၇ခိုင်ပြည်နယ်၊ပေါက်တောမြို့တွင် ယခုနှစ်အတွင်း ဖောက်ထွင်းခိုးယူမှုများ မကြာခဏဖြစ်ပေါ် နေကြောင်း ဒေသခံများက ပြောသည်။

ပြီးခဲ့သည့် ဇူလိုင်လ၂၀ ရက်တွင် ပေါက်တောမြို့၊ ရပ်ကွက် (၂)ရှိ အမိအပြုံးအထည်ဆိုင်၊ ငွေလွှဲငွေထုတ်လုပ်ငန်းမှ ငွေကျပ် သိန်း ၁၅၀ ကျော်ခန့် ဖောက်ထွင်းခံလိုက်ရကြောင်းဖောက်ထွင်းခံရသည့် နေအိမ်မှ အိမ်ပိုင်ရှင် အမျိုးသမီးက ပြောသည်။

“ညဘယ်ချိန်ဝင်သွားတာလဲ မသိလိုက်ပါဘူး။ မိုးလင်းမှ ပိုက်ဆံထည့်ထားတဲ့ သေတ္တာကိုသော့နဲ့ ဖွင့်ပြီး ယူသွားတာတွေ့ရတာပါ”ဟု ပြောသည်။

ပြီးခဲ့သည့်ဇွန်လအတွင်းကလည်း ပေါက်တောမြို့၊ ဘဝမ်းရပ်ကွက် နေအိမ်တစ်အိမ်မှ ဖုန်းနှင့် ငွေများဖောက်ထွင်းခိုးယူခံရမှုများရှိခဲ့သည်ဟု ဖောက်ထွင်းခံလိုက်ရသည့်အိမ်ပိုင်ရှင်ကပြောသည်။

''အခန်းမှာရှိတဲ့စာရွက်စာတမ်းတွေ၊ ငွေ၊ အိုးခွက်တွေကအစ အကုန်ပါသွားတယ်။ အိမ်မှာ လူမရှိတဲ့အချိန်ခိုးသွားတာ'' ဟုဆိုသည်။

ယခုကဲ့သို့ မကြာခဏဖောက်ထွင်းမှုများရှိနေသည့်အပေါ် စိုးရိမ်မှုရှိနေသည်ဟုပေါက်တောဒေသခံအမျိုးသမီး တစ်ဦးက ဆိုသည်။

''အသိတွေမှာလည်း ခဏခဏဆိုင်ကယ်အခိုးခံရ၊ မဟုတ်ရင် ဖုန်း၊ ငွေ အဲ့လို ခဏခဏ ကြားနေရတယ်။ ဒါက မြို့ပေါ်နေလူထုအတွက် စိုးရိမ်တာပေါ့'' ဟုပြောသည်။

ယင်းအပြင် ပြီးခဲ့သည့်မေလ ပထမပတ်ခန့်ကလည်း ပေါက်တောဆေးရုံမှ သူနာပြုတစ်ဦး၏ အခန်းသည်လည်း ဖောက်ထွင်းခံခဲ့ရသလိုဆေးရုံရှိ သူနာပြုများ၏ ဖုန်းများလည်း မကြာခဏအခိုးခံရမှုများရှိနေကြောင်း သိရသည်။

အခိုးခံရသူများအနေဖြင့် သက်ဆိုင်ရာတာဝန်ရှိသူများအား တိုင်ကြားသော်လည်း ထူးခြားမှု တစ်စုံတစ်ရာမရှိကြောင်းအခိုးခံရသည့် သူနာပြုတစ်ဦးက ပြောသည်။  

''ပေါက်တောမြို့မရဲစခန်းသွားတိုင်တာက တခုမှမထူးပါဘူး။ ရဲတွေက တခါတလေ လာကြည့်တယ်။ ဆောင်ရွက်ပေးမယ် ဘာညာပြောတယ်။ ပြီးရင်သူတို့ အလုပ်က ပြီးပြီ။ ဘာမှ မထူးခြားဘူး။ သေချာ စုံစမ်းပေးတာလည်း မရှိပါဘူး''ဟု ဆိုသည်။

ယခုကိစ္စနှင့်ပတ်သက်ပြီးပေါက်တောမြို့မ ရဲစခန်းအား ဆက်သွယ်ခဲ့သော်လည်း အဆက်အသွယ် မရှိခဲ့ပေ။

စစ်တပ်က အာဏာသိမ်းပြီးနောက်ရခိုင်တွင် ကုန်ဈေးနှုန်းများ မြင့်တက်လာပြီး ၇ခိုင်မြို့နယ် အများအပြားတွင် ယခုကဲ့သို့ခိုးယူဖောက်ထွင်းမှုများ ပိုမိုများလာနေကြောင်း ဒေသခံများကပြောကြသည်။ (NN-18)