"အရှေ့အလယ်ပိုင်းက ပါဝါနှစ်နိုင်ငံရဲ့ ထိပ်တိုက်အတွေ့ စစ်ပွဲကြီးတစ်ခုဆီဦးတည်ပြီလား"

ဂျေတီ (နိုင်ငံတကာ စစ်ရေးသုံးသပ်ချက်ဆောင်းပါး) နိရဉ္စရာ၊ အောက်တိုဘာ ၅/၂၀၂၄

"အီရန်ဟာမဟာအမှားကြီးတစ်ခုကိုကျူးလွန်ခဲ့ပြီ၊ အဲဒီလုပ်ရပ်အတွက် ပြန်လည်ပေးဆပ်ရမယ်" အထက်ပါသတိပေးစကားကိုပြောဆိုလိုက်သူက အစ္စရေးဝန်ကြီးချုပ်နေသန်ရာဟုပင်ဖြစ်သည်။

အောက်တိုဘာ(၁)ရက်ကအီရန်သည်ပဲ့ထိန်းဒုံးကျည်ပေါင်း(၁၈၀)ထက်မနည်းဖြင့် အစ္စရေးတို့အားပစ်ခတ်တိုက်ခိုက်မှုများပြုလုပ်ခဲ့ခြင်းဖြစ်သည်။

"အီရန်တို့အနေဖြင့်ပြန်လည်ပေးဆပ်ရမည်"ဟုအဆိုပါတိုက်ခိုက်မှုများအပြီး ချက်ခြင်းဆိုသလိုပင် အစ္စရေးဝန်ကြီးချုပ်၏ သတိပေးပြောဆိုချက် ထွက်ပေါ်လာခဲ့ခြင်းဖြစ်သည်။

၄င်း၏သတိပေး ပြောဆိုချက်ကြောင့်"အီရန်နှင့် အစ္စရေး စစ်ပွဲကြီးတစ်ခုဆီဦးတည်ပြီလား။ အစ္စရေးနှင့်အီရန်တို့သည် စစ်ပွဲ အတွင်း ချဥ်းနင်းဝင်ရောက်လာကြပြီလား။ ဘာကြောင့် အီရန်နှင့်အစ္စရေးတို့ ပဋိပက္ခအတွင်းသက်ဆင်းခဲ့ကြရသနည်း။ ဒေသတွင်းစစ်ပွဲ ကိုရှောင်ရှားနိုင်ကြမည်လား ။ သို့တည်းမဟုတ်။ ထိန်းမနိုင်သိမ်းမရဖြစ်သွားနိုင်မည်လား။ အစ္စရေးနှင့် အီရန်တို့၏နောက်လာမည့် အကျိုးဆက်က ဘာတွေဖြစ်လာမည်လဲ"ဆိုသည့်မေးခွန်းများစွာ ထွက်ပေါ်လာခဲ့သည်။

"အီရန်ကအစ္စရေးကိုဘာကြောင့်တိုက်ခိုက်ရသလဲ" အီရန်နှင့်မဟာမိတ်ဖွဲ့ထားသည့် လက်နက်ကိုင်အဖွဲ့များ၏ ခေါင်းဆောင်အများအပြားကို အစ္စရေးတို့ကသတ်ဖြတ်ခဲ့မှုအတွက် လက်တုံ့ပြန်သည့် အနေဖြင့်တိုက်ခိုက်ခဲ့ခြင်းဖြစ်သည်ဟုအီရန်ကအကြောင်းပြသည်။

အစ္စရေးတို့သည်ပြီးခဲ့သည့်ရက်သတ္တပတ်အတွင်းက လက်ဘနွန်တစ်ဝန်း ရှိဟစ်ဇ်ဘိုလာတို့၏ပစ်မှတ်များကိုလေကြောင်းတိုက်ခိုက်မှုများ အဆက်မပြတ်ပြုလုပ်ခဲ့သည်။ စက်တင်ဘာ (၂ရ) ရက်က တိုက်ခိုက်မှုများအတွင်း ဟစ်ဇ်ဘိုလာခေါင်းဆောင်ဟက်ဆန် နာစရယ်လာ ကို အစ္စရေးတို့ကသတ်ဖြတ်သုတ်သင်ခဲ့သည်။

စက်တင်ဘာ (၂၈) ရက် ကလည်းဟစ်ဇ်ဘိုလာ အကြီးတန်းအရာရှိ Nabil Kaouk ကို ထပ်မံသတ်ဖြတ်ခဲ့သည်။ ၄င်းအပြင်အီရန်တော်လှန်ရေးအစောင့်တပ်၏လက်ထောက်တပ်မှူးဖြစ်သူ Abbas Nilforoushan လည်းသေဆုံးခဲ့ရသည်။ ဟဇ်ဘိုလာ၏ ထိပ်တန်း နိုင်ငံရေးနှင့် စစ်ဘက်ဆိုင်ရာခေါင်းဆောင်များကို ပစ်မှတ်ထားသည့် အစ္စရေးတို့၏ ကြီးမားသောတိုက်ခိုက်မှုများသည် အထွတ်အထိပ်သို့ရောက်ရှိခဲ့သည်။

ဟစ်ဇ်ဘိုလာခေါင်းဆောင် ဟက်ဆန် နာစရယ်လာသတ်ဖြတ်ခံရအပြီးတွင်ပုန်းအောင်းနေသည့် အီရန်၏ထိပ်တန်းခေါင်းဆောင် အယာတိုလာ အလီခါမေနီအား အီရန်နိုင်ငံအတွင်းရှိ လုံခြုံသောနေရာသို့ ရွှေ့ပြောင်းခဲ့ပြီးနောက်အောက်တိုဘာ(၂)ရက်တွင်အများမြင်ကွင်းသို့ပြန်လည်ထွက်ရှိလာခဲ့သည်။

အစ္စရေးတို့က လက်ဘနွန်ရှိ ဟစ်ဇ်ဘိုလာခေါင်းဆောင်ကိုသတ်ဖြတ်ခံခဲ့ရမှုအတွက် လက်တုံ့ပြန်သည့်အနေဖြင့်ယခုကဲ့သို့ပစ်ခတ်တိုက်ခိုက်မှုများလုပ်ဆောင်ခဲ့ခြင်းဖြစ်ကြောင်းအီရန်နိုင်ငံ၏ခေါင်းဆောင်ဖြစ်သူ အယာတိုလာအလီခါမေနီကအစ္စရေးကို တိုက်ခိုက်မှုများပြုလုပ်အပြီး ပထမဆုံး လူသိရှင်ကြားထုတ်ဖော် ပြောဆိုခဲ့သည်။

Tel Aviv ဧရိယာရှိအစ္စရေးတို့၏ စစ်အခြေစိုက်စခန်း(၃)ခုကို ပစ်မှတ်ထား တိုက်ခိုက်ခဲ့ကြောင်း အီရန်က ပြောကြားခဲ့သည်။

အီရန်သမ္မတ Masoud Pezeshkian က ယခုကဲ့သို့တိုက်ခိုက်ရမှုသည် “အီရန်၏အကျိုးစီးပွားနှင့်နိုင်ငံသားများကို ခုခံကာကွယ်ခြင်းသာဖြစ်သည်” ဟု ပြောကြားခဲ့သည်။

အီရန်တို့၏ ဒုံးကျည်အများစုကို ကြားဖြတ် ဟန့်တားနိုင်ခဲ့ကြောင်း ထိခိုက်သေဆုံးမှုလည်းမရှိခဲ့ကြောင်း အစ္စရေး စစ်တပ်က ပြောဆိုခဲ့သည်။"အစ္စရေး၏ တုန့်ပြန်မှု" အီရန်တို့ကဒုံးကျည်များဖြင့်တိုက်ခိုက်ခဲ့မှုအပေါ် အစ္စရေးတို့ကလည်းပြန်လည်လက်တုန့်ပြန်မည်ဟုမဆိုင်းမတွထုတ်ဖော်ပြောဆိုခဲ့သည်။

အီရန်၏နျူကလီးယားရှိရာနေရာများ၊ ရေနံစက်ရုံများကိုအစ္စရေးတို့ က လက်တုံ့ပြန်တိုက်ခိုက်မည်ဟုသတင်းများထွက်ပေါ်လာခဲ့သည်။ အီရန်၏ ဓာတ်ငွေ့သို့မဟုတ် ရေနံတူးစင်များကဲ့သို့သော မဟာဗျူဟာကျသည့် အခြေခံအဆောက်အအုံများ၊အီရန်၏နျူကလီးယားနေရာများကိုအစ္စရေးတို့က တိုက်ရိုက်ပစ်မှတ်ထားပြီးလက်တုံ့ပြန်တိုက်ခိုက်နိုင်သည်ဟု အစ္စရေးအရာရှိများက အောက်တိုဘာ (၂)ရက် တွင်ပြောကြားခဲ့သည်။

အစ္စရေးတို့အနေဖြင့်ပစ်မှတ်ထားလုပ်ကြံသတ်ဖြတ်မှုများနှင့် အီရန်၏ လေကြောင်းရန်ကာကွယ်ရေးစနစ်များကိုလည်း လက်တုန့်ပြန်တိုက်ခိုက်နိုင်ခြေရှိသည်ဟုAxios ဖော်ပြခဲ့သည်။

"စစ်သွေးကြွတို့၏ ကန့်လန့်ကာနောက်ကွယ်က အီရန်" အီရန်သည် အစ္စရေးနိုင်ငံ၏တည်ရှိနေမှုကို အသိအမှတ်မပြုဘဲ အစ္စရေးကို တိုက်ခိုက်ရန်အတွက် လက်ဘနွန်တွင်ဟစ်ဇ်ဘိုလာကဲ့သို့သော လက်နက်ကိုင်တပ်ဖွဲ့များကို နှစ်ပေါင်းများစွာ ကိုကျောထောက်နောက်ခံ အဖြစ် ရပ်တည်ခဲ့သည့်နိုင်ငံဖြစ်သည်။

အီရန်သည် ၊လက်ရှိအစ္စရေးနှင့် တိုက်ခိုက်နေသည့် စစ်သွေးကြွအုပ်စုများဖြစ်သည့် ဂါဇာရှိဟားမတ်စ်များ၊ လက်ဘနွန်ရှိ ဟစ်ဇ်ဘိုလာနှင့် ယီမင်ရှိ ဟူသီသူပုန်များ၊ဆီးရီးယားနှင့် အီရတ်ရှိ အခြားသောအဖွဲ့များ စသည့်များစွာသောစစ်သွေးကြွအုပ်စုများကို ကျောထောက်နောက်ခံပြုနေသည်မှာနှစ်ရည်လများကြာညောင်းခဲ့ပြီဖြစ်သည်။

အီရန်တော်လှန်ရေးအစောင့်တပ် အပါအဝင်အဆိုပါအဖွဲ့အများအပြားကို ကနေဒါ၊ အမေရိကန်နှင့် အခြားမဟာမိတ်များကအကြမ်းဖက်အဖွဲ့များအဖြစ်သတ်မှတ်ထားကြကြသည်။ အရှေ့အလယ်ပိုင်းဒေသတွင် အစ္စရေးတို့၏တည်ရှိနေမှုကိုအဆိုပါအဖွဲ့ အားလုံးက ဆန့်ကျင်ထားကြသည်။

၂၀၂၃ ခုနှစ် ၊ အောက်တိုဘာ(ရ) ရက်တွင် ဟားမတ်စ်တို့ကအစ္စရေးကိုတိုက်ခိုက်ခဲ့မှု ၊ ပင်လယ်နီရှိ သင်္ဘောများကို ဟူသီတို့ကတိုက်ခိုက်ခဲ့မှုများကို အီရန်က ထောက်ခံအားပေးခဲ့သည်။ "အီရန်၊အစ္စရေး ထိပ်တိုက်အတွေ့များ" ယခုနှစ် ဧပြီလအတွင်းက ဆီးရီးယားနိုင်ငံ ဒမတ်စကတ်ရှိအီရန်ကောင်စစ်ဝန်ရုံးကို အစ္စရေးတို့ ကတိုက်ခိုက်မှုများပြုလုပ်ခဲ့သည်။

အဆိုပါတိုက်ခိုက်မှုအတွင်း IRGC ၏ထိပ်တန်းတပ်မှူး ဖြစ်သူဗိုလ်ချုပ် MohammadReza Zahedi နှင့် ၎င်း၏လက်ထောက်များအပါအဝင် လူတစ်ဒါဇင်ကျော်သေဆုံးခဲ့၇သည်။ ၄င်းတိုက်ခိုက်မှုကိုလက်တုန့်ပြန်သည့်အနေဖြင့်အစ္စရေးနိုင်ငံအပေါ် အီရန်၏ ပထမဆုံး တိုက်ရိုက်တိုက်ခိုက်မှုကိုဖြစ်ပေါ်စေခဲ့သည်။

အီရန်၏ တိုက်ခိုက်မှုများကိုအစ္စရေးက ကြားဖြတ်ဟန့်တားခြင်းသို့မဟုတ် ပစ်မှတ်များသို့မထိရောက်အောင် တားဆီးနိုင်ခဲ့သည်။

သို့ရာတွင်အဆိုပါတိုက်ခိုက်မှုအတွင်း အစ္စရေးတွင်ခုနစ်နှစ်အရွယ် မိန်းကလေးတစ်ဦး ကျည်ဆန်ထိမှန်ကာ ပြင်းထန်စွာ ဒဏ်ရာရရှိခဲ့ပြီးအခြား အရပ်သားများစွာလည်း ဒဏ်ရာအနည်းငယ် ရရှိခဲ့သည်။

အစ္စရေးတို့ကလည်းဇူလိုင်လတွင် အီရန်နိုင်ငံတီဟီရန်မြို့လယ်တွင်လေကြောင်းတိုက်ခိုက်မှုတစ်ခုပြုလုပ်ခဲ့ရာ ဟားမတ်စ်တို့၏နိုင်ငံရေးခေါင်းဆောင် ဖြစ်သူ Ismail Haniyeh သေဆုံးခဲ့ရသည်။ ပြီးခဲ့သည့်ရက်ပိုင်းကအီရန်တို့၏ အစ္စရေးနိုင်ငံအပေါ်ဒုံးကျည်များစွာဖြင့်ပစ်ခတ် တိုက်ခိုက်ခဲ့မှုသည် ဧပြီလအတွင်းကအစ္စရေးကိုတိုက်ခိုက်ခဲ့သည်ထက် ပိုမိုအဆင့်မြင့်သော ပဲ့ထိန်းဒုံးကျည်များပါဝင်ခဲ့ကြောင်း ပင်တဂွန်က ပြောကြားခဲ့သည်။

ကနဦး အစီရင်ခံစာများအရ အစ္စရေးသည် အမေရိကန်နှင့်အခြားသောမိတ်ဖက်အဖွဲ့အစည်းများ၏ တက်ကြွစွာ ပံ့ပိုးကူညီ မှုများဖြင့်အီရန်၏ တိုက်ခိုက်မှုကို ထိရောက်စွာ ချေမှုန်းနိုင်ခဲ့သည်ဟုဆိုသည်။

"အရှေ့အလယ်ပိုင်းက ပါဝါနှစ်နိုင်ငံ" အစ္စရေးသည်နျူကလီးယားလက်နက်ပိုင်ဆိုင်သည်ဟု ကျယ်ကျယ်ပြန့်ပြန့် ယုံကြည်ထားသော်လည်းခိုင်မာတိကျသောအထောက်အထားမရှိသည့်အပြင် ၎င်းတို့၏တည်ရှိမှုကို အသိအမှတ်ပြုခြင်းသို့မဟုတ် ငြင်းဆိုခြင်းလည်းမရှိသေးပေ။

အီရန်၏လေတပ်သည် ခေတ်မမီတော့သော လေယာဉ်များဖြင့်အားနည်းနေပြီး အစ္စရေးကို တိုက်ခိုက်ရန်အတွက် အဓိကနည်းလမ်းနှစ်ခုအဖြစ် ၎င်း၏ဒုံးကျည်အစီအစဉ်နှင့် ဒေသတွင်း ကျောထောက်နောက်ခံပြုအဖွဲ့ များကိုချထားခဲ့ခြင်းတို့ဖြစ်သည်။

ဝါရှင်တန်အခြေစိုက် အစိုးရမဟုတ်သောအဖွဲ့အစည်းတစ်ခုဖြစ်သည့် လက်နက်ထိန်းချုပ်ရေးအဖွဲ့က အီရန်၏ပဲ့ထိန်းဒုံးကျည်များသည် အကွာအဝေး ကီလိုမီတာ ၁၀၀၀ အထိ ပစ်ခတ်နိုင် ပြီး၊ တည်ဆောက်ဆဲအခြားဒုံးကျည်များသည် ကီလိုမီတာ ၂၅၀၀ အကွာအဝေးအထိ ပစ်မှတ်သို့ ရောက်ရှိနိုင်ကြောင်းပြောကြားခဲ့သည်။

၄င်းတို့တွင် အဆိုပါ တာဝေးပစ် ဒုံးကျည်များလက်ဝယ် ရှိနေပြီဟုအီရန် နိုင်ငံပိုင် မီဒီယာကလည်း ဖော်ပြသည်။ အဆိုပါ ဒုံးကျည်များသည် သမားရိုးကျဖောက်ခွဲရေးပစ္စည်းများ သို့မဟုတ် ဇီ၀ ၊ ဓာတု သို့မဟုတ် နျူကလီးယား ဒုံးကျည်များပါဝင်သော ထိပ်ဖူးများကိုသယ်ဆောင် နိုင်ပြီး ဒုံးကျည်အမျိုးအစားပေါ် မူတည်၍အကွာအဝေးနှင့် အမြန်နှုန်းကိုတွက်ချက်ပစ်လွှတ်နိုင်သည်။

အမေရိကန် အမျိုးသားထောက်လှမ်းရေး ညွှန်ကြားရေးမှူးရုံး၏ အဆိုအရ အီရန်သည် အရှေ့အလယ်ပိုင်းဒေသ တွင်ပဲ့ထိန်းဒုံးကျည် အရေအတွက် အများဆုံးပိုင်ဆိုင်ထားသည့်နိုင်ငံတစ်နိုင်ငံလည်းဖြစ်သည်။ ယခုအခါအရှေ့အလယ်ပိုင်းဒေသတွင်းရှိ လက်နက်အင်အားအတောင့်တင်းဆုံး၊ လက်နက်အင်အားကြီးနိုင်ငံနှစ်ခုသည် စစ်ပွဲအတွင်းသို့ တိုက်ရိုက်ပါဝင်လာခဲ့ကြသည်။ ထို့ကြောင့်လည်းအစ္စရေးနိုင်ငံအပေါ် အီရန်၏တိုက်ခိုက်မှုသည် အရှေ့အလယ်ပိုင်းတွင်ပိုမိုကျယ်ပြန့်သောစစ်ပွဲတစ်ခုဖြစ်လာမည်ကို စိုးရိမ်ပူပန်မှုများထပ်မံပေါ်ပေါက်လာခဲ့သည်။

"အီရန်၏တိုက်ခိုက်မှု အကျိုးဆက် ဘာတွေဖြစ်လာမလဲ" တိုက်ခိုက်မှု ၏အကျိုးဆက် အနေဖြင့် အစ္စရေးတို့က အီရန်အပေါ် ပြင်းပြင်းထန်ထန်လက်တုံ့ပြန်လာမည်ကိုအစ္စရေး၏ မဟာမိတ်ကြီး အမေရိကန် အနေဖြင့်လည်းစိုးရိမ်မှုများကြီးထွားလာခဲ့သည်။ ထို့ကြောင့်လည်းအမေရိကန်က အစ္စရေးတို့အနေဖြင့် အီရန်၏ နျူကလီးယားရှိရာ နေရာများကိုမတိုက်ခိုက်ဖို့ သတိပေးခဲ့၇သည်။

အီရန်၏ပဲ့ထိန်းဒုံးကျည်များဖြင့်တိုက်ခိုက်မှုကို လက်တုံ့ပြန်သည့်အနေဖြင့်အစ္စရေးက အီရန်၏ နျူကလီးယားစက်ရုံများကို တိုက်ခိုက်လာမည် ကို ဆန့်ကျင်ကြောင်းသမ္မတ ဂျိုးဘိုင်ဒင်က အောက်တိုဘာ(၂)ရက်က ထုတ်ဖော် ပြောကြားခဲ့ခြင်းဖြစ်သည်။

အစ္စရေးတို့တွင်လက်တုန့်ပြန်ပိုင်ခွင့် ရှိသော်လည်း ချင့်ချင့်ချိန်ချိန် လုပ်ဆောင်သင့်သည်ဟုဘိုင်ဒင်ကသတင်းထောက်များကို ပြောကြားခဲ့သည်။

ယခုအချိန်ကာလတွင် ဘိုင်ဒန်၏ အစိုးရသည်အရှေ့အလယ်ပိုင်းဒေသ တွင် ပိုမိုကျယ်ပြန့်သောစစ်ပွဲဖြစ်ပွားလာမည်ကိုရှောင်ရှားရန်အတွက် အသည်းအသန်ကြိုးစားနေ၇သည်။

အီရန်က အစ္စရေးသို့ပဲ့ထိန်းဒုံးကျည်များ ပစ်လွှတ်တိုက်ခိုက်ခဲ့မှုပြုလုပ်ခဲ့ခြင်းကြောင့် အစ္စရေးနှင့် အီရန်ကြားဖြစ်ပွားလာနိုင်သည့် စစ်ပွဲကို တားဆီးရန် လအတန်ကြာ အမေရိကန် ၏ ကြိုးပမ်းအားထုတ်မှုများသည် အမေရိကန်တို့အတွက် အခက်ခဲဆုံး စမ်းသပ်ခံ၇မှုတစ်ခု ဖြစ်လာခဲ့ သည်။

"အစ္စရေးအပေါ်အီရန် က ဒုံးကျည်ဖြင့်ပစ်ခတ် တိုက်ခိုက်မှုသည် လုံး၀လက်ခံနိုင်စရာမရှိကြောင်းနှင့်ကမ္ဘာတစ်ဝှမ်းလုံးက အီရန်ကို ရှုတ်ချသင့်ကြောင်း" အမေရိကန်နိုင်ငံခြားရေးဝန်ကြီး အန်တိုနီ ဘလင်ကင် သတင်းထောက်များအား ပြောကြားခဲ့သည်။

"အစ္စရေးတို့ကသာမဟုတ်ပါဘူး။ အမေရိကန်တို့ကလည်းအလွန်ပြင်းထန်တဲ့ တုံ့ပြန်မှုတွေကို ကြုံတွေ့ရလိမ့်မယ်ဆိုတာကို အီရန်တို့အနေနဲ့မျှော်လင့်ထားသင့်တယ်။ ပြီးတော့ အီရန်ကလည်း ဒါကို သိမှာပါ ” ဟုအကြမ်းဖက်မှု တန်ပြန်ရေး ကျွမ်းကျင်သူနှင့် လက်ဘနွန်နှင့် ဆီးရီးယားတို့အတွက်အိမ်ဖြူတော် အမျိုးသားလုံခြုံရေးကောင်စီ ဒါရိုက်တာဟောင်းဖြစ်သူ Hagar Chemali ကအီရန်ကိုသတိပေး ပြောကြားခဲ့သည်။

အစ္စရေးကို တိုက်ခိုက်ခဲ့မှုနှင့်ပတ်သက်ပြီးအမေရိကန်အနေဖြင့်ဝင်ရောက်စွက်ဖက်ခြင်းမပြုလုပ်ဖို့အီရန်က လည်းအမေရိကန်ကို တဖန်သတိပေးတုန့်ပြန်ခဲ့သည်။"အစ္စရေးကို တိုက်ခိုက်ခဲ့ ပြီးနောက် အီရန်ကိုဝင်ရောက်စွက်ဖက်ခြင်းမပြုလုပ်ရန်" အီရန်နိုင်ငံခြားရေးဝန်ကြီးဖြစ်သူ Araqchi ကအမေရိကန်ကို သတိပေးပြောကြားခဲ့သည်။

"အီရန် နှင့် အစ္စရေး ပဋိပက္ခ ၊ နိဂုံးချုပ် ကြမည်လား" အရှေ့အလယ်ပိုင်းပဋိပက္ခ များမြင့်တက်လာပြီး၊ ပိုမိုကျယ်ပြန့်လာမှုအပေါ် ကုလသမဂ္ဂအတွင်းရေးမှူးချုပ် အန်တိုနီယို ဂူတာရက်စ် က ရှုတ်ချခဲ့ပြီး အပစ်အခတ်ရပ်စဲရေးကိုလည်း၄င်းကထပ်လောင်း တောင်းဆိုခဲ့သည်။ " ဒါကို အခု ရပ်တန့်ရပါ မယ်” ဟုကုလသမဂ္ဂ အတွင်းရေးမှူးချုပ် က တိုက်တွန်းပြောဆို ခဲ့သည်။

အစ္စရေးအပေါ်၎င်းတို့၏တိုက်ခိုက်မှုကို အဆုံးသတ်လိုက်ပြီဖြစ်ကြောင်းအီရန်ကလည်း ပြောကြားခဲ့သည်။ "အစ္စရေးအစိုးရကနောက်ထပ် လက်တုံ့ပြန်ရန် ထပ်မံပြောဆို ခြင်း မပြုလုပ်ပါက မိမိတို့၏လုပ်ရပ်(တိုက်ခိုက်မှုများ)ကို နိဂုံးချုပ်ပါမည်" ဟုအီရန်နိုင်ငံခြားရေးဝန်ကြီး Araqchi က လူမှုကွန်ရက် X တွင် အောက်တိုဘာ(၂)ရက်က ပြောကြားခဲ့သည်။

အချုပ်ဆိုရရင်"တိုက်ခိုက်မှုတွေကိုရပ်တန့်ရပါမယ်” ဟု ကုလသမဂ္ဂ အတွင်းရေးမှူးချုပ် ကတိုက်တွန်းခဲ့သည့်အတိုင်း အီရန်နှင့်အစ္စရေးတို့၏တိုက်ခိုက်မှုများရပ်တန့်သွားမည်လား။ အမေရိကန်ကနျူကလီးယားရှိရာနေရာများကိုတိုက်ခိုက်မှုတွေမလုပ်ဖို့အစ္စရေးကိုသတိပေးခဲ့သည့်အတိုင်းအစ္စရေးကနားထောင်မည်လား၊အစ္စရေးကလက်တုံ့ပြန်ရန် ပြောဆိုတာတွေ ထပ်မလုပ်ပါက နိဂုံးချုပ်ပါမည်" ဟုအီရန်နိုင်ငံခြားရေးဝန်ကြီးပြောဆိုခဲ့သလို နိဂုံးချုပ်အဆုံးသတ်သွားမည်လား။သို့တည်းမဟုတ် နိုင်ငံတကာကစိုးရိမ်မှုများမြင့်တက်လာနေသည့်အရှေ့အလယ်ပိုင်းပဋိပက္ခဆက်လက်မြင့်တက်လာမည်လား။အီရန်၊အစ္စရေးစစ်ပွဲကြီးတစ်ခုဆီဦးတည်လာမည်လားဆိုသည်ကိုမူစောင့်ကြည့်၇မှာဖြစ်ကြောင်းပါ။

Source/နိုင်ငံတကာသတင်းများ