စစ်တွေ မောင်နီပြင်ရွာတွင် ၉ တန်းကျောင်းသူ ၁ ဦး ကြိုးဆွဲချသေဆုံး

နိရဥ္စရာ၊ ဖေဖော်ဝါရီ ၂၅ / ၂၀၂၃

ရခိုင်ပြည်နယ်၊ စစ်တွေမြို့နယ်၊ မောင်နီပြင်ကျေးရွာတွင် ယနေ့ ဖေဖော်ဝါရီလ ၂၅ ရက်၊ နေ့လယ်ပိုင်းက ၉ တန်းကျောင်းသူ ၁ ဦး ကြိုးဆွဲချအဆုံးစီရင်မှုဖြစ်ပွားခဲ့ကြောင်း သတင်းရရှိသည်။
ထိုသို့ သေဆုံးသွားသူမှာ မောင်နီပြင်ကျေးရွာမှ ဦးငလုံးချေ၏သမီး မဖြိုးနွယ်ဦး(ခ) မိနီမ (၁၇)နှစ်ဖြစ်ကြောင်း သိရသည်။

၄င်း၏နေအိမ်တွင် ကြိုးဆွဲချသေဆုံးနေသည့်အလောင်းကို ယနေ့ နေ့လယ် ၁ နာရီခန့်တွင် မိသားစုဝင်များက တွေ့ရှိခဲ့ကြောင်း ရွှေရောင်မေတ္တာဖောင်ဒေးရှင်းက သတင်းနှင့်ပြန်ကြားရေးတာဝန်ခံ ကိုသာဂီဖြိုးက ပြောသည်။

"အခုအလောင်းကိုကျွန်တော်တို့ သွားသယ်ပြီး ဆေးရုံကြီးကို ပို့လိုက်ပါပြီ" ဟု ပြောသည်။
သေဆုံးသူမဖြိုးနွယ်ဦးမှာ စနစ်သစ် ၉ တန်းကျောင်းသူဖြစ်ပြီး ယနေ့နံနက်က သူ၏မိဘများအချင်းချင်း စကားများရန်ဖြစ်ပြီးသည့်နောက်တွင် ကြိုးဆွဲချ၍ အဆုံးစီရင်မှုဖြစ်ပွားခဲ့ခြင်းဖြစ်ကြောင်းသူက ဆက်ပြောသည်။
"ကျွန်တော်တို့သိရသလောက်တော့ သူ့မိဖတွေ စကားများရန်ဖြစ်လို့ အခုလိုလုပ်သွားတာလို့ သိရပါတယ်"ဟု ပြောသည်။
ရခိုင်ပြည်နယ်၊ စစ်တွေမြို့နယ်တွင် ပြီးခဲ့သည့် ၂၀၂၂ ခုနှစ်၊ မေလမှ အောက်တိုဘာလအတွင်း ကြိုးဆွဲချသေဆုံးသူ ၇ ဦးအထိရှိခဲ့ကြောင်း လူမှုကယ်ဆယ်ရေးအသင်းများ၏ စာရင်းမှတ်တမ်းများအရ သိရသည်။ (NN-23)

 ဓာတ်ပုံ - ရွှေရောင်မေတ္တာဖောင်ဒေးရှင်း