(မီးလောင်မှုမှာလင်မယားရန်ဖြစ်ရာကနေ စတင်လောင်ကျွမ်းခဲ့ခြင်းဟုဆို)

နိရဉ္စရာ၊မေ ၈ / ၂၀၂၃

ရခိုင်ပြည်နယ်၊ပေါက်တောမြို့နယ်ရှိ ကြိမ်နီပြင်မွတ်ဆလင်ဒုက္ခသည်စခန်းမှမီးဘေးသင့်ဒုက္ခသည်များမှာ လက်ရှိတွင် အကူအညီများ အရေးတကြီး လိုအပ်လျက်ရှိသည်ဟု သိ၇သည်။

အဆိုပါစခန်းသည်ယမန်နေ့ မေလ ရ ရက်၊ ညနေ ၅ နာရီခွဲခန့်က မီးလောင်မှုဖြစ်ပွားခဲ့ရာ စခန်းရှိ ၁၅ ပေ× ၁၀ပေ ပတ်လည် လုံးချင်းအိမ် ၁၅၀ နှင့် ၈ ခန်းတွဲတန်းလျား ၃၅ လုံးမီးလောင်ပျက်စီးခဲ့ခြင်းဖြစ်သည်။

ယင်းဖြစ်စဥ်ကြောင့်စခန်းရှိ အိမ်ထောင်စု ၅၃၀ မှ လူဦးရေ ၃၇၁၀ ဦးတို့မှာအိုးမဲ့၊ အိမ်မဲ့ဘ၀ဖြင့် မီးဘေးဒုက္ခသည်ဖြစ်သွားကြ၇သည်။

မီးဘေးဒုက္ခတချို့မှာအဆိုပါ မီးလောင်ကွင်းအနီးတွင်တာပေါ်လင်စများဖြင့် တဲထိုးကာနေထိုင်နေကြပြီး သူတို့ ဘ၀ပြန်လည်ထူထောင်ရေးအတွက် ကယ်ဆယ်ရေး အကူအညီများအရေးတကြီး လိုအပ်နေသည်ဟု မီးဘေးသင့်မိသားစုတစ်စု၏ဆွေမျိုးတော်စပ်သူ ကြိမ်နီပြင်ကျေးရွာမှ ဒေါ်ဝေနုဖြူကနိရဥ္စရာနှင့်တွေ့ဆုံစဥ် ပြောသည်။

"အကုန်လုံးက စိတ်ပျက်လက်ပျက်ဖြစ်နေကြတယ်။ စားစရာ၊သောက်စရာတွေလည်းမရှိဘူး။ အလှူရှင်တွေဆီကပေးတဲ့ဟာတွေကို မျှော်နေကြ၇တယ်" ဟု ပြောသည်။

လက်ရှိတွင်သူတို့အတွက် ၃ ရက်ခန့် စားရေး၊သောက်ရေးကို မြို့နယ်အာဏာပိုင်များက ထောက်ပံ့ပေးထားသည်ဟု ပေါက်တောမြို့နယ် မီးသတ်ဦးစီးမှူးဦးမျိုးမြင့်ထွန်းက ပြောသည်။

"လက်ရှိအချိန်မှာ မီးဘေးဒုက္ခသည်တွေက နီးစပ်တဲ့ အိမ်တွေမှာ နေထိုင်၇တာမျိုးတွေ၊ ဆေးပေးခန်းတွေ၊စာသင်ကျောင်းတွေ အဲလိုနေရာမျိုးတွေမှာလတ်တလော တက်နေကြတယ်။ မြို့နယ်ကလည်း သူတို့ရဲ့ ၂ ရက်၊ ၃ ရက်စာအတွက် စားနပ်ရိက္ခတွေ ဆန်၊ ဆီ၊ဆားတွေ ထောက်ပံ့ပေးထားတယ်" ဟုပြောသည်။

အဆိုပါစခန်းတွင်နေထိုင်သည့်အီလီယာ (၂ရ)နှစ်နှင့်ဇနီးဖြစ်သူ မအာရှု (၂၄) နှစ်တို့ ယမန်နေ့ညနေပိုင်းက ထမင်းချက်နေစဉ် စကားများရန်ဖြစ်ကြပြီးခင်ပွန်းဖြစ်သူက အနီးရှိ သစ်သားတုတ်ဖြင့်ပစ်ပေါက်ရာ မီးဖိုတွင်ထိမှန်၍ မီးစများ လွင့်စင်ကာ အနီးရှိ ဝါးထရံနှင့် ဓာတ်ဆီဗူးအား မီးကူးစက်ရာမှစတင်လောင်ကျွမ်းခဲ့ခြင်းဖြစ်သည်ဟု စခန်းတာဝန်ရှိသူများက ဆိုသည်။

မီးလောင်မှုကြောင့်လူနှင့်တိရစ္ဆာန် ထိခိုက်ဒဏ်ရာရမှုမရှိသလို ဆုံးရှုံးမှုတန်ဖိုးအားလည်းလောလောဆယ်တွင် မသိရှိ၇သေးဟု ပေါက်တောမြို့နယ် မီးသတ်ဦးစီးမှူးက ပြောသည်။

အဆိုပါကြိမ်နီပြင်မွတ်ဆလင်ဒုက္ခသည်စခန်းတွင် လူဦးရေ ၇၀၀၀ ကျော်နေထိုင်လျက်ရှိပြီးပြီးခဲ့သည့် ၂၀၁၂ ခုနှစ်က ၇ခိုင်တွင်ဖြစ်ပွားခဲ့သည့် ပဋိပက္ခများဖြစ်ပြီးနောက်ဖွင့်လှစ်ခဲ့ခြင်းဖြစ်ကြောင်း သိ၇သည်။

ထိုစခန်းတွင်၂၀၁၅ ခုနှစ်နှင့် ၂၀၁၈ ခုနှစ်တို့တွင်လည်း မီးလောင်မှုဖြစ်ပွားခဲ့ဖူးသည်ဟုစခန်းနေသူများက ပြောသည်။ (NN - 21)

ဓာတ်ပုံ- မီးလောင်မှုဖြစ်ခဲ့သည့် ကြိမ်နီပြင်မွတ်ဆလင်ဒုက္ခသည်စခန်းအား ယနေ့ မေလ ၈ရက်၊ နေ့လယ်က တွေ့၇စဉ်။