- Web Master
- ၀၉ စက်တင်ဘာ ၂၀၂၄
ရခိုင်ပြည်နယ်၊ မောင်တောမြို့တွင် ဒီဇင်ဘာလ ၂၀ ရက် ညအချိန်က ရွှေဆိုင်ပိုင်ရှင်တစ်ဦး၏ နေအိမ်ကို ဘူးရ်ခါးဝတ်ဆင်ထားသူများမှ ဓါးပြဝင်တိုက်သွားပြီး ကျပ်သိန်းပေါင်းသောင်းနှင့် ချီသည့် ရွှေထည်ပစ္စည်းများ ပါသွားကြောင်း မြို့ခံများကပြောသည်။
ဓားပြတိုက်ခံရသည့်နေအိမ်မှာ မောင်တောမြို့၊ မြို့မတောင်ရပ်ကွက်၊ ဘီလီဆေးလိပ်ပွဲရုံတန်းမှ အဏ္ဏဝါရွှေဆိုင်ပိုင်ရှင် မွတ်ဆလင်အမျိုးသား ဦးအဏ္ဏဝါဆာဒတ်၏ နေအိမ်ဖြစ်ကြောင်း သိရသည်။
" ဓားပြတိုက်ခံရတယ်ဆိုဟာ ဟုတ်ပါတယ်။ အဲဒီအိမ်ပိုင်ရှင်က ရွှေဆိုင်ပိုင်ရှင်တယောက်ပါ။ မနေ့ညက လူငါးယောက်က ဝင်ပြီးဓားပြတိုက်ပြီး ရွှေထည်ပစ္စည်းတွေယူသွားတယ်လို့ သိရပါတယ်" ဟု မောင်တောမြို့ခံ အမျိုသားတစ်ဦးကပြောသည်။
ယမန့်နေည ၁၁ နာရီခန့်က ဘူးရ်ခါးဝတ်ဆင်ထားသည့် အမည်မသိအမျိုးသား ၅ ဦးခန့်က အိမ်စီးကားတစ်စီးဖြင့် လာရောက်ပြီး ဓားပြတိုက်သွားခြင်းဖြစ်ကြောင်း မြို့ခံများကပြောသည်။
အဆိုပါဓားပြတိုက်မှုဖြစ်စဥ်အတွင်း ရွှေထည်ပစ္စည်း ၃ ပိသာမှ ၅ ပိသာအထိပါသွားကြောင်း မြို့ခံများကြား သတင်းထွက်နေသော်လည်း နိရဥ္စရာအနေဖြင့် ပါသွားသည့်ရွှေထည်ပစ္စည်းပမဏာကို အတည်ပြုနိုင်ခြင်းမရှိသေးပါ။
" ရွှေက သုံးပိသာပါသွားသလိုပြောကြတာလည်းရှိတယ်။ ၅ ပိသာလောက်ပါသွားတယ်လို့လည်း ပြောနေကြတယ်" ဟု မောင်တောမြို့ခံအမျိုးသားတစ်ဦးကပြောသည်။
အဆိုပါဖြစ်စဥ်အသေးစိတ်နှင့် ဓားပြတိုက်ခံလိုက်ရသည့် ရွှေထည်ပစ္စည်းပမာဏကို သိရှိနိုင်ဖို့ နေအိမ်ပိုင်ရှင်များနှင့် အဆက်သွယ်ရရှိရန်ကြိုးစားနေသည်။
ဦးအဏ္ဏဝါဆာဒတ်မှာ မောင်တော ဗလီကြီးရှေ့တွင် အဏ္ဏဝါအမည်ရှိရွှေဆိုင်ဖွင့်လှစ်ထားသူဖြစ်ပြီး ၄င်း၏ အိမ်အောက်ထပ်ကိုလည်း ငှားရမ်းကာ နောက်ထပ်ရွှေဆိုင်ပိုင်ရှင်တစ်ဦးက ရွှေဆိုင် ဖွင့်လှစ်ထားကြောင်း မြို့ခံများကပြောသည်။
သို့သော်လည်း ဓားပြများသည်သူ၏ နေအိမ်ကို ဝင်တိုက်သွားခြင်းဖြစ်သည်ဟု သိရသည်။(NN-23)