ထက်အောင်

နိရဥ္စရာ၊ ဒီဇင်ဘာ ၃၀/ ၂၀၂၁

ရခိုင်ပြည်နယ်၊ မောင်တောမြို့နယ်၊ ဟာဘီ(အရှေ့)မူဆလင်ကျေးရွာတွင် ယနေ့တွင် မီးလောင်မှုဖြစ်၍ ဈေးဆိုင်ခန်း (၃)ခန်း ပျက်စီးဆုံးရှုံးသွားကြောင်း သိ၇သည်။

အဆိုပါကျေးရွာတွင် ယနေ့ ဒီဇင်ဘာလ ၃၀ ရက် ညဉ့် ၂ နာရီခန့်က မီးလောင်မှုတစ်ခု ဖြစ်ပွားခဲ့သည့်အတွက် ဆိုင်ခန်း (၃)ခန်း မီးလောင်ဆုံးရှုံးသွားခြင်းဖြစ်သည်ဟု မောင်တောမြို့နယ် မီးသတ်ဦးစီးမှူး ဦးထွန်းရွှေခိုင်က အတည်ပြုပြောကြားသည်။

“ ဖြစ်စဉ်ကတော့ မီးထွန်းတယ်။ ခြင်ဆေးခွေတွေထွန်းပြီးတော့ အိပ်ပါသွားတဲ့အခါ ဘေးမှာရှိတဲ့ စက္ကူတွေ၊ မုန့်ထည့်ထားတဲ့ ကတ်ထူပုံးတွေကနေလောင်ပြီး ဝါးထရံကိုကူးပြီးတော့ မီးလောင်သွားတာ” ဟု ပြောသည်။

ပျက်စီးဆုံးရှုံးသွားသည့် ဆိုင်ခန်းများမှာ ဝါးထရံကာအမျိုးအစားများဖြစ်ပြီး သွပ်မိုးထားသည့်ဆိုင် (၂) ဆိုင်နှင့် အုန်းမိုးထားသည့် ဆိုင် ၁ ဆိုင်တို့ဖြစ်ပြီး လူထိခိုက်သေဆုံးမှုမရှိကြောင်း သိ၇သည်။

ထိုဆိုင်ခန်းများမှာ ဘီဘီနော်ရိုး ပိုင်ဆိုင်သည့် ကုန်စုံဆိုင်၊ ဇော်ဟီးအာမတ် ပိုင်ဆိုင်သည့် ကုန်စုံဆိုင်နှင့် အာဘူဆီဒိတ် ပိုင်ဆိုင်သည့် လဖက်ရည်ဆိုင်တို့ဖြစ်သည်ဟု သိ၇သည်။

မီးလောင်မှုကြောင့် ဘီဘီရှောရှီး ကုန်စုံဆိုင်မှာ ခန့်မှန်ဆုံးရှုံးမှုတန်ဖိုး ကျပ် ၁၀ သိန်းခန့်၊ ဇော်ဟီးအာမတ် ကုန်စုံဆိုင်မှာ ခန့်မှန်းတန်ဖိုး ကျပ် ၅ သိန်းနှင့် အာဘူဆီဒိတ်ပိုင်ဆိုင်သည့် လက္ဖက်ရည်ဆိုင်မှာ ကျပ် ၃ သိန်း ခန့်ဆုံးရှုံးခဲ့ကြောင်း ရခိုင်နေ့စဉ်၏ လူမှုကွန်ရက်စာမျက်နှာတွင် ဖော်ပြထားသည်။

ရခိုင်နေ့စဉ်၏ ဆုံးရှုံးမှုတန်ဖိုး ဖော်ပြချက်နှင့်ပတ်သက်ပြီး မောင်တောမြို့နယ် မီးသတ်ဦးစီးမှူး ဦးထွန်းရွှေခိုင်က မဟုတ်မှန်ကြောင်း ငြင်းဆိုသည်။

“ဆုံးရှုံးမှုတန်ဖိုးကတော့ ၁ သိန်း ၅ သောင်း ၅ ထောင်ပါ”ဟု ပြောသည်။

အဆိုပါမီးလောင်မှုဖြစ်သည့်နေရာသည် မောင်တောမြို့နှင့် ရ မိုင်ခန့်ကွာဝေးပြီး လမ်းခရီးအခက်အခဲကြောင့် မီးသတ်ကားများသွားရန်အဆင်မပြေခဲ့သည့်အတွက် ရွာသားများ ဝိုင်းဝန်းမီးငြှိမ်းသတ်ခဲ့ရသည်ဟု သိ၇သည်။