ချစ်အိလှိုင်

နိရဥ္စရာ၊ စက်တင်ဘာ ၁၁/ ၂၀၂၁

ယခုအပတ်အတွင်း ရွှေဈေးနှုန်းများတရိတ်ရိတ်မြင့်တက်လာခဲ့ရာမှ ယနေ့တွင် ၁၆ ပဲရည် ၁ ကျပ်သားကို ကျပ် ၁၉ သိန်း ၁ သောင်းအထိ တဟုန်ထိုး မြင့်တက်သွားသည်ဟု သတင်းရရှိသည်။

ယနေ့ စက်တင်ဘာလ ၁၁ ရက်နေ့ မွန်းတည့် ၁၂ နာရီနောက်ပိုင်းတွင် ၁၆ ပဲရည်ရွှေစင် ၁ ကျပ်သားကို ၁,၉၁၀,၀၀၀ ကျပ်အထိ မြင့်တက်သွားခဲ့သည်ဟု ရွှေဆိုင်ပိုင်ရှင်များက ပြောသည်။

စစ်တွေရှိ မြင့်မိုရ်ရိပ် ရတနာရွှေဆိုင်ပိုင်ရှင် ဒေါ်ခင်မေကျော်က “ဒီနေ့ နေ့လယ်မှ ဈေးတက်သွားတာပါ။ မနက်ကတော့ ၁၈ သိန်း ၅ သောင်းဈေးနဲ့ဈေးဖွင့်တာပေါ့။ ဒါပေမဲ့ ဝယ်သူတစ်ယောက်မှ မရှိပါဘူး။ ရွှေဈေးကွက် ဘယ်လိုဖြစ်မလဲမသိတော့ဘူး”ဟု ပြောသည်။

စစ်တွေရှိ လှိုင်ရတနာရွှေဆိုင်ပိုင်ရှင် ဦးမောင်လှတင်ကလည်း ယနေ့ ၁၆ ပဲရည် ၁ ကျပ်သားကို ၁၉ သိန်း ၁ သောင်းထိုးတက်သွားခဲ့သည်မှာ ဟုတ်မှန်သည်ဟု ဆိုသည်။

ယမန်နေ့ စက်တင်ဘာ ၁၀ ရက်နေ့ နံနက်ပိုင်းက ၁၆ ပဲရည် ၁ ကျပ်သားကို ၁,၈၀၂,၀၀၀ ကျပ်ခန့်ရှိခဲ့ရာမှ ယင်းနေ့ မွန်းတည့် ၁၂ နာရီနောက်ပိုင်းတွင် ၁,၈၅၀,၀၀၀ ကျပ်အထိ မြင့်တက်သွားခဲ့ကြောင်း သိ၇သည်။

ပြီးခဲ့သည့် သြဂုတ်လ ၁၇ ရက်နေ့တွင် ၁၆ ပဲရည် ရွှေ ၁ ကျပ်သားကို ၁,၆၅၀,၀၀၀ ကျပ်ရှိခဲ့ရာမှ ယနေ့အတွင်း တစ်ကျပ်သားကို ကျပ် ၃ သိန်းဝန်းကျင်အထိ တဟုန်ထိုး ထိုးတက်သွားခြင်းဖြစ်သည်ဟု ရွှေလုပ်ငန်းရှင်များက နိရဥ္စရာအား ပြောသည်။