နိရဥ္စရာ ၊ မတ် ၁၄/ ၂၀၂၃

ရခိုင်ပြည်နယ်၊ ဘူးသီးတောင်မြို့နယ်၊ ဒုပြင်ရှည်ကျေးရွာအုပ်စု၊ ကျိန်ကျောင်ကျေးရွာရှိ ဦးမောင်သိန်းညွန့်၏ နေအိမ်မှ ရွှေအချိန် ၈ ကျပ်သားနှင့် ငွေကျပ်သိန်း  ၅၀ ကျော် ခိုးယူခံခဲ့ရကြောင်း နေအိမ်ပိုင်ရှင်က ပြောသည်။

အဆိုပါနေအိမ်တွင် မိသားစုများ အိပ်နေချိန် ယမန်နေ့ မတ်လ ၁၃ ရက်၊ ညဉ့်အချိန်နှင့် မတ်လ ၁၄ ရက်၊ ယနေ့မနက်အစောကြီးတွင် ခိုးယူသွားခြင်းဖြစ်နိုင်ကြောင်း ဦးမောင်သိန်းညွန့်က နိရဥ္စရာသို့ပြောသည်။

"ဘယ်အချိန်မှာ ခိုးသွားတယ်ဆိုတာတော့ အတိကျမသိရပါ။ သေတ္တာက အလယ်ခန်းထဲမှာထားတယ်။ အဲဒါကို သေတ္တာလိုက်ထမ်းပြီး ခိုးယူသွားတာပါ"ဟု ပြောသည်။

ယင်းသေတ္တာထဲတွင် ရွှေအချိန် ၈ ကျပ်သားနှင့် ငွေကျပ်သိန်း ၅၀ ကျော်အပါအဝင် အိမ်ထောင်စုစာရင်း၊ ရွှေဝယ်ဘောင်ချာများနှင့် အရေးကြီးသည့်စာရွက်စာတမ်းများပါသွားကြောင်း ဦးမောင်သိန်းညွန့်က ပြောသည်။

ထိုသို့ ခိုးယူခံရသည့် သေတ္တာထဲတွင် တရုတ်နိုင်ငံတွင် ရွှေ့ပြောင်းအလုပ်သမားအဖြစ်လုပ်ကိုင်နေသည့် သားနှစ်ဦးထံမှ ပို့ပေးနေသည့် ငွေများဖြင့်ဝယ်ယူစုဆောင်းထားသည့် ရွှေသားနှင့် ငွေများထားရှိကြောင်း သူက ပြောသည်။

"ကျနော်တို့က ရွာမှာတစ်ပိုင်တစ်နိုင်လေးနွားမွေးပြီး စားသောက်နေတာပါ။ အခုခိုးခံရတဲ့ ရွှေနဲ့ ပိုက်ဆံတွေကလည်း တရုတ်မှာအလုပ်လုပ်နေတဲ့ သားတွေထည့်ပေးတဲ့ပိုက်ဆံနဲ့ ဝယ်ယူစုဆောင်းထားတာပါ" ဟု ပြောသည်။

အဆိုပါ ဦးမောင်သိန်းညွန့်တို့မိသားစုမှာ ရသေ့တောင်မြို့နယ်၊ ရေစိုးချောင်းကျေးရွာဇာတိဖြစ်ပြီး ရက္ခိုင့်တပ်တော်(AA)နှင့် မြန်မာစစ်တပ်တို့ တိုက်ပွဲပြင်းထန် ဖြစ်ပွားခဲ့သည့် ၂၀၁၉ ခုနှစ်တွင် ကျိန်ကျောင်ကျေးရွာတွင် လာရောက် ခိုလှုံနေခြင်းဖြစ်ကြောင်း သိရသည်။

လက်ရှိတွင် ခိုးယူခံရမှုနှင့်ပတ်သက်၍ ULA/AA နယ်မြေခံအရာရှိများကို တိုင်ကြားထားပြီး မရှိမဲ့ရှိမဲ့စုဆောင်းထားသည့် ပစ္စည်းများဖြစ်သည့်အတွက် အမှုမှန်ပေါ်ပေါက်စေလိုကြောင်း နေအိမ်ပိုင်ရှင်ဦးမောင်သိန်းညွန့်က နိရဥ္စရာသို့ ပြောသည်။ (NN-23)