ကြောင့် မျိုးစပါးတွေကို မြန်မြန်ဆန်ဆန်ရရှိရေးမှာလယ်သမားတွေအတွက် ကြီးမားသော တောင့်တမှုများပင်ဖြစ်သည်။

ရခိုင့်မြေကြီးရွှေသီးနိုင်ပါတော့မလား

၇ခိုင်မှာ ရွှေဝါထွန်း၊စာပစိ၊ သီရိဒုံ၊ ငစိန်၊ ဧည့်မထ၊ ပေါ်ဆန်းမွှေး စသည့်ဆန်အမျိုးအစားများကိုစိုက်ပျိုးတတ်ကြသည်။ ၇ခိုင်ပြည်တစ်ဝန်း မိုးစပါးစိုက်ဧက၁၀၂၀၀၀ ကျော်ရှိသည်ဟုလည်း ရခိုင်ပြည်လုံးဆိုင် ရာ တောင်သူလယ်သမားသမဂ္ဂ၏စာရင်းတွေက ဆိုသည်။ ၇ခိုင်မှာ စပါးစိုက်ပျိုးမှုကို အများဆုံးလုပ်ကိုင်သည့်ဒေသတွေကလည်း ယခု မုန်တိုင်းသင့်ခဲ့သည့် ဒေသများပင်ဖြစ်သည်။

မုန်တိုင်းကြောင့် လယ်ယာလုပ်ငန်းခွင်တို့အစစအရာရာ ထိခိုက်ပျက်စီးသွားခဲ့၍ သည်နှစ်မှာ စပါးအထွက်နှုန်းကောင်းနိုင်တော့မည်ဟုလည်း လယ်သမားများက သုံးသပ်ပြောဆိုလျက်ရှိသည်။စပါးအထွက် နှုန်းမကောင်းပါက ၇ခိုင်ပြည်တွင်း စပါးဆန်ရေ များရှားပါးလာမည်။ စားနပ်ရိက္ခာအတွက် ကြီးမားသော ကျပ်တည်းခက်ခဲမှုများကိုလည်း၇ခိုင်ပြည်သူ၊ ပြည်သားများ ရင်ဆိုင်လာရလာနိုင်ဖွယ်ရှိသည်။

ရခိုင်တွင် ရှေးရခိုင်ဘုရင်အဆက်ဆက်ထီးနန်းအုပ်ချုပ်စိုးစံခဲ့ချိန်ကဆိုလျှင် လယ်ယာလုပ်ငန်းတွေတိုးတက်ထွန်းကားပြီး ဆန်ရေစပါးတွေ ပေါကြွယ်၀ခဲ့သည်ဟု သမိုင်းမှတ်တမ်းတွေအရသိ၇သည်။ “ဘားဘူရှိယင့်ဆန်ရှိယင့်”ဆိုသည့် ရခိုင့်ဆိုစကားကသက်သေထူလျက်ပင်။ သို့သော် ယခု လက်ရှိအခြေအနေတွင်တော့ အဲသည်လိုမဟုတ်တော့ပြီ။ လက်ရှိတွင်မူ ၇ခိုင့်လယ်ယာလုပ်ငန်းမှာ အဘက်ဘက်မှ ကျဆင်းလာနေရသည်။၇ခိုင်လယ်သမားတွေမှာလည်း တစ်နှစ်ထက်တစ်နှစ် နာလံပင် မထူနိုင်ပေ။ရင်းနှီးမြှုပ်နှံလိုက်ရသည့်တန်ဖိုးနှင့် အသီးပေါ်ချိန်ရရှိလာသည့်တန်ဖိုးက များစွာကွာဟလျက်ရှိသည်။ သည်ကြားထဲ ကုန်ဈေးနှုန်းများ ပိုမိုမြင့်တက်လာပြီးစပါးဈေးက မကောင်း၍ လူသာပင်ပန်းပြီး အကျိုးခံစားခွင့် မရှိဖြစ်နေ၇သည်။

ယင်းကြောင့် ၇ခိုင်ကမြို့နယ်တချို့မှာဆို လယ်သမားတွေ လယ်ယာလုပ်ငန်းခွင်ကိုပင်စွန့်ခွာလာနေ ကြပြီဖြစ်သည်။ တိုင်းတပါးသို့ ထွက်ခွာပြီးရွှေ့ပြောင်းလုပ်သားတွေအဖြစ် ပြောင်းရွှေ့လုပ်ကိုင်နေကြ၇သည်။ဘိုးဘွားစဉ်ဆက်လုပ်ကိုင်လာကြသည့် ရခိုင့်လယ်ယာလုပ်ငန်းသည် အဘက်ဘက်မှချွတ်ခြုံကျလာနေ၍ စိတ်ဝင်စားမှု မရှိကြတော့ပေ။

ယင်းသို့လယ်ယာလုပ်ငန်းခွင်ကိုစွန့်ခွာနေမှုတွင် ၇ခိုင်ပြည်နယ်၏အနောက်တံခါးဟု တင်စားခေါ်ဝေါ် ကြသည့် မောင်တောဒေသက သက်သေထူလျက်ရှိသည်။လယ်ယာလုပ်ငန်းခွင်တွေအတွက် သွင်းအားစု ဈေးနှုန်းတွေ အဆမတန်မြင့်တက်လာနေ၍မောင်တောမြို့နယ်မှာ လယ်ယာလုပ်ငန်းကို စွန့်ခွာသွားကြသူတွေတော်တော်များနေပြီဟု ဒေသခံတွေက ပြောဆိုနေကြသည်။

မောင်တောမြို့နယ်မှာ လယ်မြေဧကပေါင်း၃ သောင်းခန့်ရှိသည့်အထဲက ဒေသခံတွေပိုင်ဆိုင်သည့် လယ်မြေဧက ၁ သောင်းသာရှိသည်ဟုမောင်တောခရိုင် တောင်သူလယ်သမားသမဂ္ဂမှ ဗဟိုကော်မတီဝင် ဦးမောင်ယေက ပြောသည်။ပြီးခဲ့သည့်နှစ်ကဆိုလျှင် မောင်တောမြို့နယ်အတွင်း မိုးစပါးစိုက်ပျိုးသူလယ်ဧက ၁ ထောင်ခန့်သာရှိခဲ့သည်ဟုလည်း ပြောသည်။ သည်စာရင်းကိုကြည့်ပါက၇ခိုင့်လယ်ယာလုပ်ငန်း ဘယ်လိုဖြစ်နေ လဲဆိုသည်ကို ရိပ်မိနိုင်ပေလိမ့်မည်။ဒါဘာကြောင့် သည်လိုတွေ ဖြစ်နေ၇သလဲ။ နိုင်ငံကို အုပ်ချုပ်သူအာဏာရှင်များ သုံးသပ်ဆင်ခြင်ကြ၇ပေမည်။

ယခု မုန်တိုင်းသင့်ဒေသတွေသည်လယ်ယာစိုက်ပျိုးမှုကို အဓိကထားလုပ်ကိုင်ကြသည့် ဒေသတွေ ဖြစ်ကြသည်။ယင်းဒေသတွေကို ၇ခိုင်ပြည်၏စပါးကျီလို့လည်း တင်စားတတ်ကြသည်။သည်လို ရခိုင့်စပါးကျီ တည်ရှိရာဒေသမှာ လယ်ယာလုပ်ငန်း အဘက်ဘက်ကပြိုလဲပျက်စီးလာနေ၍ ၇ခိုင့်မြေကြီးကနေ ရွှေသီးနိုင်ပါတော့မလားဟုပင်မေးခွန်းထုတ်၇ပေတော့မည်။

သည်လို မေးခွန်းတွေကြားထဲခါးစည်းရုန်းကန်နေ၇သည့် မြေပုံမြို့နယ်၊ လွန်းလုံးပိုက်ကျေးရွာမှဦးထွန်းထွန်းဝင်းကတော့ သည်နှစ်မှာ သူ့လယ်တွေကို ဖြစ်သလိုလယ်ထွန်ပြီးပြီမို့ မျိုးစပါးရရှိရေးသာ သူ့အတွက် မဟာလိုလားချက်ဖြစ်နေသည်။

“ဖြစ်နိုင်ရင် အစိုး၇ကမျိုးစပါး လုံလောက်အောင်ချပေးပြီးတော့ မြေဆီမြေသြဇာတွေကိုလည်း အပြည့်အ၀ ပေးစေချင်ပါတယ်။ပြီးမှ တစ်နှစ်တာဖြတ်သန်း၇မဲ့ လယ်သမားတွေဘ၀ ဖူလုံမယ်။ မဟုတ်ရင်အခက်အခဲတွေရှိလာမယ်”ဟုသူက ပြောဆိုလိုက်သည်။

ဦးထွန်းထွန်းဝင်းအနေဖြင့် မျိုးစပါးတွေကိုအစိုးရကသာ အချိန်မီ မပေးနိုင်လျှင် မရ၊ ၇သည့် နည်းဖြင့် ရှာဖွေစိုက်ပျိုး၇တော့မည်။မတတ်သာသည့်အဆုံး ကျောက်တော်၊ မြောက်ဦးတို့လို ဒေသတွေဆီ သွားပြီးမျိုးစပါးရှိသူတွေဆီက သွားရောက်ဝယ်ယူရန် စဉ်းစားထားသည်။

သည်လိုခက်ခဲကျပ်တည်းသည့်ကြားမှ ကြိုးစားရုန်ကန်ထွန်ယက်စိုက်ပျိုးထား၇သည့် သူ့တွင်လာမည့် စပါးအထွက်ရာသီ၌ စပါးအထွက်နှုန်းကော ကောင်းနိုင်ပါ့မလား။ ယင်းအချိန်ရာသီဥတုအခြေအနေကကော ဘယ်လိုဖြစ်လာနိုင်မလဲ။ စိုက်ပျိုးဖြစ်ထွန်းလာသည်ဆိုဦးတော့။ထိုစပါးများသည် တစ်နေ့တမျိုး ဖြစ်ပျက် ပြောင်းလဲနေသည့်နိုင်ငံရေးအခြေအနေကြောင့် ဈေးကောင်းကော ရလာနိုင်ပါ့မလား။သူ၏လယ်ယာလုပ်ငန်း အတွင်း ရင်းနှီးမြှုပ်နှံအပင်ပန်းခံထားရသည်များနှင့်တန်အောင်အကျိုးခံစားခွင့်ကော ၇လာနိုင်ပါ့မလား။ အဖြေမဲ့နေသည့် သည်မေးခွန်းတွေက သူ့စိတ်ကိုလွှမ်းမိုးလျက် . . . ။

မင်းအဂ္ဂ

မြေကြီးကရွှေသီးနိုင်ပါတော့မလား

ဆက်စပ် အကြောင်းအရာများ

နောက်ဆုံးရသတင်းများ