နိရဥ္စရာ၊ မတ် ၆/ ၂၀၂၃

ရခိုင်ပြည်နယ်၊ စစ်တွေမြို့၊ ရွာကြီးမြောက်ရပ်ကွက်ရှိ စျေးဆိုင်ခန်းထဲတွင် သေဆုံးနေသော အမျိုးသားအလောင်း ၁ လောင်းကို ယနေ့ နံနက်ပိုင်းက တွေ့ရှိခဲ့သည်ဟု သိရသည်။

အဆိုပါသေဆုံးနေသည့် အမျိုးသားအလောင်းမှာ စစ်တွေမြို့၊ အုန်းတစ်ပင်ရပ်ကွက်မှ အသက်(၃၈)နှစ်အရွယ် ကိုအောင်မျိုးဆန်းဖြစ်သည်ဟု သိရသည်။

ယင်းသေဆုံးနေသည့်အလောင်းကို ယနေ့ မတ်လ ၆ ရက်၊ နံနက် ၆ နာရီကျော်အချိန်က တွေ့ရှိခြင်းဖြစ်သည်ဟု အလောင်းအားသွားရောက်ကူညီသယ်ဆောင်ပေးသည့် ရွှေရောင်မေတ္တာဖောင်ဒေးရှင်မှ ကိုဗျာလက ပြောသည်။

"ဘာဒဏ်ရာမှလည်းမရှိဘဲ ဒီအတိုင်းသေဆုံးနေတာပါ" ဟု ပြောသည်။

မည်သည့်အတွက်ကြောင့် သေဆုံးသွားသည်ကို မသိရသေးဟုလည်း ဆက်ပြောသည်။

"ညည့်အချိန်ကနေသေနေတာလို့ယူဆရတယ်။ မိသားစုတွေနဲ့တော့ အဆက်အသွယ်ရပါတယ်။ အရက်နည်းနည်းပါးပါးသောက်တတ်တယ်လို့တော့ ပြောတယ်" ဟု ပြောသည်။

လက်ရှိတွင် အလောင်းအား စစ်တွေမြို့၊ ပြည်သူ့ဆေးရုံကြီးရှိ ရင်ခွဲရုံသို့ပို့ဆောင်ထားပြီး သေဆုံးသွားသည့် ကိုအောင်မျိုးဆန်းတွင် သား ၂ ဦးရှိသည်ဟုလည်း သိရသည်။

စစ်တွေတွင် ပြီးခဲ့သည့်ဖေဖော်ဝါရီ ၂၂ ရက်၊ ည ၉ နာရီခွဲခန့်ကလည်း စစ်တွေတစ်မြို့လုံးကို ရေဖြန့်ဝေပေးနေသည့် ကန်တော်ကြီး ကန်ဘောင်၌ အမည်မသိ အသက် ၂၀ မှ ၃၀ ဝန်းကျင်ကြားရှိ အမျိုးသားတစ်ဦး၏အလောင်းကိုတွေ့ရှိခဲ့သည်။ (NN-12)

ဓာတ်ပုံ - ရွှေရောင်မေတ္တာဖောင်ဒေးရှင်း