သံတိုင်ကြားက သံမဏိနှလုံးသားပိုင်ရှင်အမျိုးသမီးဒေါ်ညိုအေး

အချုပ်ကားရဲ့  သံပန်းတွေနဲ့ ကာရန်ထားတဲ့ ပြတင်းပေါက်ကျဉ်းကျဉ်းကလေးထဲက “ငါ့  နေကောင်းတယ်” ဆိုတဲ့ စကားထက် အပိုပြောခွင့်မရတဲ့ အဖြေစကားသံကြောင့် သူမကို စောင့်နေကြတဲ့ မိသားစုဝင်တွေနဲ့  လုပ်ဖော်ကိုင်ဖက်တချို့ဟာ စိတ်သက်သာရကြပေမဲ့ စိုးရိမ်စိတ်တွေတော့ ရှိနေကြပါတယ်။

 သူမရဲ့  တွန့်လိမ့်နေတဲ့ အရေပြားပေါ်က လက်နှစ်ချောင်းကို လက်ထိပ်ခတ်ထားပေမဲ့ အပြုံး တစ်ချက်မညိုး မျက်နှာတစ်ချက် မပျက်သွားဘဲ သူမကို ရုံးထုတ်ရာလမ်းတစ်လျှောက် စောင့်နေကြတဲ့ သူတွေကို အပြုံးနဲ့ နူတ်ဆက်ခဲ့ပါတယ်။ သူမကတော့ အသားအရေတွေက နုညံ့ပျော့ဖတ်နေပေမဲ့ ဆံပင်တွေဖြူ ပါးရေတွေ တွန့်နေတဲ့ အသက် ၆၈ အရွယ် သံမဏိနှလုံးသားပိုင်ရှင် ရခိုင်အမျိုးသမီးကွန်ရက် ဥက္ကဋ္ဌ အမျိုးသမီးဒေါ်ညိုအေးဘဲ ဖြစ်ပါတယ်။

ရခိုင်အမျိုးသားရေးအတွက်၊ အမျိုးသမီးတွေအခွင့်အရေးအတွက် အဖက်ဖက်က နိမ့်ကျနေတဲ့ ရခိုင်ပြည်သူ ပြည်သားတွေ အတွက်  သူမဘ၀ကို စတေးခံဖို့ ဝန်မလေးတဲ့ သံမဏိလို့ မာကျောတဲ့ နှလုံးသားနဲ့  မားမားမတ်မတ် ရပ်တည်ပေးနေတဲ့ သူမဟာ ခုတော့  ကြီးလေးတဲ့ ပုဒ်မတွေနဲ့ ဖမ်းဆီးတရားစွဲဆိုခံနေရပြီး လက်ရှိ စစ်တွေထောင်နရသိန်မှာ အကျဉ်းချခံနေရပါတယ်။

သူမဟာ စစ်တွေမြို့က စစ်တွေကျောင်းသားသမဂ္ဂရုံးမှာ စစ်တွေကျောင်းသားသမဂ္ဂက ဦးဆောင်ပြုလုပ်ခဲ့တဲ့ ၅၆ နှစ်မြောက်  ဩဂုတ် ၁၃ စစ်တွေဆန်ပြဿနာနေ့ အထိမ်းအမှတ် ဝမ်းနည်းအောက်မေ့ဖွယ်နေ့ အခမ်းအနားကို ဖိတ်ကြားခဲ့တဲ့အတွက် သွားတက်မိခဲ့တာနဲ့ ရက်စက်ကြမ်းကြုတ်တဲ့ စစ်ကောင်စီ လက်ပါးစေတွေက နိုင်ငံတော်ဆူပူအောင်လှုံ့ဆော်မှုပုဒ်မ ၅ဝ၅(ခ) နဲ့  အမှုဖွင့် တရားစွဲဆိုထားတာ ဖြစ်ပါတယ်။  သူမဟာ စစ်ကောင်စီကို ဆန့်ကျင်တာလည်း မဟုတ်သလို နိုင်ငံတော်ကိုလည်း ပုန်ကန်မှုတွေဖြစ်အောင် လုံ့ဆော်ခဲ့သူလည်း မဟုတ်ပါဘူး။ ဒါပေမယ့် ဒီ စစ်တွေဆန်ပြဿနာနေ့ အခမ်းအနားဟာ တိုင်းပြည်ကို အုပ်ချုပ်နေတဲ့ စစ်အာဏာရှင်တွေရဲ့  ယုတ်မာရိုင်းစိုင်းတဲ့ သမိုင်းဝင် လူသတ်ပွဲကြီးကို အမှတ်ရစေတဲ့ အခမ်းအနားမျိုး ဖြစ်တာကြောင့် စစ်ဝါဒီတွေအတွက် အသဲကို အပ်နဲ့ ဆွသလိုမျိုး နာကျည်းခံရခက်စေတာကြောင့် ခုလို ဖမ်းဆီးပြီး  နိုင်ငံတော်ဆူပူအောင်လှုံ့ဆော်မှုပုဒ်မနဲ့ တရားစွဲဆိုခဲ့တာ ဖြစ်ပါတယ်။

ဒေါ်ညိုအေးကို ခုလို မတရားဖမ်းဆီးပြီး ကြီးလေး‌ပုဒ်နဲ့  အမှုဖွင့်လိုက်တာဟာ ရခိုင်ပြည်သူတွေရဲ့  နာကျည်းမှုနဲ့ မုန်းတီး စိတ်တွေသာ ပိုမို ဖြစ်ပေါ်လာမှာ ဖြစ်ပြီး ဘာအကျိုး ကျေးဇူးမှဖြစ်ထွန်းလာလိမ့်မယ်မဟုတ်ဘူးလို့  ရခိုင့်နိုင်ငံရေး လေ့လာသုံးသပ်သူ  ဝါရင့်နိုင်ငံရေးသမား  ဦးဖေသန်းက ပြောပါတယ်။

“ စစ်တွေဆန်ပြဿနာနေ့ အခမ်းအနားကို တက်တဲ့ အတွက် ဒေါ်ညိုအေးကို ခုလို ကြီးလေးတဲ့ ပုဒ်မနဲ့  အမှုဖွင့်လိုက်တာဟာ  ရခိုင်ပြည်သူများ၏ နှလုံးသားထဲမှာ ပို၍ စိုးရိမ်သောက ဖြစ်စေတဲ့အပြင် စစ်ကောင်စီကို  နာကျည်းမုန်းတီးစိတ်များ ပို၍ဖြစ်လာနိုင်တယ်။ ဒီလုပ်ရပ်များအတွက် ပြောင်းပြန် အကျိုးသက်ရောက်မှုကိုသာ ခံစားရမှာဖြစ်တဲ့အတွက် သတိထားဆင်ခြင်ကြဖို့လိုပါမယ်။”

သူမဟာ   ပြီးခဲ့သည့် သြဂုတ်လ ၁၅ ရက်၊ နေ့လယ်ပိုင်းမှာ စစ်တွေက ရခိုင်အမျိုးသမီး ကွန်ရက်ရုံးထဲမှာ ဘဲ စစ်ကောင်စီရဲတပ်ဖွဲ့ရဲ့ ဝင်ရောက်ဖမ်းဆီးခြင်းကို ခံခဲ့ရပါတယ်။  ပြီးခဲ့တဲ့ ဩဂုတ်လ ၂၉ ရက်နေ့မှာတော့  ပထမဆုံးအကြိမ် အဖြစ် စစ်ကောင်စီ စစ်တွေမြို့နယ် တရားရုံးမှာ ရုံးထုတ်ခဲ့ပါတယ်။

ခုလို ရုံးထုတ်ရာမှာ သူမရဲ့ အမှုကို မစစ်ဆေးခဲ့သလို  ဩဂုတ် ၁၃  စစ်တွေဆန်ပြဿနာနေ့ အခမ်းအနားကို ဦးဆောင်ကျင်းပခဲ့တဲ့ ကျောင်းသားခေါင်းဆောင်တွေကို ဖမ်းဆီးရပြီးမှ အမှုကို စစ်ဆေးမယ် စစ်ကောင်စီ တရားရုံးဘက်က ဆိုလာတာကြောင့် သူမရဲ့ အမှုဟာ ရှည်ကြာနိုင်တဲ့ အနေအထားကို ရောက်သွားနိုင်တဲ့အတွက် သူမကို လေးစားသူတွေနဲ့ မိသားစုတွေအကြားမှာ စိုးရိမ်မှုတွေမြင့်တက်ခဲ့ရပါတယ်။

ဒေါ်ညိုအေးဟာ ရခိုင်ပြည်အတွင်း အမျိုးသမီးအခွင့်အရေးနဲ့ လူမှုရေးလုပ်ငန်တွေမှာ တက်ကြွ လှုပ်ရှားနေသူ တစ်ယောက်ဖြစ်သလို ရခိုင်အမျိုးသမီး အရေးကို လှုပ်ရှားနေတဲ့ ရခိုင်အမျိုးသမီး ကွန်ရက်ရဲ့  ဥက္ကဋ္ဌ တစ်ဦးလည်းဖြစ်ပါတယ်။ ခုလို မြန်မာနိုင်ငံမှာ စစ်ကောင်စီက အမျိုးသမီး အခွင့်အရေးလှုပ်ရှားသူတွေကို ဖမ်းဆီးအပြစ်ပေးထောင်ချခံနေတာကတော့ ဒေါ်ညိုအေး တစ်ယောက်တည်းတော့ မဟုတ်ပါဘူး။  တစ်ခြား အမျိုးသမီးအရေးတက်ကြွလှုပ်ရှားသူတွေလည်း အများအပြား ဖမ်းဆီးအကျဉ်းကျခံနေရတာဖြစ်ပါတယ်။ အခု ရခိုင်က ဒေါ်ညိုအေးကို  စစ်ကောင်စီက ဖမ်းဆီးပြီး တရားစွဲဆိုတာဟာ အမျိုးသမီးအရေး လူပ်ရှားနေသူတွေကို ပစ်မှတ်ထား နှိမ်နှင်းလိုတဲ့ ရည်ရွယ်ချက်နဲ့ ပြုလုပ်တာဖြစ်တယ်လို့  မြန်မာ့အမျိုးသမီးသမဂ္ဂရဲ့  မူဝါ ဦးဆောင်အဖွဲ့ ဒေါ်တင်တင်ညို က သုံးသပ်ပြောဆိုပါတယ်။

"လက်ရှိ ကျွန်မတို့ မြန်မာနိုင်ငံက စစ်အာဏာသိမ်းထားတဲ့ နိုင်ငံဖြစ်တယ်။ စစ်အာဏာ သိမ်းထားပြီးတော့မှာ နိုင်ငံကို အကြမ်းဖက်မှုဝါဒါတွေနဲ့ အုပ်စိုးနေတဲ့ စစ်ကောင်စီက ရှိနေတာပေါ့။ ဒီလိုမျိုး တရားဥပဒေမဲ့နေတဲ့အနေအထားမှာ ဘယ်သူမဆို အာဏာလုယူထားတဲ့ သူတွေရဲ့ အာဏာကို တစ်စုံတစ်ရားထိပါးလာနိုင်တယ်ဆိုရင် ဖမ်းနိုင်တယ်ပေါ့နော်။ အဲထဲမှာ ဒေါ်ညိုအေးလည်း ပါသွားတယ်လို့ ပြောလို့ရပါတယ်။ တစ်ခါတစ်လေကျရင် အမျိုးသမီးတွေကိုလည်း ပစ်မှတ်ထားတာ ဖြစ်နိုင်တယ်။ ဘာလိုလည်းဆိုတော့ အမျိုးသမီးတွေဟာ လူထုတွေနဲ့ ထိစပ်စွာ အလုပ်လုပ်ကြတယ်။ လက်ရှိလူထုတွေမှာ လိုအပ်ချက်တွေ အများကြီးရှိနေတယ်။ အထူးသဖြင့် ကျွန်မတို့ အမျိုးသမီးတွေပေါ့နော်။ အများကြီး စီးပွားရေး၊ လူမှုရေး၊ ကျန်းမာရေးဆိုင်ရာ အထွေထွေပြဿနာတွေနဲ့ ရင်ဆိုင်နေရပါတယ်။ ဒီလိုအတွက် ကူညီပေးနေတာ အရမ်းကို ရှားပါးတဲ အချိန်ပေါ့။ ဒီလိုအချိန်မှာ ဒေါ်ညိုအေးတို့က ဦးဆောင်ပြီး ပါဝင်နေတဲ့ သူတွေဖြစ်တယ်။ သူတို့ကို ပစ်မှတ်ထား ဖမ်းဆီးလိုက်တာက ပြောမယ်ဆိုရင် ရည်ရွယ်ချက်ရှိတယ်လို့ ပြောလို့ရပါတယ်။"

စစ်အာဏာသိမ်းပြီးနောက်မှာ နယ်မြေပေါင်းစုံမှာ မတူညီတဲ့ နိုင်ငံရေးလှုပ်ရှားမှုတွေ အထဲမှာ နိုင်ငံရေးတက်ကြွလှုပ်ရှားတဲ့ အမျိုးသမီးတွေ အများအပြား ပါဝင်နေတာတွေ ရှိပါတယ်။ ဒါကြောင့်လည်း အမျိုးသမီးတက်ကြွလှုပ်ရှားသူတွေကို  ဒေသမရွေး နေရာမရွေး စစ်ကောင်စီ ပစ်မှတ်ထာပြီး ဖမ်းဆီး  နှိမ်နှင်းနေတာ ဖြစ်ပါတယ်။ မြန်မာအမျိုးသမီးအရေး လှုပ်ရှားနေသူတွေဟာ နောက်ထပ်လည်း အချိန်မရွေးဖမ်းဆီးခံရနိုင်တယ်လို့လည်း သူမကဆိုပါတယ်။ တိုင်းပြည် အာဏာကို လုယူထားတဲ့ စစ်အာဏာရှင်တွေဟာ နိုင်ငံအတွင်း လူ့အခွင့်အရေးဆိုင်ရာ ကိစ္စရပ်တွေကို ဆိတ်သုဉ်းစေလိုတဲ့အတွက် ဘယ်သူမဆို ဖမ်းဆီးမှာ ဖြစ်တယ်လို့ ဒေါ်တင်တင်ညိုက ဆက်ပြောပါတယ်။

"စစ်အာဏာသိမ်းပြီးနောက်မှာ နယ်မြေပေါင်းစုံမှာ မတူညီတဲ့ နိုင်ငံရေးလှုပ်ရှားမှုတွေ အထဲမှာ နိုင်ငံရေးတက်ကြွလှုပ်ရှားတဲ့ အမျိုးသမီးတွေ ပါဝင်ခဲ့တာတွေ ရှိခဲ့ပါတယ်။ ဒါကြောင့်လည်း အမျိုးသမီးတက်ကြွလှုပ်ရှားသူတွေကို ပြစ်မှတ်ထာပြီး စစ်ဏာရှင်တွေက အချိန်မရွေး ဖမ်းဆီးနိုင်ပါတယ်။ ဒါအပြင် အာဏာကို လုယူထားတဲ့ စစ်အာဏာရှင်တွေက အုပ်ချုပ်နေတာ ဖြစ်တဲ့အတွက်မို့ ဘယ်သူမဆို လူ့အခွင့်အရေးဆိုတဲ့ ကိစ္စရပ်တွေက ဆိတ်သုဉ်းနေမှာပဲလို့ ဆက်ပြောပါတယ်။ အားလုံးက သတိရှိရှိနဲ့ ကိုယ်လုပ် စရာရှိတာတွေကို ဆက်ပြီးတော့ လုပ်သွားရမှာပေါ့။"

ဒေါ်ညိုအေးဟာ သူမရဲ့ နုပျိုမှုတွေကို  ဖက်ဒရယ် ဒီမိုကရေစီအရေး၊ လူ့အခွင့်အရေး၊ တန်းတူ အခွင့်အရေးတို့အတွက် တိုက်ပွဲဝင် ပေးဆပ်နေခဲ့သူဖြစ်သလို လက်ရှိ အသက်အရွယ်အထိ နောက်မဆုတ်ဘဲ သူယုံကြည်ကို လျှောက်လှမ်းနေသူ တစ်ဦးလည်း ဖြစ်ပါတယ်။ မာကျောတဲ့ သံမဏိနှလုံးသားနဲ့ ကိုယ်ကျိုးစွန့်ကာ နှစ်ပေါင်း ၃၀ ကျော် အနစ်နာခံပေးဆပ်နေသူတစ်ဦးလည်း ဖြစ်ပါတယ်။

အခု အဖမ်းအဆီးဟာ ရခိုင်ပြည်အတွင်းက နိုင်ငံရေးတက်ကြွလှုပ်ရှားသူတွေနဲ့ အဖွဲ့အစည်းတွေရဲ့ ရှေ့လုပ်ဆောင်ချက်တွေကို ရပ်တန့်သွားအောင်  ခြိမ်းခြောက်နေတာဖြစ်တယ်လို့ ရခိုင်လူအခွင့်အရေး ကာကွယ်မြင့်တင်သူများအဖွဲ့ ဒါရိုက်တာ ဦးမြတ်ထွန်းက ထောက်ပြပါတယ်။

“ဒေါ်ညိုအေးကို စစ်ကောင်စီက ပေါ်လစီတစ်ရပ်အနေနဲ့ ရည်ရွယ်ချက်ရှိရှိ ဖမ်းဆီးထားတယ်ဆိုတာကို ကျနော်တို့ သဘောပေါက်ပါတယ်။ သူကို ဖမ်းဆီးခြင်းဟာ သူလို့ပဲ နောက်ထပ် ရခိုင်အမျိုးသမီး အဖွဲ့တွေနဲ့ လူမှုရေးအဖွဲ့အစည်းတွေရဲ့ ရှေ့ကို ဆက်လက်ပြီးတော့ ရခိုင့်နိုင်ငံရေးလှုပ်ရှားမှုတွေကို မလုပ်ရဲအောင် ဟန်တားတဲ့ ပုံစံမျိုး၊ ကြောက်လှန့် အောင်လုပ်တဲ့ ပုံစံမျိုးလုပ်တယ်လို့ ထင်မြင် ယူဆပါတယ်။”

 
ဦးမြတ်ထွန်းပြောသလို ရခိုင်ပြည်မှာ ကိုယ်ကျိုးစွန့်ပြီး အမျိုးသမီးအရေး တက်ကြွစွာ လှုပ်ရှားနေသူ အရေအတွက်က လက်ချိုးရေတွက်လို့ ရပါတယ်။ ဒီအထဲက ဒေါ်ညိုအေးလို အမျိုးသမီး ခေါင်းဆောင်တွေကိ ဖမ်းဆီးပြလိုက်တာကတော့ နောက်ထပ် အမျိုးသမီးတွေ နိုင်ငံရေး မပါဝင်အောင်ရဲအောင်နဲ့ အမျိုးသမီးအရေးတွေကို မလှုပ်ရှားနိုင်အောင် ခြိမ်းခြောက်ပြလိုက်တာလည်း ဖြစ်ပါတယ်။ ခုလို ဖမ်းဆီးပြလိုက်ပေမယ့် ရခိုင်အမျိုးသမီးတွေရဲ့  လှုပ်ရှားမှုတွေက ရပ်တန့်သွားလိမ့်မယ်လို့ စစ်ကောင်စီက ထင်ရင် မှားသွားနိုင်တယ်လို့လည်း သူက ဆိုပါတယ်။ ဒေါ်ညိုအေးဟာ လက်ရှိ အဖမ်းခံနေရပေမယ့် သူမရဲ့ မာကျောလှတဲ့ သံမဏိစိတ်ဓာတ်ကတော့ ပျက်ပြယ်နိမ့်ပါးသွားမှာ မဟုတ်သလို ပိုမိုခိုင်မာတဲ့ ယုံကြည်ချက်၊ ခံယူချက် စိတ်ဓာတ်တွေနဲ့ သူမရဲ့ ဘ၀ကို ဆက်လက် ဖြတ်သန်းလျှောက်လှမ်းနေအုံးဆိုတာကတော့ မြေကြီးလက်ခတ်မလွဲပါဘဲလို့ ပြောဆိုရင်း ဒီဆောင်းပါးနဲ့ ဒေါ်ညိုအေးကို ဂုဏ်ပြု ရေးသားတင်ပြလိုက်ရပါတယ်။