နိရဥ္စရာ၊ဖေဖော်ဝါရီ ၇/၂၀၂၃ 

၇ခိုင်ပြည်နယ်၊ တောင်ကုတ်မြို့တွင်တစ်ပတ်အတွင်းဆိုင်ကယ်ကယ်ရီသမားနှစ်ဦး ရက်စက်စွာ အသတ်ခံခဲ့၇ပြီး ဆိုင်ကယ်များလုယက်ခံခဲ့ရကြောင်းသတင်းရရှိသည်။

ဖေဖော်ဝါရီ(၅) ရက်နေ့လယ် ၃ နာရီခန့်က တောင်ကုတ်မြို့ ချောင်းကောက်ရပ်ကွက်နေဆိုင်ကယ်သမား ဦးသောင်းမြင့်(၄၂နှစ်) ၏အလောင်းအား လည်ပင်းတွင် ကြိုးကွင်းစွတ်ကာ သတ်ဖြတ်ထားသည်ကို မောင်းချောင်း၀တွင် တွေ့ရှိခဲ့၇သည်။

ဖေဖော်ဝါရီ(၁) ရက်နေ့ နံနက်ပိုင်းကလည်းတန်းလွှဲရွာမတိုက်နယ်၊ ကျွန်းတောတောင်အနီး ချောင်းကမ်းနားတွင် ချောင်းကောက်ရပ်ကွက်မှ နောက်ထပ်ဆိုင်ကယ် ကယ်ရီမောင်းသူတစ်ဦး၏အလောင်းကို တွေ့ရှိခဲ့သည်ဟု မျက်မြင်ဒေသခံတစ်ဦးကပြောသည်။ 

သေဆုံးသူနှစ်ဦးလုံးမှာဆိုင်ကယ်ကယ်ရီမောင်းသူများဖြစ်ကြပြီး အလောင်းပြန်တွေ့ချိန်မှာ အလောင်းများ၏ လည်ပင်းတွင်ကြိုးကွင်းစွတ်ကာရက်ရက်စက်စက်အသတ်ခံထားရသည်ကို ပုံစံတူတွေ့ရှိ၇ကြောင်း ၎င်းက ဆက်လက်ပြောဆိုသည်။ 

ယမန်နေ့ကအလောင်းကို သွားရောက်ကြည့်ရှုခဲ့သည့် တောင်ကုတ်ဒေသခံတစ်ဦးက  "မနေ့ကလူကတော့ ကျနော်တို့ အုပ်ချုပ်ရေးမှူးနဲ့သွားကြည့်တဲ့အခါမနက် ၁၁နာရီခွဲလောက်က သေတယ်လို့ ခန့်မှန်းလို့၇တယ်။ အလောင်းကတော့ နေ့လယ် ၃ နာရီနီးပါးမှာတွေ့တယ်။အလောင်းမှာက လည်ပင်းမှာကြိုးစွတ်ပြီး တွေ့၇တာ။ အရင်တစ်ယောက်နဲ့ပုံစံတူပဲ"ဟု ပြောသည်။

ယမန်နေ့က သေဆုံးသွားသည့်ဦးသောင်းမြင့်သည် ကယ်ရီအငှားလိုက်ယင်း လမ်းခုလတ်တွင် အသတ်ခံခဲ့၇ခြင်း ဖြစ်သည်။ သူ၏ဆိုင်ကယ်ကို မောင်းလမ်းရန်မျိုးလမ်းတွင်mask တပ်ထားသည့်လူ ၄ ဦးတို့ယူသွားသည်ကိုမြင်လိုက်သူများရှိသည်ဟုလည်း အမည်မဖော်လိုသူတစ်ဦးက ပြောသည်။ 

 လက်ရှိမှာလက်လုပ်လက်စား ဆိုင်ကယ်ကယ်ရီသမားများအနေနှင့် အသက်အန္တာရယ်ကြားက ဘ၀ရပ်တည်ရေးအတွက်စိုးရိမ်ကြီးစွာလုပ်ကိုင်စားသောက်နေရသည်ဟု တောင်ကုတ်မြို့မှဆိုင်ကယ်ကယ်ရီသမားတစ်ဦးက ဆိုသည်။ 

"ပထမတစ်ယောက်မှာလည်းလည်ပင်းမှာ ကြိုးကွင်းစွတ်ပြီးပါတယ်။ မနေ့ကသေတဲ့ တစ်ယောက်မှာလည်း ဒီလိုပဲလည်ပင်းမှာကြိုးကွင်းစွတ်ပြီးပါတယ်။ နှစ်ယောက်လုံးဟာကယ်ရီသမားတွေကြီးပဲ။ ဒါဟာ ဆိုင်ကယ်ကိုလိုချင်လို့ ရက်ရက်စက်စက်ကိုသတ်သွားတာပါ။လူတွေကတော့  လိမ်ပြီး ကယ်ရီငှားပြီးမှ အခုလိုသတ်ပစ်တယ်လို့တော့ခန့်မှန်းကျတာပေါ့လေ။ အခြေအနေတွေကကြောက်ဖို့ကောင်းပါတယ်။"

ယခင်ကတောင်ကုတ်တွင် ယခုကဲ့သို့ဖြစ်စဉ်မျိုးမကြုံစဖူးရှားပါးပြီးဆက်တိုက်ဖြစ်ပွားလာသည့် ရာဇဝတ်မှုများကြောင့် ပြည်သူလူထုအနေနှင့်များစွာထိတ်လန့်နေရကာအိမ်မှာနေလျှင်တောင် မလုံခြုံသည့် အခြေအနေဖြစ်နေသည့်အတွက်သက်ဆိုင်ရာတာဝန်ရှိသူများအနေနှင့် ထိထိရောက်ရောက်ကိုင်တွယ် ဖြေရှင်းသင့်ကြောင်းသူက ဆက်ပြောသည်။ 

 "အရင်ကတောင်ကုတ်မြို့မှာ ဒီလိုဖြစ်စဉ်ဆိုတာ တော်တော်ရှားရှားပါးပါး။ အခုကတော့တော်တော်ကို ထူးဆန်းနေတဲ့အတွက်ကြောင့် ဒါတွေဟာလုပ်တဲ့လူတွေကလည်း ဘယ်လိုပြော၇မလဲ။ ငါတို့နောက်ကို ဘယ်သူမှလိုက်လို့မရဘူး။လုံခြုံတယ်။ စုံစမ်းမယ့်သူလည်းမရှိဘူး။ ငါတို့ လုပ်ချင်သလိုလုပ်လို့၇တယ်ဆိုတဲ့သဘောမျိုးတွေကြောင့် တောင်ကုတ်နေပြည်သူတွေဟာကိုယ့်အိမ်ထဲမှာ အိပ်နေရင်တောင်မှ မနည်းကိုသတိထားပြီး အိပ်၇မယ့်အခြေအနေကို ရောက်နေတယ်"ဟု ပြောသည်။

 လက်ရှိဖြစ်ပွားနေသည့်ကိစ္စများနှင့်ပတ်သက်၍တည်ငြိမ်နေသော တောင်ကုတ်မြို့တွင် အုပ်စုတစ်ခုကတမင်ပြဿနာများ ဖြစ်ပေါ်အောင် ဖန်တီးနေခြင်းဖြစ်သဖြင့် မြို့သူ့မြို့သားများအနေဖြင့် သတိထားသွားလာကြရန်လိုအပ်နေကြောင်း မြို့ခံတစ်ဦးကသုံးသပ် ပြောဆိုသည်။

 အဆိုပါ လူသတ်မှုများနှင့်ပတ်သက်၍ တောင်ကုတ်မြို့နယ်ရဲမှူးအောင်စောလှ နှင့် ဒုရဲမှူးဦးဇော်လတ်တို့အား အကြိမ်ကြိမ် ဖုန်းဖြင့် ဆက်သွယ်ခဲ့သော်လည်း ဖုန်းလက်ခံ ဖြေကြားခြင်း မရှိခဲ့ပါ။

 ရက္ခိုင့်တပ်တော် ပြောရေးဆိုခွင့်ရှိသူအား အဆိုပါအမှုကိစ္စနှင့်ပတ်သက်ပြီး ဆက်လက် မေးမြန်းနေဆဲဖြစ်ပါသည်။

 (NN-7)