ပုဏ္ဏားကျွန်းတွင် မြက်သတ်ဆေးသောက်၍ အမျိုးသားတစ်ဦးသေဆုံး

ရခိုင်ပြည်နယ်၊ ပုဏ္ဏားကျွန်းမြို့နယ်၊ ပန်းနီလာကျေးရွာတွင် မြက်သတ်ဆေးသောက်ကာ အမျိုးသားတစ်ဦးသေဆုံးသွားကြောင်း သိရသည်။

သေဆုံးသူမှာ ဦးင/နီအောင် (၅၈) နှစ် ဖြစ်သည်။

မြက်သတ်ဆေးသောက်ကာ ရွာသင်္ချိုင်းတွင် သေဆုံးနေသည့် ဦးင/နီအောင်၏ရုပ်အလောင်းကို ယနေ့ အောက်တိုဘာ ၂၁ ရက်၊ နံနက် ၁၀ နာရီခန့်တွင် ရွာသားများက တွေ့ရှိခဲ့ကြခြင်းဖြစ်ကြောင်း ပန်းနီလာကျေးရွာသား တစ်ဦးက ပြောသည်။

"သူ ညအချိန်မတော် သင်္ချိုင်းမှာ မြက်သတ်ဆေးသောက်ပြီးသေနေတာ ဖြစ်နိုင်တယ်။ တွေ့တာက မနက်မှ တွေ့ကြတာပါ။ သူက အရက်လည်း တော်တော်သောက်ပါတယ်။ စိတ်တောင် သိပ်မခိုင်သလိုလိုတွေဖြစ်ပြီး အခုလိုလုပ်သွားတာဖြစ်မယ်"ဟု ဆိုသည်။
အလောင်းကို ယနေ့ နေ့လယ်ပိုင်းတွင် သင်္ဂြိုဟ်ခဲ့သည်ဟု သိရသည်။

ဦးင/နီအောင်သည် လွန်ခဲ့သည့် ၅ နှစ်က ဇနီးသေဆုံးပြီးကတည်းက အရက်စွဲနေသူ တစ်ဦးဖြစ်ကြောင်းလည်း ရွာသားများက ပြောသည်။ (NN-7)

ဓာတ်ပုံ - ပေးပို့