ဓားပြတိုက်ခံလိုက်ရသူမှာသက္ကယ်ကျင်းကျေးရွာ မူလတန်းကျောင်းမှ လက်ထောက်မူပြဆရာ ဦးဖေသိန်း (၂၇ နှစ်)ဖြစ်သည်။

သူသည် တာဝန်ကျနေသည့်ကျောင်းတွင်နေကာစာပြနေသူဖြစ်ပြီး ပြီးခဲ့သည့် စက်တင်ဘာလ ၈ ရက် ညဉ့် ၁နာရီကျော်တွင် ကျောင်းဆောင်အိပ်ခန်းအတွင်း တစ်ဦးတည်း အိပ်နေစဉ် မျက်နှာဖုံး စွပ်ထားသည့်လူ ၂ ဦးက ဓားရှည်များကိုင်ဆောင်ကာပြတင်းမှတဆင့် အိပ်ခန်းအတွင်းဝင်ရောက်ပြီး ဓားပြတိုက်သွားခြင်းဖြစ်သည်ဟုကာယကံရှင်ဆရာ ဦးဖေသိန်းကနိရဥ္စရာကိုပြောသည်။

“အဲဒီပြတင်းပေါက်ကဝင်တော့ ကျနော်လန့်ပြီးနိုးတော့ခြင်ထောင်ကြိုးကို ဓားနဲ့၊ ဓားဟာ ငှက်ကြီးတောင်လိုဓားတစ်လက်၊နောက်ပြီးတော့ ဒီကလူတွေအမြဲကိုင်ကြတဲ့ ဓားချွန် အဲလိုမျိုးတစ်လက်ပါ။အဲဒါတွေနဲ့ဝင်ပြီးတော့ ခြင်ထောင်ကြိုးကို ဖြတ်ပြီးတော့ကျနော့်ကိုနောက်ကတစ်ယောက်ဟာ လည်ပင်းမှာဓားတင်ပြီးတော့ ပိုက်ဆံအိတ်တွေပြခိုင်းတယ်။အားလုံးအိတ်တွေကို မွှေခိုင်းတယ်။ လက်စွပ်ကို ချွတ်ခိုင်းတယ်။သူတို့က ဒီဘက်က ဒေသခံ စကားပြောကြတယ်။ သူတို့ပြန်တဲ့အခါ ကျနော့်ကိုခေါင်းအုံးမှာ မှောက်ပြီး အိပ်ခိုင်းတယ်။ ကျနော်လည်း ကြောက်တော့ ထလို့တောင်မရောက်ခဲ့ဘူး။ သတိလစ်သလိုဖြစ်သွားတယ်”ဟု ပြောသည်။

ယင်းသို့ ဓားပြတိုက်ခံရမှုကြောင့်ဆရာဦးဖေသိန်းတွင် ၁၆ ပဲရည် ကျပ်ခွဲအလေးချိန်ရှိ ရွှေလက်စွပ်တစ်ကွင်းနှင့်ပိုက်ဆံ ၁ သိန်း ၂ သောင်းကျပ် ဆုံးရှုံးသွားသည်ဟု ဆိုသည်။

ဓားပြတိုက်ခံရပြီးနောက်ကျောင်းအုပ်ဆရာမကြီးအား ဖုန်းဆက်အကြောင်းကြားခဲ့ပြီး ကျောင်းအုပ်မှတဆင့်ရွာသားများကိုဆက်သွယ်အကြောင်းကြားခဲ့သည့်အတွက် ညဉ့် ၂ နာရီခန့်တွင်ရွာသားများရောက်ရှိလာခဲ့သည်ဟု သိ၇သည်။

အဆိုပါကျောင်းတွင် ကျောင်းအုပ်ဆရာမကြီး၁ ဦး၊ လက်ထောက်မူပြဆရာ၊ ဆရာမ ၃ ဦးရှိပြီး ကျောင်းအုပ်နှင့်ဆရာဦးဖေသိန်းတို့မှာ ကျောင်းတွင် တစ်ခန်းစီနေကာ စာပြ၍ ကျန် ၂  ဦးမှာဒေသခံများဖြစ်သည့်အတွက် ကျောင်းသို့ဆိုင်ကယ်ဖြင့်လာရောက် စာသင်ပြပေးလျက်ရှိသည်ဟု သိ၇သည်။

ယင်းနေ့ကကျောင်းအုပ်ဆရာမကြီးသည် မိခင်နေမကောင်း၍ ရွာပြန်သွားစဉ် ဆရာဦးဖေသိန်းတွင်ယခုကဲ့သို့ ဓားပြတိုက်ခံလိုက်၇ခြင်းဖြစ်သည်။

လက်ရှိတွင်ဆရာဦးဖေသိန်းသည် လုံခြုံရေးစိုးရိမ်ရ၍ သံတွဲမြို့ပေါ်ရှိလက်ထောက်မြို့နယ်ပညာရေးမှူး တစ်ဦး၏အခန်းသို့ယာယီပြောင်းရွှေ့နေထိုင်လျက်ရှိသည်ဟု ပြောသည်။

“လုံခြုံမှုကတော့ ကျနော့်အနေနဲ့တစ်ခုမှ မလုံခြုံသလိုတွေ့မိပါတယ်။ ကုန်ဈေးနှုန်းနဲ့ လစာနဲ့ကိုတွက်ကြည့်လိုက်မယ်ဆိုရင် တစ်နှစ်လုံးဝန်ထမ်းလုပ်လို့ ပိုက်ဆံ ၁ သိန်းမကျန်တဲ့အခြေအနေ ရှိပါတယ်။ အဲလိုအခြေအနေမျိုးမှာဒီလိုဒုက္ခခံပြီး မိသားစုနဲ့ဝေးကွာပြီးတော့ လာပြီး တာဝန်ထမ်းဆောင်နေတာ။ဒီမှာရောက်တော့ ဒီလိုပြဿနာဖြစ်တော့ ပိုပြီး ခံစား၇ပါတယ်။ အတတ်နိုင်ဆုံးပြည်နယ်က ပညာရေးမှူးတွေဆုံးဖြတ်ချက်တွေနဲ့ ကျနော်လည်းကိုယ့်မြို့နယ်၊ ကိုယ့်ရွာဘက်ကိုရောက်ချင်ပါတယ်”ဟု ပြောသည်။

လက်ရှိတွင်အဆိုပါဖြစ်စဉ်အား သံတွဲမြို့နယ် ဂျိတ္တောရဲစခန်းသို့တိုင်ကြားထားပြီး ရဲကစစ်ဆေးလျက်ရှိသည်ဟု သိ၇သည်။

ယခုကိစ္စနှင့်ပတ်သက်ပြီးဂျိတ္တောရဲစခန်းသို့ နိရဥ္စရာက ဆက်သွယ်ခဲ့သော်လည်း ဆက်သွယ်၍မ၇ခဲ့ပါ။

သက္ကယ်ကျင်းကျေးရွာမူလတန်းကျောင်းသည် ရွာ၏အနောက်ဘက်၊ သံတွဲမြို့နယ် ဂျိတ္တောကျေးရွာသို့ သွားသည့်လမ်းမအနီးတွင် တည်ရှိပြီးကျောင်းတွင် KG မှာGrade – 5 အထိကျောင်းသူ၊ ကျောင်းသားစုစုပေါင်း ၁၀ ဦးရှိသည်ဟု သိ၇သည်။

ဓားပြတိုက်ခံရသူဆရာဦးဖေသိန်းသည် အဆိုပါကျောင်းတွင် ပြီးခဲ့သည့် ၂၀၂၁ ခုနှစ်၊ နိုင်ဝင်ဘာလတွင်စတင်ပြောင်းရွှေ့တာဝန်ထမ်းဆောင်သူဖြစ်ပြီး ဇာတိမှာ ရသေ့တောင်မြို့နယ်ဖြူချောင်းကျေးရွာမှဖြစ်သည်။

ရခိုင်တွင်ယခုနောက်ပိုင်း ကျောင်းဆရာ၊ ဆရာမများလည်း လုံခြုံမှုကင်းမဲ့လျက်ရှိနေပြီး ပြီးခဲ့သည့် သြဂုတ်လ ၃၁ ရက်ကလည်း ကျောက်တော်မြို့နယ်ကွမ်းအုံချောင်း အထက်တန်းကျောင်း(ခွဲ)တွင် တာဝန်ထမ်းဆောင်နေသည့်ဆရာ၊ ဆရာမ ၂၁ ဦး၏လစာငွေကျပ်သိန်း ၃၀ ကျော်သည်လည်း လစာလာရောက်ထုတ်ယူလာသည့်ကျောင်းစာရေးမထံမှ အလုခံလိုက်၇သေးသည်။

အလားတူ ပြီးခဲ့သည့်ဇွန်လ ၁၆ ရက်ကလည်း မောင်တောမြို့နယ် သင်္ဘောလှကျေးရွာ မူလတန်းကျောင်းမှကျောင်းအုပ်ဆရာကြီးဦးဘိုဝင်းနှင့် လက်ထောက်ဆရာမ ဒေါ်ဥမ္မာကျော်တို့သည်လည်းလက်နက်ကိုင်တစ်စု၏ပြန်ပေးဆွဲခြင်းကိုခံလိုက်၇သည်။

မြန်မာကျပ်ငွေ သိန်း၁ ထောင်ကျော်တန်ဖိုးရှိ ဘင်္ဂလာငွေ တာကာ သိန်း ၅၀ လွှဲပေးလိုက်ပြီးမှသူတို့ ၂ ဦးကို ဇွန်လ ၂၃ ရက်တွင် ဘင်္ဂလားဒေ့ရှ်နိုင်ငံ၊တက္ကနပ်ဖ်မြို့နယ်၊ နီလာအုပ်စု၊ ခြံချောင်းကျေးရွာအနီး ပြန်လွှတ်ပေးခဲ့သည်။