စစ်တွေတွင်အမျိုးသမီးတစ်ဦး ကြိုးဆွဲချသေဆုံး၊ ၅ ရက်အတွင်း စစ်တွေမြို့တစ်ခုတည်းတွင် ကြိုးဆွဲချသေဆုံးသူ ၂ ဦးရှိ

နိရဥ္စရာ၊ အောက်တိုဘာ ၁၂/၂၀၂၂

ရခိုင်ပြည်နယ်၊ စစ်တွေမြို့တွင် ယမန်နေ့က နောက်ထပ်အမျိုးသမီးတစ်ဦး ကြိုးဆွဲချ သေဆုံးသွားခဲ့သဖြင့် ၅ ရက်အတွင်း စစ်တွေမြို့တွင် ကြိုးဆွဲချသေဆုံးသူ ၂ ဦးရှိသွားပြီဖြစ်သည်။

ယမန်နေ့ အောက်တိုဘာ ၁၁ ရက်က ကြိုးဆွဲချသေဆုံးခဲ့သည့် အမျိုးသမီးမှာ စစ်တွေမြို့၊ မင်းဂံအကွက် (၁၆)မှ အသက် ၅၃ နှစ်အရွယ် ဒေါ်မခင်နုဖြစ်ပြီး ယခု ၇ ရက်နေ့  ကြိုးဆွဲချ သေဆုံးသွားသည့် လူငယ်မှာ ရွာကြီးမြောက်ရပ်ကွက်မှ ကိုမောင်ဝင်းလှိုင် (၂၄ )နှစ်ဖြစ်သည်။

ဒေါ်မခင်နုသည် ယမန်နေ့ ည ၉ နာရီခွဲခန့်က နေအိမ်တွင် ကြိုးဆွဲချသေဆုံးနေသည်ကို သူမ၏အမျိုးဖြစ်သူကတွေ့မြင်ခဲ့ခြင်းဖြစ်သည်ဟု အလောင်းကိုသွားရောက်ကူညီပေးခဲ့သည့် ရွှေရောင်မေတ္တာဖောင်ဒေးရှင်းမှ သတင်းနှင့်ပြန်ကြားရေးတာဝန်ခံ ကိုသာဂီဖြိုးက နိရဥ္စရာသတင်းဌာနကိုပြောသည်။

“ညနေပိုင်းက သူ့သားနဲ့စကားများကြတယ်လို့ ကြားတယ်။ နောက် ထွေထွေထူးထူးကိစ္စတော့ မရှိဘူးပြောတယ်။ သူမကို ဒီကနေ့ သင်္ဂြိုလ်ပါတယ် ”ဟုပြောသည်။

စစ်တွေတွင် ယခု ကြိုးဆွဲချ သေဆုံးသူ ၂ ဦး အပါအဝင် ၅ လအတွင်းတွင် ကြိုးဆွဲချသေဆုံးသူ ၇ ဦးရှိသွားပြီဖြစ်ကာ အများစုမှာစီပွားရေးကျပ်တည်းမှုနှင့် သက်ဆိုင်သည်ဟု ဆိုသည်။

သူတို့ ၂ ဦး အပါအဝင် စစ်တွေမြို့နယ်တွင် ၅ လကျော်အတွင်း ကြိုးဆွဲချသေဆုံးသွားခဲ့သူ နောက် ၅ ဦးမှာ  စစ်တွေမြို့ မင်းဂံ ဝန်ထမ်းအကွက် (၃)မှ ဒေါ်ဥမ္မာခင်၊ စက်ရုံစုရပ်ကွက်မှ ဦးကျော်မြတ် (၃၀ နှစ်)၊ ဦးထွန်းသာစိန် (၅၈ နှစ်)၊ စစ်တွေမြို့နယ် ကန်ပြင်ကျေးရွာမှ ကိုထွန်းအေးကျော် (၂၁ နှစ်)နှင့် မယုယုလှိုင် (၁၈ နှစ်) တို့ဖြစ်ကြသည်။

ယခုနှစ် ၂၀၂၂  မေလမှ ယမန်နေ့ အောက်တိုဘာ ၁၁ ရက်အထိ ၅ လကျော်အတွင်းတွင် ကြိုးဆွဲချသေဆုံးသွားခဲ့သူ အရေအတွက်မှာ ၇ ဦးရှိသည်ဟုလည်း  စစ်တွေရှိ မေတ္တာရောင်ခြည်ဖောင်ဒေးရှင်းနှင့် ရွှေရောင်မေတ္တာဖောင်ဒေးရှင်းတို့၏ စာရင်းအရသိရသည်။

လက်ရှိရခိုင်တွင် အာဏာသိမ်းမှုဖြစ်စဉ်နောက်ပိုင်း အခြေခံစားသောက်ကုန်ဈေးနှုန်းများလည်း မြင့်တက်လျက်ရှိနေကာ လက်လုပ်လက်စားပြည်သူများအတွက် ဝင်ငွေနှင့်ထွက်ငွေမမျှသည့် အခြေအနေသို့ရောက်နေပြီး အကျပ်အတည်း ဒဏ်များကိုခံစားနေကြရသည့် အတွက်  စိတ်ကျမှုများ ခံစားရကာ မိမိကိုယ်ကို သေကြောင်ကြံစည်မှုများ များပြားလာနေသည်ဟု လူမှုရေးလှုပ်ရှားသူများက ဝေဖန်သုံးသပ်နေကြသည်။ (NN-3)