ရန်သူ့ရေငုတ်သင်္ဘောကို ခရုဇ်ဒုံးကျည်ဖြင့် ပစ်ခတ်ဖျက်ဆီးနိုင်ခဲ့သည့် ပထမဦးဆုံး နိုင်ငံအဖြစ် သမိုင်းတွင်ခဲ့သည့် ယူကရိန်း

ပြီးခဲ့သည့် စက်တင်ဘာလ ၁၃ ရက်နေ့က ခရိုင်းမီးယားရှိ ရုရှားရေတပ်စခန်းကို ယူကရိန်းက ခရုဇ်ဒုံးကျည်များဖြင့် ပစ်ခတ်တိုက်ခိုက်ခဲ့သည်။

အဆိုပါ ပစ်ခတ်တိုက်ခိုက်မှုတွင် ရုရှား ရေငုတ်သင်္ဘောတစ်စီး နှင့် ရေတပ်သင်္ဘောကျင်းတွင် ပြင်ဆင်နေသော Minsk ကမ်းတက်ရေယာဉ်ကြီးတစ်စီး မီးလောင်ပျက်စီးသွားခဲ့သည်။

ရန်သူ့ရေငုပ်သင်္ဘောတစ်စီးကို ရေငုပ်သင်္ဘောဖျက်လက်နက် အသုံးပြုခြင်းမရှိဘဲ သာမန် ခရုဇ်ဒုံးကျည်ဖြင့် ပစ်ခတ်ဖျက်ဆီးမှု ပြုလုပ်နိုင်ခြင်းမှာ ကမ္ဘာပေါ်တွင် ယူကရိန်းနိုင်ငံက ပထမဦးဆုံး အဖြစ် သမိုင်းမှတ်တမ်းရေးထိုးသွားခဲ့သည်။

ယူကရိန်းလက်နက်ကိုင်တပ်ဖွဲ့တွင် P-8A Poisedon သို့မဟုတ် P-3 Orion ကဲ့သို့ ရေငုပ်သင်္ဘောပစ် တိုက်လေယာဉ်များ ပိုင်ဆိုင်ထားခြင်း မရှိသော်လည်း ယူကရိန်းသည် ခရုဇ်ဒုံးကျည်များဖြင့် ရုရှားရေငုပ်သင်္ဘောကို ပစ်ခတ်ဖျက်ဆီးပစ်နိုင်ခဲ့ခြင်း ဖြစ်သည်။

ယခု ပစ်ခတ်မှုကို ဗြိတိသျှလုပ် Storm Shadow ခရုဇ်ဒုံးကျည် သို့မဟုတ် ပြင်သစ်လုပ် SCALP EG ဒုံးကျည်ဖြင့် ပြုလုပ်နိုင်ဖွယ်ရှိသည်ဟု ခန့်မှန်းကြသည်။ Sky News သတင်းဌာနကမူ ဗြိတိသျှတို့​၏ စတွမ်း ရှဲဒိုး ( Storm Shadow ) ခရုဇ်ဒုံးကျည်ဖြင့် ပစ်ခတ်ခဲ့သည်ဟု ဖော်ပြသည်။

အဆိုပါ ဒုံးကျည်များကို Su-24 M အမျိုးအစား ရှေ့တန်းဗုံးကြဲလေယာဉ်ဖြင့် သယ်ဆောင်ကာ ပစ်ခတ်ခဲ့ခြင်းဖြစ်သည်ဟု ဆိုသည်။

ယူကရိန်းလက်နက်ကိုင်တပ်ဖွဲ့အနေဖြင့် ရန်သူ့ရေငုပ်သင်္ဘောများကို ရှာဖွေထောက်လှမ်းနိုင်သည့် ပစ္စည်းကိရိယာ ပိုင်ဆိုင်ထားခြင်းလည်း မရှိပေ။ ထို့ကြောင့် ပစ်မှတ်ကို တိုက်ခိုက်နိုင်ရန် တစ်ခုတည်းသော နည်းလမ်းမှာ ပစ်မှတ်သည် ရေအောက်တွင်မရှိဘဲ ရေပြင်ပေါ် ရှိနေချိန်ဖြစ်သည်။

ထိုသို့ပစ်ခတ်နိုင်ရန် ညအချိန်ကို ရွေးချယ်ခဲ့ကြောင်းနှင့် တိုက်လေယာဉ်ကို အသုံးပြုခဲ့ကြောင်း ယူကရိန်းလေတပ်က ပြောဆိုသည်။

သို့သော် တိုက်ခိုက်ရာတွင် အသုံးပြုသည့် ခရုဇ်ဒုံးကျည်သည် မည်သည့်အမျိုးအစားဖြစ်သည်ကို အတိအကျ မသိရှိရဟုဆိုသည်။

တိုက်ခိုက်မှုကြောင့် ရုရှားတို့​၏ ဘက်စုံသုံး ဒီဇယ်-လျှပ်စစ်စွမ်းအင် ရေငုပ်သင်္ဘော Rostov-on -Don ထိမှန်ပျက်စီးခဲ့သည်။ ဒေါ်လာ သန်း ၃၀၀ တန်ဘိုးရှိပြီး 636 Varshavyanka စီမံကိန်းအရ တည်ဆောက်ခဲ့သော ရေငုပ်သင်္ဘောဖြစ်သည်။

အဆိုပါ ရေငုပ်သင်္ဘောတွင် Kalibr ခရုဇ်ဒုံးကျည်များ တပ်ဆင်ထားသည်။ ရေငုပ်သင်္ဘောမှာ Sevastopol ရေတပ်သင်္ဘောကျင်းတွင် ပြင်ဆင်ရန် ရပ်နားထားခြင်းဖြစ်သည်။

အခြားတိုက်ခိုက်ခံရသော သင်္ဘောမှာ Minsk ကမ်းတက်သင်္ဘောကြီးဖြစ်သည်။ ပျက်စီးထိခိုက်မှု ပမာဏကို မမှန်းဆနိုင်သော်လည်း အလုံးစုံ ပျက်စီးမသွားသည့်တိုင်အောင် နှစ်အတန်ကြာအထိ တိုက်ပွဲဝင်နိုင်တော့မည်မဟုတ်ဟု ဆိုသည်။

NN-27

ref: Defence Express.