ထိုင်းအာဏာရပါတီက စစ်ဗိုလ်ချုပ်ဟောင်း ပရာဝစ်ကိုဝန်ကြီးချုပ်လောင်းအဖြစ် ရွေးချယ်

နိရဉ္စရာ၊ ဇန်နဝါရီ ၂၇/၂၀၂၃

ထိုင်းနိုင်ငံ၏ စစ်တပ်လိုလားသောအာဏာရ ပလန်းပရာချာရတ်ပါတီ (Palang Pracha Rath/ PPRP) က နိုင်ငံရေးသမားဟောင်းနှင့်စစ်တပ်အကြီးအကဲဟောင်း ပရာဝစ် ဝမ်ဆူဝန်ကို လာမည့်ရွေးကောက်ပွဲတွင် ဝန်ကြီးချုပ်လောင်းအဖြစ် ရွေးချယ်လိုက်ကြောင်း ပါတီထိပ်တန်းအရာရှိတစ်ဦးက ပြောကြားသည်။ 

ထိုင်းနိုင်ငံ ရွေးကောက်ပွဲများကိုလာမည့် မေလတွင် ကျင်းပမည်ဖြစ်ရာ ပါတီအသီးသီးက ကြိုတင်ပြင်ဆင်နေကြပြီဖြစ်သည်။ 

ရှေးရိုးစွဲအယူအဆ လွှမ်းမိုးသည့် ထိုင်းနိုင်ငံရေးတွင် သဘောထား မျှတသူလည်းဖြစ်၊ လက်ရှိ ဒုတိယဝန်ကြီးချုပ်လည်းဖြစ်သည့်ပရာဝစ်သည် ဖြူထိုင်းပါတီမှ ပြည်ပတိမ်းရှောင်နေသည့် ဝန်ကြီးချုပ်ဟောင်းသက်ဆင်ရှင်နာဝါထရာ၏ သမီးပေတုန်တန်ရှင်နာဝါထရာ နှင့်အဓိကယှဉ်ပြိုင်ရမည်ဖြစ်သည်။ 

" သူဟာ ပါတီရဲ့ အဓိကနေရာမှာ ရှိပါတယ်။ ပါတီဝင်တွေနဲ့ ကိုယ်စားလှယ်အားလုံးကလည်း သူ့အရည်အချင်းကို သဘောကျပြီး အသင့်တော်ဆုံးလို့ မြင်ကြပါတယ်"ဟု ပလန်း ပရာချာရတ်ပါတီ ဒုတိယ ခေါင်းဆောင် ပိုင်ဘွန်းနီတီတာဝမ်က ပြောသည်။

ပရာဝစ်(၇၇နှစ်) အနေဖြင့် ယူနိုက်တက် ထိုင်းနေးရှင်းပါတီသို့ ရောက်ရှိသွားသော လက်ရှိ ဝန်ကြီးချုပ် ပရာယွတ်ချန်အိုချာ (၆၈နှစ်)နှင့် ရင်ဆိုင် ယှဉ်ပြိုင်ရမည်ဖြစ်သည်။ နှစ်ဦးစလုံး စစ်ဗိုလ်ချုပ်ဟောင်းများဖြစ်ကြပြီး အစ်ကိုကြီး ညီလေးဆက်ဆံရေးရှိကြကာ မိဖုရားအစောင့်တပ်၏ လေးစားခြင်းခံရသူများ ဖြစ်သည်။

နှစ်ဦးစလုံးရှင်နာဝါထရာမိသားစုနှင့် ဆက်စပ်သော အစိုးရအဖွဲ့အား အာဏာသိမ်မှုတွင် ပါဝင်ခဲ့ကြသူများလည်း ဖြစ်သည်။ 

ပရာဝစ်၏ သဘောထားကို မသိရသေးသော်လည်း သူ၏ ဖေ့စ်ဘွတ်ခ် စာမျက်နှာတွင်မူ " နိုင်ငံရေးသမားဆိုတာ ပါတီအားလုံးနဲ့ လက်တွဲပြီး အလုပ်လုပ်နိုင်စွမ်းရှိရမယ်။ လူထုအကျိုးစီးပွားကို ရှေးရှုပြီး ပဋိပက္ခတွေလျှော့ချဖို့ ညှိနှိုင်း ဆောင်ရွက်တတ်ရမယ်" ဟု ရေးသားထားသည်ကို တွေ့ရသည်။ 

ယခုကဲ့သို့ ဗိုလ်ချုပ်ဟောင်းနှစ်ဦးက မတူညီသော ပါတီများမှယှဉ်ပြိုင်ရွေးချယ်ခံခြင်းမှာ လာမည့် ရွေးကောက်တွင် အနိုင်ရပြီးဆက်လက်အာဏာရရှိရေး မဟာဗျူဟာတစ်ရပ်ဟုဆိုသည်။ 

NN 27,

ref:c