မြန်မာဟုယူဆရသည့် အမျိုးသား ၃ ဦး ထိုင်း-မလေးနယ်စပ်၌ အသတ်ခံထားရ

နိရဉ္စရာ၊ မတ်လ ၁၆ - ၂၀၂၃

ထိုင်းနိုင်ငံ ဆုံခလာပြည်နယ် ဘန့်ကလန်မြို့ရှိ သစ်တောတစ်ခု၌ မြန်မာများဟုယူဆရသည့် အမျိုးသား ၃ ဦး၏ရုပ်အလောင်းကို မတ်လ ၁၅ ရက်နေ့တွင် ထိုင်းအာဏာပိုင်များက တွေ့ရှိခဲ့သည်ဟု ထိုင်းရုပ်သံ လိုင်း One 31 က ထုတ်လွှင့်ခဲ့ကြောင်း သိရသည်။

ဆုန်ခလာပြည်နယ် ဘန့်ကလန်မြို့သည် ထိုင်း-မလေးရှား နယ်စပ်ဖြစ်ပြီး အဆိုပါအလောင်းများကို စစ် ဆေးချက်အရ လက်ပြန်ကြိုးတုပ်ခံထားရကာ လည်ပင်း၌ အလှီးခံထားရသည့် ဒဏ်ရာများတွေ့ရသည့် အတွက် အသတ်ခံထားရခြင်းဖြစ်နိုင်ကြောင်း ထိုင်းအာဏာပိုင်များက ပြောသည်။

တရားမဝင်လူကုန်ကူးလုပ်ငန်းများနှင့် အခြားရာဇဝတ်ဂိုဏ်းများ လှုပ်ရှားသည့်ဒေသဖြစ်ခြင်းကြောင့် ယင်းဖြစ်စဉ်အသေးစိတ်ကို ခန့်မှန်းရခက်ကြောင်း အလုပ်သမားအရေး ကူညီဆောင်ရွက်ပေးနေသည့် ကိုစောမောင် က နိရဉ္စရာ ကို ပြောသည်။

‘’ထိုင်းနိုင်ငံရဲ့ တောင်ပိုင်းဘက်ကဆိုတော့ အခုဖြစ်စဉ်က ရာဇဝတ်မှုလား၊ လူကုန်ကူးမှုလားဆိုတာ မသဲကွဲတော့ ခန့်မှန်းရခက်တယ်ဗျ၊ ပြီးတော့ မြန်မာတွေလို့ပြောနေပေမယ့်လည်း ခန့်မှန်းအနေနဲ့ပဲ ယူဆနေ ရသေးတယ်။’’

၎င်းရုပ်အလောင်းများကို မတ်လ ၁၅ ရက် မနက်ပိုင်းတွင် အမှိုက်ကောက်သူများက စတင်တွေ့ရှိခဲ့ပြီး အာဏာပိုင်များထံ အကြောင်းကြားခဲ့ပြီး ရဲ၊ လဝက စသည့် ဌာနဆိုင်ရာတာဝန်ရှိသူများ သွားရောက် စစ်ဆေးကြခြင်းဖြစ်ကြောင်း၊ ထိုင်းလူမျိုးများဖြစ်ပါက လူပျောက်တိုင်ကြားမှုရှိမှာဖြစ်ပြီး ယခုသေဆုံးသူ များကို အနီးနားဝန်းကျင်က မသိကြကြောင်း၊ ယင်းကြောင့် မလေးရှားနိုင်ငံဖက်သို့သွားမည့် မြန်မာရွှေ့ ပြောင်းလုပ်သားများဖြစ်နိုင်ကြောင်း အာဏာပိုင်များက သုံးသပ်သည်။

အသတ်ခံရပြီး လာရောက်စွန့်ပစ်သွားခြင်းဖြစ်နိုင်ကြောင်း ထိုင်းရဲများကသံသယရှိနေပြီး လွန်ခဲ့သည့် ၃ ရက်ကတည်းက သေဆုံးခဲ့ခြင်းဟုယူဆကြောင်း၊ လက်ရှိတွင် ရုပ်အလောင်းများကို ဟတ်ရိုင်ဆေးရုံကြီး ကို ပို့ထားကြောင်း သိရသည်။

ဘန့်ကလန်မြို့သည် အဝေးပြေးလမ်းမကြီးပေါ်၌ရှိပြီး လူကုန်ကူးသမားများ သွားလာသည့်နေရာများ ဖြစ်ကြောင်း ယင်းလူသတ်မှုနှင့်ပတ်သက်ပြီး တရားခံများဖော်ထုတ်နိုင်ရေး အာဏာပိုင်များမှ စုံစမ်းနေ ကြောင်း သိရသည်။ NN – 24

Photo – Courtesy Photo