ဘင်္ဂလားဒေ့ရှ်တွင် အင်အား ၅ ဒဿမ ၅ မဂ္ဂနီကျုရှိ ငလျင်တစ်ခု လှုပ်ခတ်

(ဘင်္ဂလားဒေ့ရှ်နိုင်ငံသည် အဓိကငလျင်ပြတ်ရွေ့ကျော သုံးခုပေါ်တွင် တည်ရှိ)

ဘင်္ဂလားဒေ့ရှ်နိုင်ငံတွင် ဩဂုတ် ၁၄ ရက် တနင်္လာနေ့ ည ၈:၄၉ နာရီ အချိန်က အင်အား ၅ ဒဿမ ၅ မဂ္ဂနီကျုရှိ ငလျင်တစ်ခု လှုပ်ခတ်သွားခဲ့ရာ ဒက္ကားမြို့တော်အပါအဝင် နိုင်ငံနေရာအနှံ့အပြားမှ ငလျင်လှုပ်ခတ်မှုကို ခံစားခဲ့ရသည်ဟု သိရသည်။

ငလျင်သည် ဘင်္ဂလားဒေ့ရှ်နိုင်ငံ ဆိုင်ဟက်မြို့ အရှေ့မြောက်ဘက် မိုင် ၃၀ အကွာကို ဗဟိုပြု၍ မြေအောက်မိုင် ၂၀တွင် လှုပ်ခတ်ခဲ့ခြင်း ဖြစ်ကြောင်း ဥရောပ-မြေထဲပင်လယ် ငလျင်တိုင်းတာရေးဌာနက ထုတ်ပြန်ကြေညာသည်။

ငလျင်လှိုင်းများကို အိန္ဒိယ၊မြန်မာ၊ဘူတန် နှင့် တရုတ်နိုင်ငံများအထိ သိရှိခံစားခဲ့ရပြီး ပျက်စီးဆုံးရှုံးမှုနှင့် အသေအပျောက်စာရင်း လောလောဆယ် မသိရှိရသေးဟု ဆိုသည်။

ပြီးခဲ့သည့် မေလ ၅ရက် ကလည်း အင်အား ၄ ဒဿမ ၅ မဂ္ဂနီကျုရှိ ငလျင်တစ်ခု လှုပ်ခဲ့ရာ ဒက္ကာမြို့တွင်အထိတ်တလန့်ဖြစ်ခဲ့သေးသည်။

ပညာရှင်များ၏အဆိုအရ ဘင်္ဂလားဒေ့ရှ်တွင် ငလျင်လှုတ်ခတ်မှုကြောင့် သေဆုံးရသူ ၉၀%မှာ အဆင့်အတန်းမမီ ဆောက်လုပ်ထားသောအဆောက်အဦးများပြိုကျပြီး ပိတ်မိနေသူများဖြစ်သည်ဟု ဆိုသည်။

ဘင်္ဂလားဒေ့ရှ်နိုင်ငံသည် အဓိကငလျင်ပြတ်ရွေ့ကျော သုံးခုပေါ်တွင် တည်ရှိနေပြီး အဆိုပါ ပြတ်ရွေ့ကြောများသည် ဆိုင်းဟက်၊ စစ်တကောင်း နှင့် ဒက္ကာမြို့ကြီးသုံးမြို့အောက်တွင် ရှိနေသည်ဟု ဆိုသည်။

NN-27

ref:Dhaka tribune