တောင်ကုတ်တွင် ၃ နှစ်အရွယ်ကလေးငယ် ၁ ဦး ရေနစ်သေဆုံး

တောင်ကုတ်တွင် ၃ နှစ်အရွယ်ကလေးငယ် ၁ ဦး ရေနစ်သေဆုံး

နိရဥ္စရာ၊ မေ ၅ / ၂၀၂၃

ရခိုင်ပြည်နယ်၊ တောင်ကုတ်မြို့ နယ် ၊ ရေလယ်ကျွန်းကျေးရွာမှ ဦးဇော်မင်းလွင်၏သား အသက် (၃)နှစ်အရွယ် မောင်ဟိန်းမျိုးကျော် (ခေါ်) ငလုံးစိသည် ရေနစ်သေဆုံးသွားသည်ဟု သိရသည်။

သူသည် ယမန်နေ့ မေလ ၄ ရက်၊ ညနေ ၄ နာရီခန့်က ရွာအနီးရှိ တောင်ကုတ်ချောင်းထဲပြုတ်ကျကာ ပျောက်ဆုံးနေခြင်းပြီး အလောင်းကို ယနေ့ မေလ ၅ ရက်၊ နံနက်ပိုင်းတွင် နတ်မော်ကျေးရွာအနီး ချောင်းထဲ၌ တွေ့ရှိခဲ့ကြောင်း ကလေးငယ်နှင့်အိမ်နီးချင်း အမျိုးသားတစ်ဦးက နိရဥ္စရာသို့ပြောသည်။

"မနေ့က ညနေပိုင်းလောက်က ပျောက်နေတာပါ။ ဒီနေ့မနက်ပိုင်းမှာ အလောင်းကို နတ်မော်ကျေးရွာနားက ချောင်းထဲမှာပြန်တွေ့တာပါ" ဟု ပြောသည်။

ယမန်နေ့ ညနေပိုင်းက ကလေးငယ်၏ ဖခင်ဖြစ်သူမှာ အိမ်တွင် ရေတုံကင်ပြုပြင်နေရာ ပစ္စည်းကိရိယာများပျောက်သွားမည်စိုး၍ ကလေးငယ်များကို အနီးအနားတွင် မနေရန် မောင်းထုတ်လိုက်မိရာမှ မောင်ဟိန်းမျိုးကျော်သည် ပျောက်ဆုံးသွားခြင်းဖြစ်ကြောင်း သူက ဆက်ပြောသည်။

ယခုရေနစ်သေဆုံးသွားသူ မောင်ဟိန်းမျိုးကျော်တွင် မွေးချင်းမောင်နှမ ၇ ဦးရှိပြီး ၄င်းမှာ အငယ်ဆုံးသားဖြစ်သည်။

ကလေးငယ်၏ ဖခင်ဖြစ်သူ ဦးဇော်မင်းလွင်မှာ လက်သမားလုပ်ငန်းနှင့် အသက်မွေး ဝမ်းကျောင်းပြုနေသူဖြစ်သည်။

ယခုကဲ့သို့နွေခေါင်ခေါင်တွင် ရေနစ်သေဆုံးမှုများ ဖြစ်ပေါ်လျက်ရှိရာ မိုးတွင်းရာသီတွင် ပိုမိုဖြစ်ပွားလာနိုင်သောကြောင့် မိဘအုပ်ထိန်းသူများအနေဖြင့် ကလေးငယ်များကို အထူးဂရုစိုက်ပြီး မြစ်ချောင်းအင်းအိုင်များသို့ လုံးဝမသွားနိုင်ရန် စောင့်ကြပ်ကြည့်ရှုဖို့ လိုအပ်နေကြောင်း မြို့ခံများက ပြောဆိုကြသည်။

ပြီးခဲ့သည့် ၂၀၂၁ ခုနှစ်၊ ဇွန်လ ၁၃ ရက်ကလည်း တောင်ကုတ်မြို့နယ် တန်းလွဲရွာမမြို့တွင် ၈ တန်းကျောင်းသူတစ်ဦး ရေနစ်သေဆုံးခဲ့သည်ဟု သိရသည်။ (NN-23)