မင်းပြားမြို့နယ်တွင် ၇ တန်းကျောင်းသားတစ်ဦး မိုးကြိုးပစ်ခံရ၍ ထပ်မံသေဆုံး

ရေးသူ: Web Master
| ရက်စွဲ: ၁၇ အောက်တိုဘာ ၂၀၂၁
| ကြည့်ရှုသူ: 5.1k

အေးမြတ်ခိုင်

နိရဥ္စရာ၊ အောက်တိုဘာ ၁၆/၂ဝ၂၁

ရခိုင်ပြည်နယ်၊ မင်းပြားမြို့နယ်၊ ကြိမ်ချောင်းကျေးရွာတွင် မိုးကြိုးပစ်ခံရ၍ ၇ တန်းအရွယ်ကျောင်းသားတစ်ဦး ထပ်မံသေဆုံးခဲ့သည်ဟု သိရသည်။

သေဆုံးသူမှာ အသက် ၁၃ နှစ်အရွယ် (၇)တန်းကျောင်းသား မောင်တင်စိုးမင်းဖြစ်ကြောင်း သိရသည်။

သူသည် ယမန်နေ့ အောက်တိုဘာလ ၁၅ ရက် ညနေ ၄ နာရီခွဲခန့်တွင် ကျေးရွာအနီး လယ်ကွင်းတွင် ငါးရှာရန်သွားစဉ် မိုးကြိုးပစ်ခံရခြင်းဖြစ်သည်ဟု ဖခင်ဖြစ်သူ ဦးကျန်စိန်အောင်က နိရဥ္စရာကိုပြောသည်။

"ပစ်တာကတော့ ၄ နာရီလောက်ကပါ။ သိတာတော့ ၇ နာရီခွဲ ၈ နာရီလောက်မှ သိရပါတယ်"ဟု ပြောသည်။

သေဆုံးသူ၏ရုပ်အလောင်းအား ယနေ့ အောက်တိုဘာလ ၁၆ ရက်တွင် သင်္ဂြိုလ်မည်ဟု သိရသည်။

ရခိုင်တွင် အောက်တိုဘာလ ၂ ရက်မှ ၁၅ ရက်အထိ မိုးကြိုးပစ်မှုဖြစ်စဉ်များအတွင်း သေဆုံးသူ ၇ ဦးနှင့် ဒဏ်ရာရသူ ၂ ဦးရှိသွားပြီဖြစ်သည်။

မိုးကြိုးပစ်ခံရ၍ သေဆုံးသွားသူများမှာ ကျောက်တော်မြို့နယ်၊ ပေါက်တောကျေးရွာမှ ၁ ဦး၊ ခေါင်းတုတ်ကျေးရွာမှ ၁ ဦး၊ သံတွဲမြို့နယ် ရွာရှည်ကျေးရွာမှ သားမိသားဖ ၃ ဦး၊ မင်းပြားမြို့နယ် မြောင်ချောင်းကျေးရွာမှ ၁ ဦးနှင့် ကြိမ်ချောင်းကျေးရွာမှ ၁ ဦး၊ စုစုပေါင်း ၇ ဦးဖြစ်သည်။

ဒဏ်ရာရရှိသူများမှာ မင်းပြားမြို့နယ် မင်းရွာကျေးရွာမှ ၁ ဦးနှင့် သံတွဲမြို့နယ် ရွာရှည်ကျေးရွာမှ ၁ ဦးတို့ဖြစ်သည်။

ပြည်သူများအနေဖြင့် လျှပ်စီးလက်နေချိန်တွင် TV ဖွင့်ခြင်း၊ အင်တာနက်သုံးခြင်းများ၊ Wifi စက်များဖွင့်ထားခြင်း၊ ဖုန်းပြောခြင်းများ၊ လယ်ယာစိုက်ခင်းနှင့် ကွင်းပြင်နေရာများသို့သွားလာခြင်းများကို အထူးသတိထားရန်လိုအပ်ကြောင်း ရခိုင်ပြည်နယ်မိုးလေဝသနှင့် ဇလဗေဒညွှန်ကြားမှုဦးစီးဌာနက အကြံပြုထားသည်။

ဓာတ်ပုံ-ငယ်ငယ်