မြောက်ဦးမြို့တွင် အသက် ၈ဝအရွယ်မသန်စွမ်းအဖိုးအိုတစ်ဦးရေနစ်သေဆုံး

ချစ်အိလှိုင်

နိရဥ္စရာ၊ မေ ၃၀/ ၂ဝ၂၁

ရခိုင်ပြည်နယ်၊မြောက်ဦးမြို့ သင်္ဘောဆိပ်အနီးချောင်းထဲတွင် မေလ ၂၉ ရက် ညနေ ၅ နာရီခန့်က အသက် ၈ဝ အရွယ် မသန်စွမ်းအဖိုးအိုတစ်ဦး ရေနစ်သေဆုံးနေသည်ဟု သတင်းရရှိသည်။

သေဆုံးသူမှာ မြောက်ဦးမြို့နယ် လေညှင်းတောင်ကျေးရွာမှ ဦးမောင်ထွန်းစိန်(၈ဝ)နှစ်ဖြစ်ကာ ဝါးဖောင်လုပ်ငန်းတွင် အငှားလုပ်ကိုင်နေသူဖြစ်ကြောင်း သိရသည်။

လေညှင်းတောင်အုပ်စုအုပ်ချုပ်ရေးမှူး ဦး ဦးစောသန်းက“ ကျွန်တော်တို့သတင်းရတာတော့ ငါးနာရီ လောက်ကပါ။ သူက ခြေထောက်တစ်ဖက်မသန်ပေမယ့် ဆင်းရဲနွမ်းပါးတဲ့အတွက် ဆင်ချဆိပ်က သန်းမြင့်မောင်ဆိုတဲ့လူရဲ့ ဝါးဖောင်မှာ အငှားလိုက်ဖို့လိုက်သွားတာပါ။ ဒီနေ့သူ့အလောင်းကို သင်္ဘောဆိပ်အနီးက ရေထဲမှာ တွေ့တယ်လို့သိရပါတယ်” ဟုပြောသည်။

လက်ရှိတွင် အလောင်းအား မြောက်ဦးဆေးရုံသို့ပို့ဆောင်ထားပြီး မိသားစုဝင်များအား အသိပေးထားကြောင်း၊ ရဲတပ်ဖွဲ့အား ဆက်သွယ်ထားကြောင်း လည်း သူကဆက်ပြောသည်။

အဆိုပါကိစ္စနှင့် ပတ်သက်၍ မြောက်ဦးခရိုင်ရဲတပ်ဖွဲ့အား ဆက်သွယ်ရာ ဆက်သွယ်မှုမရရှိသေးပါ။

photo-Salar Kyaw Linn Hein