စစ်တွေတွင် ရေနစ်မြုပ်ပျောက်ဆုံးသွားသည့် သင်္ဘောသား ၃ ဦးလုံး၏ရုပ်အလောင်းများအား ရှာဖွေတွေ့ရှိ

ရခိုင်ပြည်နယ်၊ စစ်တွေမြို့တွင် ရေနစ်မြုပ်ပျောက်ဆုံးသွားသည့်သင်္ဘောသား ၃ ဦးစလုံး၏ ရုပ်အလောင်းအား ရှာဖွေတွေ့ရှိခဲ့ပြီဟု သိရသည်။

ရှာဖွေတွေ့ရှိခဲ့သည့် ရုပ်အလောင်းများမှာ ရန်ကုန်မှ စစ်တွေသို့ ပစ္စည်းများလာပို့သည့် အမ်ဗွီရာဇာမင်းကုန်သင်္ဘောမှ သင်္ဘောသားများဖြစ်သော ကိုသက်ပိုင်ဦး၊ ကိုသန့်ဇင်နှင့် ကိုချစ်မင်းပိုင်တို့ဖြစ်ကြသည်။

ယမန်နေ့၊ ဇူလိုင်လ ၁ ရက်နှင့် ဇွန်လ ၃ဝ ရက်တို့တွင် စစ်တွေမြို့နယ်ရှိ ချောင်းနွယ်မင်းဂံချောင်း အတွင်း တွေ့ရှိခဲ့ခြင်းဖြစ်သည်ဟု အလောင်းအား သွားရောက်ကူညီသယ်ဆောင်ပေးခဲ့သည့် ရွှေရောင်မေတ္တာဖောင်ဒေးရှင်းမှ သတင်းနှင့်ပြန်ကြားရေးတာဝန်ခံ ကိုသာဂီဖြိုးက နိရဥ္စရာကို ပြောသည်။

“သုံးယောက်လုံးကိုတွေ့ပါပြီ။ ထိခိုက်ဒဏ်ရာတွေတော့ မတွေ့ဘူး။ ရေနစ်ထားတော့ ရောင်းကိုင်း နေတာတော့ရှိတယ်”ဟု ပြောသည်။

သူတို့ ၃ ဦးအနက် ကိုချစ်မင်းပိုင်ကို ယမန်နေ့ ဇူလိုင်လ ၁ ရက်၊ နံနက်ပိုင်းတွင် တွေ့ရှိခဲ့ခြင်းဖြစ်ပြီး ကိုသက်ပိုင်ဦးနှင့် ကိုသန့်ဇင်တို့ကို ဇွန်လ ၃ဝ ရက်၊ နံနက်နှင့် နေ့လယ်တို့တွင် တွေ့ရှိခဲ့ခြင်းဖြစ်သည်။

သူတို့ ၃ ဦးသည် ဇွန်လ ၂၈ ရက်၊ ညနေ ၅ နာရီခန့်က စစ်တွေမြို့မှ ပစ္စည်းအချို့ဝယ်ယူပြီး ချောင်းနွယ်မင်းဂံဆိပ်ကမ်း၌ဆိုက်ကပ်ထားသည့် အမ်ဗွီရာဇာမင်းသင်္ဘောပေါ်သို့ လောင်းလှေဖြင့် ပြန်လာစဉ် ချောင်းနွယ်မင်းဂံချောင်းအတွင်း လှေမှောက်ကာ ရေနစ်မြုပ်ပျောက်ဆုံးသွားခဲ့ကြခြင်း ဖြစ်သည်ဟု မေတ္တာရောင်ခြည်ဖောင်ဒေးရှင်းမှ အတွင်းရေးမှူး ကိုသားချေက ပြောသည်။ (NN-16)

ဓာတ်ပုံ - ရွှေရောင်မေတ္တာဖောင်ဒေးရှင်း