သဥ္ဇာနွယ်

နိရဥ္စရာ၊ ဖေဖော်ဝါရီ ၁၀ / ၂၀၂၂

၇ခိုင်ပြည်နယ်တွင် ပေါက်တောမြို့နယ်တွင် စက်လှေတစ်စင်း၏ စက်ကော်ပလိန်ကြားတွင် ထမိန်စညှပ်၍ ခြေထောက်နှစ်ချောင်းစလုံးဝင်ပါသွားခဲ့သည့်အတွက် အမျိုးသမီး ၁ ဦးသေဆုံးသွားကြောင်း သိ၇သည်။

သေဆုံးသွားသူမှာ ပေါက်တောမြို့နယ်၊ ငရီချိုင်ကျေးရွာမှ ဒေါ်စိုးမေ (၆၂ နှစ်)ဖြစ်သည်။

သူမသည် ယနေ့ ဖေဖော်ဝါရီလ ၁၀ ရက်နေ့ နေ့လယ် ၁ နာရီခွဲခန့်တွင် စက်လှေတစ်စင်းဖြင့် စစ်တွေမှပေါက်တောသို့အပြန် ပေါက်တောမြို့နယ် တောင်းဖူးကျေးရွာအနီးတွင် လှိုင်းထန်၍ စက်လှေ၏ စက်ခန်းထဲသို့လိမ့်ကျသွားခဲ့သည်ဟု သိ၇သည်။

ယင်းသို့လိမ့်ကျသွားခဲ့ပြီးနောက် စက်၏ ကော်ပလိန်ကြားတွင် သူမ၏ထမိန်စညှပ်သွားခဲ့ရာမှတဆင့် ခြေထောက်နှစ်ချောင်းစလုံးဝင်ပါပြီး ပိုင်းပြတ်သွားခဲ့သည့်အတွက် သွေးထွက်လွန်၍ သေဆုံးသွားခဲ့ခြင်းဖြစ်သည်ဟု ပေါက်တောမြို့ခံ ကိုကျော်ကျော်ခိုင်က ပြောသည်။

“သားမင်္ဂလာပွဲအတွက် စစ်တွေက ပစ္စည်းတွေသွားဝယ်ပြီးအပြန် အနားကနေ ကစ္ဆပနဒီသင်္ဘောက ဖြတ်သွားတော့ လှိုင်းက ထသွားတယ်။ အဲ့ဒီအချိန်မှာ အဒေါ်က စက်နားကိုပြုတ်ကျသွားတာ။ အဲ့မှာ ထမိန်အစညှပ်သွားပြီး ခြေထောက်နှစ်ဖက်လုံးပါသွားတာ”ဟုပြောသည်။

လက်ရှိတွင် သူမ၏အလောင်းကို ပေါက်တောဆေးရုံတွင်ထားရှိထားပြီး မိသားစုများက အလွန်စိတ်မကောင်းဖြစ်နေကြသည်ဟု ကိုကျော်ကျော်ခိုင်က ပြောသည်။