နောင်ခိုင်အောင်
နိရဥ္စရာ၊ အောက်တိုဘာ ၈/ ၂၀၁၉
 
ရခိုင်ပြည်နယ်၊ ဘူးသီးတောင်မြို့နယ်၊ စံဂိုးထောင်အုပ်စု၊ ဆင်သေပြင်ကျေးရွာတွင် မူဆလင်တစ်ဦး သေနတ်ပစ်ခံရ၍ သေဆုံးသွားကြောင်း သတင်းရရှိသည်။

သေဆုံးသူမှာ အသက် (၇၀) အရွယ်ရှိ မာမတ်ဆီးဒီးဖြစ်ပြီး အောက်တိုဘာလ ရ ရက်နေ့ မနက် ၁၀ နာရီခွဲအချိန်ခန့်တွင် ပုဇွန်ကန်အတွင်း ငါးရှာနေစဉ် သေနတ်ပစ်ခံရမှုကြောင့် ဦးခေါင်းတွင် ကျည်ဆံထိမှန်၍ နေရာတွင် ပွဲချင်းပြီး သေဆုံးသွားကြောင်း ဆင်သေပြင်ကျေးရွာမှ အမျိုးသမီးတစ်ဦးက ပြောသည်။

“ ငါးရှာသွားနေတဲ့အချိန်မှာ စစ်တပ်က တည့်တည့်ကြည့်ပြီး သေနတ်နဲ့ပစ်တယ်။ ခေါင်းကိုမှန်ပြီးတော့ သေသွားတယ်။ အလောင်းကိုတော့ မြေမြပ်လိုက်ပြီ” ဟု ဆင်သေပြင်ကျေးရွာမှ အမျိုးသမီးတစ်ဦးက နိရဥ္စရာသတင်းဌာနသို့ ပြောသည်။

ဘူးသီးတောင်မြို့နယ် ပြည်သူ့လွှတ်တော်ကိုယ်စားလှယ် ဦးအောင်သောင်းရွှေကလည်း သေနတ်ပစ်ခံပြီး မူဆလင်အမျိုးသားတစ်ဦး သေဆုံးသည်မှာ ဟုတ်မှန်ကြောင်း အတည်ပြုပြောကြားသည်။

“ဆင်သေပြင်ကျေးရွာမှာ စစ်တပ်ရှိတယ်။ အဲဒီဆင်သေပြင်က ဘင်္ဂလီတစ်ယောက်ဦး ငါးရှာနေတဲ့အချိန် စစ်သားက သေနတ်နဲ့ ပစ်လိုက်လို့ သေသွားတယ်လို့ ဆင်သေပြင်ရွာသားတွေက ကျနော့်ကိုဖုန်းဆက်ပြီးပြောတယ်” ဟု ဘူးသီးတောင်မြို့နယ် ပြည်သူ့လွှတ်တော်ကိုယ်စားလှယ် ဦးအောင်သောင်းရွှေက ပြောသည်။

အဆိုပါကိစ္စနဲ့ပတ်သက်၍ အနောက်ပိုင်းတိုင်း စစ်ဌာနချုပ်က ပြောရေးဆိုခွင့်ရှိသူ ဗိုလ်မှူးကြီး ဝင်းဇော်ဦးကို နေ့လယ် ၁ နာရီ ၅၅ မိနစ်အချိန်ခန့်က ဆက်သွယ်မေးမြန်းဖို့ ကြိုးစားခဲ့သော်လည်း စက်ပိတ်ထားသည့်အတွက် အဆက်အသွယ်မရရှိခဲ့ပါ။