ကြိုင်ဟိန်းလင်း၊နိရဉ္စရာ၊ စက်တင်ဘာ ၂၈ / ၂၀၂၄

၇ခိုင်ပြည်၊ကျောက်ဖြူမြို့နယ်တွင် ငွေကျပ်၂ ဒသမ ၂ ဘီလီယံကျော်တန်ဖိုးရှိ စိတ်ကြွ ရူးသွပ်ဆေးပြား ၁၄ဒသမ ၇၈ သိန်းနှင့်အတူ လူ ၆ ဦးကို ဖမ်းဆီး၇မိခဲ့ကြောင်း စစ်ကောင်စီက သတင်းထုတ်ပြန်သည်။

ယနေ့ထုတ် စစ်ကောင်စီ မြန်မာ့အလင်းသတင်းစာ ဖော်ပြချက်အရ ဖမ်းဆီးခဲ့ရသူများမှာ စက်လှေပေါ်ပါလာသူ  ကိုမြလွင်၊ ကိုမင်းမင်းစိုး၊ ကိုသန့်ဇင်နိုင်၊ ကိုနိုင်လင်းထွန်းနှင့် ရန်ကုန်မှပို့ဆောင်ခိုင်းသူ ဇော်မင်းဦး(ခ)ကိုဇော်နှင့်ပြည့်ဖြိုးမောင်တို့ ဖြစ်ကြသည်ဟု သိ၇သည်။

၎င်းတို့ကို စစ်ကောင်စီပူးပေါင်းရေတပ်အဖွဲ့ကစက်တင်ဘာ ၂၃ ရက်၊ နံနက် ၄ နာရီတွင်ကျောက်ဖြူမြို့နယ်အတွင်း ကမ်းရိုးတန်းသွား စက်လှေတစ်စီးပေါ်တွင် စစ်ကောင်စီရေတပ်ကဖမ်းဆီးခဲ့ခြင်း ဖြစ်ကြောင်းဖော်ပြသည်။

သူတို့လေးဦးအားဖမ်းဆီးပြီး ဆက်လက်စစ်ဆေးချက်အရ ဖမ်းဆီးရမိ စိတ်ကြွ ရူးသွပ် ဆေးပြားများကို ရန်ကုန်မှ ရခိုင်ပြည်၊ပေါက်တောမြို့နယ်သို့ ပို့ဆောင်ခိုင်းသူ ဇော်မင်းဦး(ခ)ကိုဇော်နှင့်ပြည့်ဖြိုးမောင်တို့အား ရန်ကုန်တိုင်းဒေသကြီး၊ ဆိပ်ကြီး ခနောင်တိုဆိပ်ကမ်းတွင် စက်တင်ဘာ ၂၄ ရက်၊ နံနက် ၁၀ နာရီတွင်ဆက်လက်ဖမ်းဆီးရမိခဲ့သည်ဟုလည်းရေးသားထားသည်။

ထို့အပြင်သူတို့သည် စိတ်ကြွရူးသွပ်ဆေးပြားများကိုရှမ်းပြည်နယ်မှ ရန်ကုန်တိုင်းဒေသကြီးသို့ သယ်ဆောင်ပြီးရခိုင်ပြည်သို့ ရေကြောင်းဖြင့်သယ်ဆောင်ရောင်းဝယ်ခြင်းဖြစ်သည်ဟုလည်း ဆိုသည်။

အဆိုပါထုတ်ပြန်ချက်နှင့်ပတ်သက်၍ ကျောက်ဖြူဒေသခံတစ်ဦးကို ဆက်သွယ်မေးမြန်းရာ အဆိုပါ အဖမ်းအဆီး သတင်းကို မသိ၇သေးဟုဆိုသည်။

ဓာတ်ပုံ- CCDAC Myanmar