အင်္ဂါ၊ ဒီဇင်ဘာလ ၅ရက်၊ ၂၀၂၃

မောင်တောတွင် စိတ်ကြွရူးသွပ်ဆေးပြားရှစ်သောင်းကျော်ဖမ်းမိ


  • ရေးသူ: Web Master
  • | ရက်စွဲ: ၂၄ အောက်တိုဘာ ၂၀၂၃
  • | ကြည့်ရှုသူ: 396

(ဆေးပြားများသယ်ဆောင်လာသူ သုံးဦး ထွက်ပြေးလွတ်မြောက်သွား)

ရခိုင်ပြည်နယ်၊ မောင်တောမြို့နယ်တွင်  စိတ်ကြွရူးသွပ်ဆေးပြား ၈၃,၂၅၀ ပြားကို စစ်ကောင်စီနယ်ခြားစောင့်တပ်က  ဖမ်းဆီးရမိခဲ့ကြောင်း သိရသည်။

အဆိုပါမူးယစ်ဆေးများကို ယမန်နေ့ အောက်တိုဘာ ၂၃ ရက်၊ ညနေ ၅ နာရီခွဲခန့်၌ မောင်တောမြို့နယ်၊ ရေမျက်တောင်ကျေးရွာ၏ မြောက်ဘက် (၂)မိုင်ခန့်အကွာ ဓနိတောတွင် စစ်ကောင်စီ လုံခြုံရေးတပ်ဖွဲ့ဝင်များက ဖမ်းမိခဲ့ခြင်းဖြစ်ကြောင်း သိရသည်။

ပြည်နယ်စစ်ကောင်စီ၏ သတင်းထုတ်ပြန်ချက်တွင် အမျိုးသားသုံးဦးသယ်‌ဆောင်လာသည့် အထုပ်အားဖွင့်ပြီးစစ်ဆေးရာ ကာလတန်ဖိုးကျပ် ၁၆၆ ဒသမ ၅ သန်းတန်ဖိုးရှိ WY/R စာတမ်းပါ လိမ္မော်ရောင်စိတ်ကြွရူးသွပ်ဆေးပြား ၈၃,၂၅၀ ပြားကို ဖမ်းမိခဲ့ကြောင်း ဖော်ပြထားသည်။

မူးယစ်ဆေးဝါးသယ်ဆောင်လာသည့် အမျိုးသားသုံးဦးမှာ ထွက်ပြေးလွတ်မြောက်သွားခဲ့သည်။

မောင်တောမြို့နယ်တွင် ပြီးခဲ့သည့် အောက်တိုဘာ ၁၉ ရက်၊ ၂၀ ရက်နှင့် ၂၂ ရက်တို့ကလည်း ကာလတန်ဖိုး ကျပ်သိန်း ၃၀၀၀ ကျော်ဖိုးရှိသည့် WY စိတ်ကြွဆေးပြား ၂ သိန်းနီးပါးနှင့်အတူ ဆေးပြားသယ်ဆောင်လာသူအပါအဝင် စုစုပေါင်း ဆက်စပ်သူ ၆ ဦးကိုလည်း ဖမ်းဆီးမိခဲ့သည်။ (NN-11)

ဓာတ်ပုံ -  ပုံဟောင်းသာဖြစ်ပါသည်။

ဆက်စပ် သတင်းများ