ကျောက်ဖြူမြို့တွင် လူငယ်တစ်ဦး ရေနစ်ပျောက်ဆုံးနေ
ထွန်းခိုင် (တောင်ရင်းကျွန်း)
နိရဥ္စရာ၊ ဇွန် ၂၈/ ၂ဝ၂ဝ
ရခိုင်ပြည်နယ်၊ ကျောက်ဖြူမြို့၊ စေတီတောင်ရပ်ကွက်မှ ငါးရှာရန်သွားသော ဆယ်ကျော်သက်အရွယ် လူငယ်တစ်ဦး ယမန်နေ့ ညနေ ၅ နာရီအချိန်ခန့်က ရေနစ်ပျောက်ဆုံးနေကြောင်း သိရှိရသည်။
ပျောက်ဆုံးနေသူမှာ ကျောက်ဖြူမြို့ စေတီတောင်ရပ်ကွက်မှ ဦးကျော်သန်းဦး၏သား မောင်မျိုးလင်းဇော် (၁၈) နှစ်၊ တက္ကသိုလ်ဝင်တန်းစာမေးပွဲဖြေဆိုထားသော ကျောင်းသားတစ်ဦး ဖြစ်ကြောင်း သိရှိရသည်။
ကျောက်ဖြူမြို့မှ မီးသတ်ဦးစီးအရာရှိ ဦးအောင်မင်းထိုက်က “ သူ့က ငါးရှာဖို့ဆိုပြီး သူ့သူငယ်ချင်း နှစ်ယောက်နဲ့အတူ အပျော်အပါးလိုက်သွားတာ။ ရေကူးဖို့တောင် မတတ်ဘူး။ ကျန်တဲ့နှစ်ယောက်ကတော့ ဘာတစ်ခုမှ မဖြစ်ဘူး။ သူတို့ ငါးရှာတဲ့နေရာမှာ ရေဝပ်ဆိုလား။ ဘာဆိုလည်း တစ်ခုရှိတယ်လို့ ပြောတယ်။ တကယ့်ကို ငါးရှာပြီးအသက်မွေးနေရတဲ့ လူတွေဆိုလိုရှိရင် အဲ့ဒီနေရာကို မသွားကြဘူး။ အန္တရာယ်ရှိလို့။ သူတို့က အဲ့နေရာရဲ့အကြောင်းကို မသိလို့သွားတာပါ” ဟု ပြောသည်။
ငါးရှာစဉ်ရေနစ်မြုပ်သောနေရာမှာ ကျောက်ဖြူမြို့၊ သံဇစ်မြစ်ဝ၊ ကျောက်ဖြူပင်လယ်ကမ်းခြေစပ်တွင် ဖြစ်ကြောင်း သိရှိရသည်။
ပျောက်ဆုံးနေသူအား ယမန်နေ့ညနေ (၅း၄၅)နာရီကနေ ကျောက်ဖြူမြို့မီးသတ်တပ်ဖွဲ့၊ လေးဝတီ ကုလရက္ခိတ ပရဟိတအသင်းနှင့် ရေကြောင်းကျွမ်းကျင်သူ ဒေသခံများပူပေါင်း၍ ရှာဖွေနေသော်လည်း ရှာဖွေ၍ မရရှိသေးကြောင်း နိရဥ္စရာသတင်းဌာနမှ ယနေ့ နံနက် ၈း၃ဝ နာရီခန့်က ဆက်သွယ်မေးမြန်းစဉ် မီးသတ်ဦးစီးအရာရှိ ဦးအောင်မင်းထိုက်က ပြောကြားသည်။
(Photo by Par Yar Do)
