နိရဥ္စရာ၊ အောက်တိုဘာ ၁၁/၂၀၂၂
၇ခိုင်ပြည်နယ် သံတွဲမြို့နယ် ငပလီမြို့တွင် အမှိုက်ပုံတစ်ခုအတွင်းမှ ဆာလာအိတ်ဖြင့်ထုပ်ပိုးထားသည့် ၂ ဒသမ ၆၆ ဘီလီယံခန့်တန်ဖိုးရှိသော စိတ်ကြွဆေးပြားများကို တွေ့ရှိသိမ်းဆည်းရမိခဲ့သည်ဟု သိရသည်။
ငပလီမြို့၊ ဂျိတ္တောရပ်ကွက်၊ အကွက်(၉)၊ မဒေးတောင်ရပ်တော်မူဘုရားအနီး အမှိုက်ပုံရှိ အဝါရောင်ဆာလာအိတ် ၂ အိတ်အတွင်းမှ WY/R စာတန်းပါ စိတ်ကြွဆေးပြားများကို ယမန်နေ့ အောက်တိုဘာလ ၁၀ ရက် ညနေ ၃ နာရီခန့်က ဘုရားဂေါပကအဖွဲ့ဝင်တစ်ဦးက တွေ့ရှိကာ ရဲတပ်ဖွဲ့သို့ အကြောင်းကြားခဲ့ခြင်းဖြစ်သည်ဟု သိရသည်။
ရဲတပ်ဖွဲ့က သွားရောက်စစ်ဆေးရာ အဆိုပါဆာလာအိတ် ၂ အတွင်းမှ WY/R စာတမ်းပါ လိမ္မော်ရောင်စိတ်ကြွရူးသွပ်ဆေးပြား ၁,၃၃၀,၀၀၀ ပြားအား ပိုင်ရှင်မဲ့ သိမ်းဆည်း၇မိခဲ့ပြီး ကာလတန်ဖိုးမှာ ကျပ် ၂ ဒသမ ၆၆ ဘီလီယံခန့်ရှိသည်ဟုလည်း သိရသည်။
ဂျိတ္တောနယ်မြေရဲစခန်းမှ တာဝန်ရှိသူတစ်ဦးက “မနေ့က မူးယစ်ဆေးတွေတွေ့တာမှန်ပါတယ်။ လက်ရှိအချိန်ထိ ဆက်စပ်တရားခံတွေတော့ မတွေ့သေးဘူး”ဟု ပြောသည်။
အဆိုပါစိတ်ကြွဆေးပြားများနှင့်ပတ်သက်၍ ဂျိတ္တောနယ်မြေရဲစခန်းတွင် မူးယစ်ဆေးဝါးအက်ဥပဒေပုဒ်မဖြင့် အမှုဖွင့်ထားပြီး ဆက်စပ်တရားခံများကို ဖမ်းဆီးရမိရေး ရဲတပ်ဖွဲ့က စုံစမ်းနေသည်ဟု သိ၇သည်။