ချစ်အိလှိုင်

နိရဥ္စရာ၊ မတ်လ ၈/ ၂၀၂၁

ရခိုင်ပြည်နယ်၊ မြေပုံမြို့နယ်၊ စညင်းကျေးရွာမှ စက်လှေပြုပြင်ရန် သစ်ခုတ်သွားသူတစ်ဦး ယနေ့ ညနေ ၃ နာရီ ၁၀ မိနစ်ခန့်တွင် လီသွန်တောင်အနီးတွင် မိုင်းနင်းမိ၍ ခြေထောက် တစ်ဖက် ဆုံးရှုံးသွားကြောင်း သတင်းရရှိသည်။

မိုင်းနင်းမိ၍ ခြေထောက်ပြတ်သွားသူမှာ ကိုစိုးနိုင်လင်း(ခ) ညီပုချေ(၂၆)နှစ်ဖြစ်သည်။

၄င်းမှာ စက်လှေဒေါက်တိုင် (ဒေသအခေါ်လောင်းဒဂုံ)အတွက် လိုအပ်သည့် သစ်ကို လီသွန်တောင် အနီးတွင် သွားခုတ်ရာမှ မိုင်းနင်းမိခြင်းဖြစ်ကြောင်း မိသာစုဝင်များက ပြောသည်။

ကိုစိုးနိုင်လင်း၏ ယောက္ခမ ဖြစ်သူ ဦးဖေသိန်းက “ လောင်းဒဂုံ(စက်လှေဒေါက်) သွားခုတ်တာမှာ မြေမြုပ်မိုင်းပေါက်တာပါ။ညာဖက်ခြေထောက် ပေါင်ရင်းက ပြတ်သွားပါတယ်။ အခုကမ်းထောင်းကြီး ဆေးရုံကိုသယ်လာတာပါ” ဟု ပြောဆိုသည်။

ကမ်းထောင်းကြီးမြို့မှ လူမှုရေးလုပ်ငန်းများကူညီလုပ်ကိုင်ပေးနေသူ ဦးဝင်းလှအောင်ကလည်း ၄င်းတို့ အနေဖြင့် လူနာကို ဆေးရုံသို့ ကူညီသယ်ဆောင်ပေးနေ၇ကြောင်းပြောသည်။

“ မိသားစုတွေလည်းအတူပါလာကြပါတယ်။ ပေါင်ကနေပြတ်ထွက်သွားတာပါ။ တစ်ခြား ဘယ်နေရာတွေ ဒဏ်ရာရသေးလည်း မကြည့်လိုက်၇ဘူး “ဟုပြောသည်။

လက်ရှိတွင် လူနာအား အရေးပေါ်ခွဲစိတ်ခန်းသို့ ပို့ဆောင်လိုက်ပြီဖြစ်ကြောင်း သိ၇သည်။