စစ်တွေတွင် လင်မယားရန်ဖြစ်ရာမှ ဇနီးဖြစ်သူဓားထိုးခံရ

နိရဉ္စရာ၊ နိုဝင်ဘာ ၈/၂၀၂၂

ရခိုင်ပြည်နယ်၊ စစ်တွေမြို့ ၊ ဆတ်ရိုးကျရပ်ကွက် အရှေ့ပိုင်းတွင် လင်မယားနှစ်ယောက်ရန်ဖြစ်ရာမှ ဇနီးဖြစ်သူ ဓားထိုးခံလိုက်ရသည်ဟု သတင်း ရရှိသည်။

ဓားထိုးခံရသူမှာ ဆတ်ရိုးကျရပ်ကွက် အရှေ့ပိုင်းနေ ဒေါ်ဦးစောခင် (၄၈)နှစ် ဖြစ်ပြီး ယနေ့နံနက် ၈ နာရီခန့်က ၎င်း၏ယောကျ်ားဖြစ်သူနှင့် စကားများရန်ဖြစ်ကြရာမှ လင်ယောကျ်ားဖြစ်သူက ဓားဖြင့်နှစ်ချက်ထိုးကာ ထွက်ပြေးသွားသည်ဟု သိရသည်။

 လူနာအားသွားရောက်သယ်ဆောင်ခဲ့သည့် ရွှေရောင်မေတ္တာဖောင်ဒေးရှင်းမှ သတင်းနှင့် ပြန်ကြားရေးတာဝန်ခံ ကိုသာကီဖြိုးက "မနေ့က အရက်မူးပြီးတော့ ရန်ဖြစ်ကြတယ် ပြောပါတယ်။ မနေ့ကညတုန်းကလည်း ဖြစ်ကြတယ်၊ ဒီနေ့မနက်ကလည်းဆက်ဖြစ်ကြပါတယ်။ ဒီနေ့မနက်က ဖြစ်တာမှာ မိန်းမရဲ့ ဘယ်ဘက်ရင်ဖက်ကို ဓားနဲ့ ထိုးခံလိုက်ရတာပါ။ ဒဏ်ရာကတော့နည်းနည်း ပြင်းပါတယ်။ ရင်ဘက်နားမှာဆိုတော့"ဟုပြောသည်။

လက်ရှိတွင် မိန်းမဖြစ်သူအား စစ်တွေဆေးရုံကြီးတွင် တင်ထားရပြီး ဓားထိုးခဲ့ပြီးနောက် လင်ယောင်္ကျားဖြစ်သူ ထွက်ပြေး ပျောက်ဆုံးနေကြောင်း သိရသည်။

စစ်တွေတွင် ယမန်နေ့ နိုဝင်ဘာလ ၇ ရက်ကလည်း ဓားဒဏ်ရာများဖြင့် သေဆုံးနေသည့် ပိုင်ရှင်မဲ့ အမျိုးသားအလောင်းတစ်လောင်းကို တွေ့ရှိခဲ့သလို  နိုဝင်ဘာ (၆) ရက်ကလည်း ပုဏ္ဏားကျွန်းမြို့နယ်၊ အောင်မြေကုန်း ကျေးရွာအနီးရှိ ချောင်းအတွင်းမှ တက္ကသိုလ်ကျောင်းသားတစ်ဦး၏ ရုပ်အလောင်းကို ဓားဒဏ်ရာများဖြင့် သေဆုံးကာ တွေ့ရှိခဲ့သည်။

နိုဝင်ဘာ (၃) ရက်နေ့က မင်းပြားမြို့တွင်လည်း ဒဏ်ရာဒဏ်ချက်များဖြင့် သေဆုံးနေသည့် ရုပ်အလောင်းတစ်ခုတွေ့ရှိခဲ့သည်။