စစ်တွေသို့သယ်ဆောင်မည့် အိမ်ဆောက်ပစ္စည်းနှင့် ပျဉ်းကတိုးသစ်ခွဲသားများ တောင်ကုတ်တွင် ဖမ်းဆီးခံရ

သဥ္ဇာနွယ်

နိရဥ္စရာ၊ ဒီဇင်ဘာ ၇/ ၂၀၂၁

တောင်ကုတ်မြို့မှ စစ်တွေမြို့သို့ သယ်ဆောင်မည့် အိမ်ဆောက်ပစ္စည်းဖြစ်ကြသည့် ကျွန်းပြူတင်းတံခါး၊ တံခါးမကြီး၊ တံခါးရွက်ကျည်းပေါင်များနှင့် ပျဉ်းကတိုးသစ်ခွဲသားများကို  တရားဝင်အထောက်အထား မပြနိုင်ဟုဆိုကာ တောင်ကုတ်ဆိပ်ကမ်းတွင် ရဲက ဖမ်းဆီးလိုက်သည်ဟု သတင်းရရှိသည်။

ကုန်ချောအဖြစ်ထုတ်လုပ်ထားသည့် ကျွန်းပြူတင်းတံခါး ၇၆ ချပ်၊ တံခါးမကြီး ၁၃ ချပ်၊ တံခါးရွက် ကျည်းပေါင် ၁ဝ ထုပ်နှင့် ပျဉ်းကတိုးသစ်ခွဲသားဆိုဒ်စုံ ၇၉ ချောင်းတို့သည် ဒီဇင်ဘာလ ၅ ရက် ညနေ ၆ နာရီခွဲခန့်တွင် တောင်ကုတ်မြို့နယ် မှိုဟင်းတောကျေးရွာအနီး မလိခဆိပ်ကမ်း၌ ဖမ်းဆီ းခံလိုက်ရခြင်းဖြစ်သည်။

အဆိုပါသစ်များမှာ ၂ ဒသမ ၅၄ တန်ရှိပြီး ကာလတန်ဖိုး ကျပ် ၁ဝ သိန်းခန့်တန်ဖိုးရှိသည်ဟုလည်း သိရသည်။

ယင်းပစ္စည်းများသည် စစ်တွေမြို့ ကျေးပင်ကြီးရပ်ကွက်ရှိ ဦးရွှေမောင်ပိုင်ဆိုင်သော ရွှေပြည်မိုးအမည်ရှိ စက်လှေတွင် အခြားကုန်ပစ္စည်းများနှင့်အတူရောနှောတင်ဆောင်လာစဉ် ဖမ်းဆီးခံလိုက်ရခြင်းဖြစ်သည်ဟုလည်း သိရသည်။

စက်လှေပိုင်ရှင်ဦးရွှေမောင်၏သား ကိုစိုးဝေမောင်က “အခုက ကုန်ချောတွေ။ ပြီးတော့ အများကြီးလည်း မဟုတ်ဘူး။ စုစုပေါင်းမှ ၁၀ သိန်းဖိုး။ သစ်က ၂ တန်လောက်ဆိုတော့ ခံပြင်းနေပါတယ်”ဟု နိရ ဉ္စရာကိုပြောသည်။

အဆိုပါပစ္စည်းများကို တရားဝင်ထုတ်လုပ်မှု အထောက်အထားမပြနိုင်သောကြောင့် သစ်တောနှင့် ရဲတပ်ဖွဲဲ့ဝင်ပူးပေါင်းအဖွဲ့က သတင်းအရဖမ်းဆီးခြင်းဖြစ်သည်ဟု တောင်ကုတ်မြို့နယ် သစ်တောဦးစီးမှူး ဦးဇော်မင်းထွန်းက နိရဥ္စရာကို ပြောသည်။

“တောင်ကုတ်ကနေ စစ်တွေသွားတာမှာ ဖမ်းမိတာ။ သစ်သားတံခါးတွေကို တရားဝင်ထုတ်လုပ်မှု အထောက်အထားမပြနိုင်လို့ ဖမ်းတာ”ဟုပြောသည်။

အဆိုပါစက်လှေသည် တောင်ကုတ်မြို့နယ်မှ ဘူးသီးတောင်မြို့သို့ထွက်ခွာမည့်စက်လှေဖြစ်ပြီး အဆိုပါသစ်များကို ကုန်ပို့ကိုယ်စားလှယ်တစ်ဦးက လာရောက်တင်ဆောင်ခဲ့ခြင်းဖြစ်သည်ဟု စက်လှေပိုင်ရှင်ဦးရွှေမောင်၏သား ကိုစိုးဝေမောင်က ပြောသည်။

တရားဝင်အထောက်အထားပါ/မပါဆိုသည်မှာ အဆိုပါသစ်များအားလာရောက်တင်ဆောင်လာသည့်ကုန်ပို့ကိုယ်စားလှယ်နှင့် စက်လှေရှိ ပဲ့နင်းတို့နှစ်ဦး ဖမ်းဆီးခံထားရသည့်အတွက် အသေးစိတ်မသိရသေးဟုလည်း ဆိုသည်။

“အစ်ကိုတို့က ဥပဒေအရလည်း ဖြေရှင်းနေပါတယ်။ အဆင်ပြေသွားမယ်လို့လည်း မျှော်လင့်နေပါတယ်။ မှန်မှန်ကန်ကန်လည်း ဖြစ်စေချင်ပါတယ်”ဟု ပြောသည်။

အဆိုပါသစ်များနှင့်အတူဖမ်းဆီးခံထားရသူများမှာ စက်လှေပဲ့နင်းဖြစ်သူ စစ်တွေမြို့ ရွာကြီးမြောက်ရပ်ကွက်မှ ဦးတင်လှ (၅၁ နှစ်)နှင့် တောင်ကုတ်မြို့နယ် မှိုဟင်းတောကျေးရွာမှ ဦးတင်မောင်ဆင့် (၄၂ နှစ်)တို့နှစ်ဦးဖြစ်သည်။

ဓာတ်ပုံ - ရခိုင်နေ့စဉ်