ကျောက်ဖြူတွင် အမျိုးသားတစ်ဦး ဒဏ်ရာများဖြင့် သေဆုံးလျက်တွေ့ရှိ

ရခိုင်ပြည်နယ်၊ ကျောက်ဖြူမြို့တွင် အသက်(၃၀)ကျော်အရွယ် ဦးခင်မောင်ရီ ဆိုသူအား ယနေ့နံနက် ဒဏ်ရာများဖြင့် သေဆုံးလျက် တွေ့ရှိခဲ့သည်ဟု သိရသည်။

သူ့ကို ယနေ့ဇူလိုင်လ ၁၇ ရက်၊ နံနက် ၉ နာရီကျော်ခန့်က ကျောက်ဖြူမြို့၊ ကုလားဘာတောင်ရပ်ကွက်၊ သီဟိုဠ်တောလမ်းဘေးရှိ ရေမြောင်းတွင် ခန္ဓာကိုယ်၌ ထိခိုက်ဒဏ်ရာများဖြင့်သေဆုံးနေသည်ကို တွေ့ရှိခဲ့ခြင်းဖြစ်သည်ဟု အလောင်းအား သွားရောက်သယ်ဆောင်ပေးခဲ့ရာတွင် ပါဝင်သူတစ်ဦးက ပြောသည်။

"သူက အိုးမဲ့အိမ်မဲ့တစ်ယောက်ပါ။ ကျွန်တော်တို့ရောက်သွားတော့ အလောင်းကို တာဝန်ရှိသူတွေက အိတ်အမဲနဲ့ဖုံးထားလို့ ဘယ်လိုဒဏ်ရာတွေပါလဲဆိုတာ မသိလိုက်ရပါဘူး။ ဒါပေမဲ့ အနီးအနားဝန်းကျင်က မြင်လိုက်ရသူတွေ ပြောတာကတော့ ထိခိုက်ဒဏ်ရာတွေပါတယ်လို့ပြောတယ်" ဟု ပြောသည်။

မည်သည့်အတွက် သေဆုံးသွားသည်ကို အရပ်သားများအနေဖြင့် သေချာမသိရသေးဟုဆိုသည်။

လက်ရှိတွင် အလောင်းအား ကျောက်ဖြူမြို့၊ ပြည်သူ့ဆေးရုံရှိ ရင်ခွဲရုံသို့ပို့ဆောင်ထားကြောင်း သိရသည်။ (NN-12)

ဓာတ်ပုံ - လေးဝတီကုက္ခိတပရဟိတအသင်း