သံတွဲ သူဌေးချောင်းရေအားလျှပ်စစ်စီမံကိန်းတွင် ရေအနက်ပေဆင်းတိုင်းသည့် နေ့စားဝန်ထမ်း ၁ ဦး ရေနစ်သေဆုံး


သဥ္ဇာနွယ်
နိရဥ္စရာ၊ အောက်တိုဘာ ၁၁/ ၂၀၂၁
ရခိုင်ပြည်နယ်၊ သံတွဲမြို့နယ်ရှိ သူဌေးချောင်းရေအားလျှပ်စစ်စီမံကိန်းတွင် ရေအနက်ပေဆင်းတိုင်းသည့် နေ့စားဝန်ထမ်းအမျိုးသား ၁ ဦးရေနစ်သေဆုံးသွားကြောင်း သတင်းရရှိသည်။
သေဆုံးသွားသောသူမှာ သံတွဲမြို့နယ် ရွှေလှေကျေးရွာမှ ဦးချစ်စမ်းမောင် (၃၅ နှစ်)ဖြစ်သည်။
သူသည် အောက်တိုဘာ ၈ ရက် နံနက် ၉ နာရီတွင် အခြားနေ့စားဝန်ထမ်း ၁ ဦးနှင့်အတူ ချောင်းအတွင်းသို့ ရေအနက်ပေအားဆင်းတိုင်းနေစဉ် ရေလွှဲပေါက်မှ ရေစီးအားပြင်းထန်မှုကြောင့် နစ်မြုပ်သွားခဲ့ခြင်းဖြစ်သည်ဟု သိရသည်။
သံတွဲဆေးရုံအုပ် ဒေါက်တာ ရဲဝင်းထွန်းက “အလောင်းကတော့ ၉ ရက်နေ့ နေ့ခင်း ၃ နာရီကျော်လောက်မှာ ဆေးရုံကိုရောက်တာပါ။ သူက နေ့စားဝန်ထမ်းလို့တော ပြောသံကြားမိပါတယ်”ဟု ပြောသည်။
၎င်း၏ရုပ်အလောင်းအား အောက်တိုဘာလ ၉ ရက် နေ့လယ် ၂ နာရီခန့်တွင် သူဌေးချောင်းရေအားလျှပ်စစ်စီမံကိန်းအတွက် အသုံးပြုထားသော ရေနုတ်မြောင်းအနီး၌ တွေ့ရှိခဲ့ကြောင်း သိရသည်။

Share: