ယူကရိန်းအတွက် လက်နက်များ ဆက်လက်ထောက်ပံ့ပေးမည်ဖြစ်သော်လည်း ဂျာမန်တိုက်ခိုက်ရေး တင့်ကားများ ပေးပို့ရေး မသေချာသေး

နိရဉ္စရာ၊ ဇန်နဝါရီ ၂၁/ ၂၀၂၃ (နိုင်ငံတကာ)

အနောက်အုပ်စုမဟာမိတ်နိုင်ငံများက ယူကရိန်းသို့ စစ်လက်နက်ပစ္စည်းများ ဆက်လက် ကူညီထောက်ပံ့ရန် ကတိပြုခဲ့ကြသော်လည်း ယူကရိန်းက အသည်းအသန် လိုအပ်နေသော ဂျာမနီလုပ် တိုက်ပွဲဝင် တင့်ကားများ ပေးပို့ရေးအတွက်မူ တစ်စုံတစ်ရာ ဆုံးဖြတ်နိုင်ခြင်း မရှိသေးဟု သိရသည်။

ဂျာမနီနိုင်ငံ ရမ်စတိန်း လေတပ်ဌာနချုပ်၌ ပြုလုပ်သည့် မဟာမိတ်နိုင်ငံများ၏ အစည်းအဝေးအပြီးတွင် အမေရိကန် ထိပ်တန်း စစ်ဗိုလ်ချုပ် မိုက် မီလ်လေ က ယခုနှစ်အတွင်း ကျူးကျော်သိမ်းပိုက်ခံထားရသည့် ယူကရိန်းနယ်မြေများမှ ရုရှားတပ်များကို မောင်းထုတ်ရန် မဖြစ်နိုင်သေးဟုဆိုသည်။

ယူကရိန်းသည် လာမည့် နွေဦးတွင် ရုရှားတပ်များအား ထိုးစစ်ဆင်ရန် ပြင်ဆင်လျှက် ရှိပြီး အနောက်အုပ်စု မဟာမိတ်နိုင်ငံများမှ စစ်လက်နက်ပစ္စည်းအထောက်အပံ့များစွာ လိုအပ်နေသည်။

ရမ်စတိန်း အစည်းအဝေးတွင် အဓိက ဆွေးနွေးခဲ့ကြသည့်ကိစ္စမှာ ဂျာမနီလုပ် ဖျက်အားပြင်း Leopard -2 တင့်ကားများ ယူကရိန်းသို့ ပေးပိုးရေးကိစ္စဖြစ်သည်။ သို့သော် တင့်ကားပေးပို့ရေးအတွက် ဆုံးဖြတ်ချက် ချမှတ်နိုင်ခြင်း မရှိခဲ့ပဲ ပုံမှန်လက်နက်ပစ္စည်းများ ဆက်လက်ထောက်ပံ့ရေးကိုသာ သဘောတူခဲ့ကြသည်။

အမေရိကန်သည် ၎င်းတို့၏ Abrams တင့်ကားများ ယူကရိန်းသို့ ပေးပို့ခြင်းမပြုရန် ဆုံးဖြတ်ချက်ကိုလည်း ဆုပ်ကိုင်ထားဆဲဖြစ်သည်။

ရုရှား ကျူးကျော်မှု တစ်နှစ်ပြည့်တော့မည့် ယခုလိုအချိန်တွင် ဆုံးဖြတ်ချက်တစ်စုံတစ်ရာ မချမှတ်မှတ်နိုင်ခြင်းမှာ ယူကရိန်းအတွက် စိတ်ပျက်စရာဖြစ်ခဲ့သည်။ သမ္မတ ဇီလန်းစကီးသည် ဂျာမနီလုပ် တိုက်ခိုက်ရေး တင့်ကားများ ရရှိရေးကို အဆက်မပြတ်တောင်းဆိုလျှက်ရှိသည်။

ယခု အပတ်အတွင်း ယူကရိန်းနိုင်ငံ၊ ဒီနီပရို ရှိ လူနေရပ်ကွက်အတွင်း ရုရှားတို့၏ ဒုံးကျည် ကျရောက်ပေါက်ကွဲမှုကြောင့် လူပေါင်း ၄၄ဦး သေဆုံးပြီး အမြောက်အများဒဏ်ရာရခဲ့သည်။ (NN-27)

ref: reuter