ဒုတိယမြောက်နျူကလီးယားဓာတ်အားပေးစက်ရုံတည်ဆောက်ရန် ရုရှား၏အကူအညီကိုဘင်္ဂလားဒေ့ရှ်တောင်းခံ
နိရဉ္စရာ၊ အောက်တိုဘာ ၁၂/ ၂၀၂၁ (နိုင်ငံတကာ)
ဘင်္ဂလားဒေ့ရှ်နိုင်ငံ တောင်ပိုင်းဒေသတွင်နောက်ထပ် တည်ဆောက်မည့် နျူကလီးယားဓာတ်အားပေးစက်ရုံအတွက် ၀န်ကြီးချုပ်ရှိတ်ဟာဆီနာသည် ရုရှားထံမှ အကူအညီကို မနေ့က ဆက်လက်တောင်းခံခဲ့သည်ဟု UNB သတင်းဌာနတွင် သတင်းဖော်ပြသည်။
ပထမဆုံး တည်ဆောက်နေသော Rooppur နျူကလီးယားဓာတ်အားပေးစက်ရုံပြီးစီးသည်နှင့် ဘင်္ဂလားဒေ့ရှ် နိုင်ငံ၏ တောင်ပိုင်းဒေသ၌ နောက်ထပ်စက်ရုံတစ်ခုတည်ဆောက်မည်ဖြစ်ကာ ၎င်းစက်ရုံအတွက် ရုရှားထံမှအဆက်မပြတ် ထောက်ခံမှုလိုအပ်သည်ဟု ၀န်ကြီးချုပ်ရှိတ်ဟာဆီနာက ပြောဆိုသည်။
ဘင်္ဂလားဒေ့ရှ် ဝန်ကြီးချုပ်သည် ရုရှားနိုင်ငံ Rosatom ပြည်နယ်အဏုမြူစွမ်းအင်ကော်ပိုရေးရှင်း၏ ညွှန်ကြားရေးမှူးချုပ် Alexey Likhachev နှင့် ဒက္ကားမြို့ရှိ ဝန်ကြီးချုပ်အိမ်တော် ဂိုနိုဘာဘန်၌ မနေ့က တွေ့ဆုံစဉ် ထိုသို့ အကူအညီ တောင်းခံခဲ့သည်ဟု သတင်းတွင်ဖော်ပြသည်။ဘင်္ဂလားဒေ့ရှ် ဝန်ကြီးချုပ်၏ ပြန်ကြားရေး တာဝန်ခံ Ihsanul Karim က အစည်းအဝေးအပြီးတွင် သတင်းထောက်များ အားရှင်းလင်းပြောကြားရာ၌ ရုရှား Rosatom ပြည်နယ်အဏုမြူစွမ်းအင်ကော်ပိုရေးရှင်း၏ ညွှန်ကြားရေးမှူးချုပ်က ဘင်္ဂလားဒေ့ရှ်နိုင်ငံ လျှပ်စစ်ကဏ္ဍအား ဆက်လက်ထောက်ခံလိုကြောင်း ပြောကြားခဲ့သည်ဟု ဆိုသည်။
ဘင်္ဂလားဒေ့ရှ်နိုင်ငံသည် သူနိုင်ငံ၏ ပထမဆုံးသော Rooppur ရှိ ဓာတ်အားပေးစက်ရုံကို ရုရှားနိုင်ငံ၏ အကူအညီဖြင့် လက်ရှိတွင် တည်ဆောက်နေခြင်းဖြစ်သည်။
ဘင်္ဂလားဒေ့ရှ် ဝန်ကြီးချုပ်သည် စက်ရုံအတွက် သင့်တော်သောလုံခြုံရေး အစီအမံများထားရှိရန် အရေးကြီးပုံကို အလေးထားပြောကြားခဲ့ပြီး နျူကလီယား ဓာတ်အားပေးစက်ရုံနှင့် ပတ်သက်ပြီး သူမ၏ နိုင်ငံသားများကို လေ့ကျင့်သင်ကြားပေးရန်လည်း ရုရှားကို တောင်းဆိုခဲ့သည်ဟု ဆိုသည်။
ဘင်္ဂလားဒေ့ရှ်နိုင်ငံတွင်ပထမဆုံးသောနျူကလီးယားဓာတ်အားပေးစက်ရုံတည်ဆောက်ရန် အကူအညီများကို ဖြည့်ဆည်းပေးသည့်အတွက် ရုရှားနိုင်ငံကို ဘင်္ဂလာ ဝန်ကြီးချုပ်ကကျေးဇူးတင်ကြောင်း ပြောဆိုခဲ့သည်ဟု သတင်းတွင် ဖော်ပြသည်။
( ဓာတ်ပုံ-ပထမဆုံးတည်ဆောက်နေသော ဘင်္ဂလားဒေ့ရှ် Rooppur နျူကလီးယား ဓာတ်အားပေးစက်ရုံကိုတွေ့ရစဉ်)
