နိရဉ္စရာ၊ ဖေဖော်ဝါရီ ၂၁/၂၀၂၃ (နိုင်ငံတကာ)
ပြီးခဲ့သည့် ဖေဖော်ဝါရီလ(၆)ရက်နေ့က
အင်အား(၇.၈)ရှိ ပြင်းထန်သည့် ငလျင်လှုပ်ခတ်ခဲ့ရာ
တူရကီတောင်ပိုင်း နှင့် ဆီးရီးယားမြောက်ပိုင်းဒေသတွင်
တနင်္လာနေ့ညနေပိုင်းက နောက်ထပ် အင်အား ၆ ဒဿမ၄ မဂ္ဂနီကျုရှိ ငလျင်တစ်ခုထပ်မံ လှုပ်ခတ်သွားခဲ့ရာ သေဆုံးဒဏ်ရာရရှိမှုများနှင့်
အတူ ပျက်စီးဆုံးရှုံးမှုများ ထပ်မံ ပေါ်ပေါက်ခဲ့ကြောင်း သိရှိရသည်။
တူရကီတောင်ပိုင်း ဟာတေးပြည်နယ်တွင် လှုပ်ခတ်ခဲ့သည့်အဆိုပါငလျင်ကြောင့် လတ်တလောတွင် လူ ၆ဦးသေဆုံးပြီး ၃၀၀ နီးပါး ဆေးရုံတင်ထားရသည်ဟု သိရသည်။ ဆီးရီးယားနိုင်ငံ ဘက်ခြမ်း အလက်ပိုဒေသတွင်လည်း
ဒဏ်ရာရရှိသူ ၁၅၀ ခန့်ရှိသည်ဟု
ဆီးရီးယား ခမောက်ဖြူအဖွဲ့က ဆိုသည်။
တနင်္လာနေ့ ည ၈နာရီအချိန် တူရကီနိုင်ငံ ဒက်ဖနီမြို့တွင် လှုပ်ခတ်သွားသည့် ငလျင်ကို အန်တက်ယာမြို့ နှင့် လီဘာနွန်နိုင်ငံအထိ သိရှိခံစားရသည်။
နောက်ထပ် သုံးမိနစ်အကြာတွင် အင်အား ၅ ဒဿမ ၈ ရှိ နောက်ဆက်တွဲ ငလျင်တစ်ခု ထပ်မံ လှုပ်ခတ်သွားကြောင်းနှင့်
မိနစ် ၂၀ အကြာတွင် ထပ်မံ၍ အင်အား ၅ဒဿမ၂ မဂ္ဂနီကျုရှိ ငလျင်တစ်ခု လှုပ်ခတ်ခဲ့ကြောင်း တူရကီ သဘာဝ ဘေးအန္တရာယ် စီမံခန့်ခွဲရေးအေဂျင်စီက ပြောကြားခဲ့သည်။
အန်တက်ယာမြို့ ဆေးရုံ အထူးကုသဆောင်မှ
လူနာများ ရွှေ့ပြောင်းနေကြပုံနှင့် အက်စ်ကန်ဒီရန်မြို့
ဆေးရုံမှ လူနာများ နေရာပြောင်းရွှေ့ပေးနေပုံများကို
တူရကီရုပ်သံသတင်းများတွင် တွေ့မြင်ကြရသည်။
အန်တက်ယာမြို့တွင် ထပ်မံလှုပ်ခတ်သော ငလျင်ကြောင့် လူအများအထိတ်တလန့် ဖြစ်နေကြသလို အဆောက်အဦးများ ထပ်မံပြိုကျပြီး
ဖုန်လုံးကြီးများ ထွက်ပေါ်နေသည်။ ကယ်ဆယ်ရေးအတွက်
စောင့်မျှော်နေဆဲမှာပင် အဆောက်အဦးနံရံများ ပြိုကျလာသဖြင့် လူများ ထွက်ပြေးကြရသည်။
“ ဘာလုပ်ရမှန်း မသိတော့ဘူး။ ကျနော်တို့တစ်ယောက်ကို တစ်ယောက် ဖက်ထားကြတုန်းမှာပဲ
အဆောက်အဦး နံရံတွေက ပြိုကျလာတယ်။ မြေကြီးက ကျနော်တို့ကို မြိုချဖို့ ပါးစပ်ဟ
လိုက်သလိုပါပဲ” ဟု အန်တက်ယာမြို့တွင်နေထိုင်သူ အလီမတ်ဇလန် က အေအက်ဖ်ပီ သို့ ပြောဆိုခဲ့သည်။
“ လမ်းတွေက လှိုင်းတွေလို လှုပ်ရှားနေတယ်။ အဆောက်အဦးတွေက ရှေ့တိုး နောက်ငင်ဖြစ်နေတယ်။ ကားတွေက ဘယ်ညာ ယိမ်းထိုးနေတယ်။ ခြေထောက်တွေ မြေကြီးပေါ် ရပ်နေလို့မရတော့ဘူး။ “
“ ဟာတေးက လုံခြုံတဲ့နေရာတစ်ခု မဟုတ်တော့ဘူး။ အဆောက်အဦးတွေ အများကြီး ပြိုကျနေတဲ့ အသံကိုကျွန်တော်တို့ကြားနေရတယ်၊ နောက်တစ်နေ့ ရောက်ဖို့ စောင့်နေရပေမယ့် ဘယ်သွားရမယ်ဆိုတာလည်း မသိတော့ဘူး” ဟု အန်တက်ယာမြို့မှ မာမက် အာမက် ဆိုသူက ပြောကြားခဲ့သည်။
တူရကီ သဘာဝဘေးဒဏ်တုန့်ပြန်ရေး AFAD ၏ အဆိုအရ လူပေါင်း ၄၅၀၀၀ ကျော် သေဆုံးရသည့် မဂ္ဂနီကျု ၇ ဒဿမ ၈ အင်အားရှိ ငလျင်ကြီးလှုပ်ခတ်ပြီးနောက်ပိုင်း
ထိုဒေသတွင် ငလျင်ငယ် ကြိမ်ရေ စုစုပေါင်း ၆၂၀၀ လှုပ်ခဲ့ပြီး
ဖြစ်သည်ဟု သိရသည်။ (NN-27)
Ref:CNA