ပိုးဝါ

နိရဥ္စရာ၊ မတ် ၄/ ၂၀၂၂

ရခိုင်ပြည်နယ်၊ မြောက်ဦးမြို့နယ် ပေါင်းတုပ်ရွာမ(မူဆလင်)ကျေးရွာတွင် အရက်သေစာသောက်စားမူးယစ်သူတို့က ဓားဖြင့်ခုတ်၍ ရွာတာဝန်ရှိသူ ၃ ဦး ထိခိုက်ဒဏ်ရာရရှိသွားကြောင်း သိ၇သည်။

အဆိုပါကျေးရွာအတွင်း မတ်လ ၃ ရက် ည ၈ နာရီခန့်က အရက်သေစာသောက်စားမူးယစ်ကာ သောင်းကျန်းဆဲဆိုနေသည့် ရွာသား ရ ဦးကို ရွာ၏ရာအိမ်မှူးဖြစ်သူ ဦးနော်ဂျုန်နှင့်အတူ ဦးကာလာနှင့် ဦးလှမောင်တို့က သွားရောက်ဟန့်တားရာမှ မူးယစ်ရမ်းကားနေသူတို့၏ ဓားဖြင့်ခုတ်ခြင်းကိုခံခဲ့ရသလို ရာအိမ်မှူးသည်လည်း လေးဂွဖြင့် ပစ်ခတ်ခံခဲ့ရကြောင်း သိ၇သည်။

ရာအိမ်မှူးဦးနော်ဂျုန်က “ပြင်ကသောက်လာကြပြီးတော့ ရွာကိုဝင်လာပြီး ရွာသားတွေကို ဆဲတယ်။ ကိုယ့်ပိုက်ဆံနဲ့ကိုယ်သောက်တာ ဘာညာပေါ့။ အဲ့ဒါကို စေတနာနဲ့ သွားဟန့်ကြလို့ ၂ ဦးလုံးကို ခုတ်တယ်”ဟု နိရဥ္စရာကို ပြောသည်။

ဓားခုတ်ခံရသူများမှာ ရာအိမ်မှူး၏သမက် ဦးကာလာ (၄၅)နှစ်နှင့် အစ်ကိုဖြစ်သူဦးလှမောင် (၅၅)နှစ်တို့ဖြစ်သည်။

ဓားခုတ်ခံရမှုကြောင့် ဦးကာလာ၏ဦးခေါင်းတွင် ဓားဒဏ်ရာရရှိခဲ့ပြီး ပုခုံးရိုးကျိုးသွားခဲ့ကာ ဦးလှမောင်၏ ဦးခေါင်းနှင့် လည်ပင်း၌ ဓားဒဏ်ရာရရှိခဲ့ကြောင်း သိ၇သည်။

လက်ရှိတွင် ၄င်းတို့ ၂ ဦးကို မြောင်းဘွေတိုက်နယ်ဆေးရုံတွင် တင်ထားကြောင်း သိ၇သည်။

ရာအိမ်မှူးဦးနော်ဂျုန်သည်လည်း လေးဂွဖြင့်ပစ်ခတ်ခံရမှုကြောင့် နှာခေါင်းတွင် ထိခိုက်ဒဏ်ရာရရှိခဲ့သည်ဟု သိ၇သည်။

ပေါင်းတုပ်ရွာမတာဝန်ခံ ဦးချောင်ရှုက “အရင်ကတော့ ရွာမှာ ဒီလိုမျိုးဖြစ်တာ မရှိဘူး။ မြောင်းဘွေရဲစခန်းမှာတော့ ညက အခုတ်ခံရတဲ့လူတွေကို စစ်ဆေးတယ်လို့ သိ၇တယ်”ဟု ပြောသည်။

ပြစ်မှုကျူးလွန်ခဲ့သည့် ဦးဟိုဆောင်(၄၀) နှစ်နှင့် ဦးမော်ဆီဒူလာ (၄၈)နှစ်တို့အပါအဝင် ရ ဦးတို့သည် လက်ရှိတွင် ထွက်ပြေးတိမ်းရှောင်နေကြပြီး ၄င်းတို့ကို မြောင်းဘွေရဲစခန်းတွင် တိုင်ကြားထားသည်ဟု သိ၇သည်။

အဆိုပါကျေးရွာတွင် အိမ်ခြေ ၁၃၀၀ ကျော်ရှိပြီး လူဦးရေ ၆ ထောင်ခန့်ရှိသည်ဟု သိ၇သည်။

---------------------