အစ္စရေးက ဉာဏ်ရည်တုနည်းပညာသုံးမျိုးဆက်သစ် ဘာရက်အေအိုင်တင့်ကား ထုတ်ပြ

(လူကိုယ်တိုင် အပြင်ထွက်ကြည့်စရာမလိုဘဲ တိုက်ပွဲဝင်နိုင်စွမ်းရှိ)

အစ္စရေးနိုင်ငံက တီထွင်ထုတ်လုပ်လိုက်သည့် ဉာဏ်ရည်တုနည်းပညာသုံး( Artificially Intellengent ) တင့်ကားသစ်တစ်မျိုးကို အစ္စရေးကာကွယ်ရေးဝန်ကြီးဌာနက အင်္ဂါနေ့တွင် ထုတ်ဖော်ပြသလိုက်သည်။

ဘာရက် (Barak) ခေါ် " လျှပ်စီး" ဟု အမည်ပေးထားသည့် အဆိုပါ တင့်ကားသစ်သည် အေအိုင် ( Artificially Intelligent ) နည်းပညာသုံး မျိုးဆက်သစ် တင့်ကားအမျိုးအစားဖြစ်ပြီး အေအိုင်အခြေခံ အာရုံစနစ်နှင့် လုပ်ဆောင်မှုများ ပါဝင်သလို ၃၆၀ ဒီဂရီအထိ လှည့်ပတ်ကြည့်ရှုနိုင်သော တင့်ကားမောင်းသူအတွက် ယာဉ်မောင်း ခမောက် ( Pilot's helmet ) လည်း ပါဝင်ပြီး တင့်ကားအတွင်း လက်နှိပ်စကရင်မျိုးစုံနှင့် ထိန်းချုပ်ရေးစနစ်လည်း ပါဝင်သည်ဟု သိရသည်။

" ယုန်ကစ်ပူးစစ်ပွဲ နှစ် ၅၀ ပြည့်တဲ့ ဒီနေ့မှာ ဂုဏ်ယူစရာ တင့်ကားသစ်တစ်မျိုးကို ကျွန်တော်တို့ ပြသနိုင်ခဲ့တယ်။ ဒါဟာ သူရဲကောင်းတို့ရဲ့ စစ်ပွဲအတွင်း သံချပ်ကာတပ်တွေနဲ့ နိုင်ငံကို ကာကွယ်ပေးခဲ့တဲ့ အထိမ်းအမှတ်လည်းဖြစ်တယ်။ တင့်ကားတွေရဲ့ အစွမ်းထက်မှုဟာ မြေပြင်စိုးမိုးမှုရဲ့ အခြေခံ ဖြစ်တယ်ဆိုတဲ့ သက်သေကို ကျွန်တော်တို့ လက်ခံရရှိခဲ့ကြတယ်" ဟု အစ္စရေးကာကွယ်ရေး ဝန်ကြီး ယော့ဗ် ဂဲလန့်က ပြောကြားခဲ့သည်။

ယခု ထုတ်လုပ်လိုက်သည့် အစ္စရေးတို့​၏ မျိုးဆက်သစ် အေအိုင်တင့်ကားသည် စစ်မြေပြင်​၏ အနေအထားအမျိုးမျိုးကို အခြေခံ၍ အဆင့်မြင့်အမိန့်ပေးကွပ်ကဲသူကိုယ်တိုင် တင့်ကားအတွင်း လိုက်ပါစရာမလိုဘဲ လိုအပ်သလို စေခိုင်းနိုင်စွမ်းရှိသည်ဟု ဆိုသည်။

သံမဏိမြင်ကွင်း ( Iron Vision) ဟု ခေါ်တွင်သည့် တင့်ကား​၏ ယာဉ်မောင်း ခမောက် ( Pilot's helmet) သည် ယာဉ်မောင်းအား အပြင်ဘက်ရှိမြင်ကွင်းများကို ထွင်းဖောက်မြင်နိုင်အောင် လုပ်ဆောင်ပေးပြီး ရှေ့တွင်ရှိသည့် အတားအဆီးများနှင့် မမြင်ရသည့်အရာများကို ဖြတ်ကျော်နိုင်သည့်အတွက် စစ်ဆင်ရေး လုံခြုံမှုကို ပိုမိုပေးနိုင်သည်ဟု ဆိုသည်။

တင့်ကားမောင်းသူအနေဖြင့် တင့်ကားအမိုးဖုံးကိုဖွင့်ကာ ပြင်ပသို့ ကြည့်ရန် မလိုသည့်အတွက် ရန်သူ​၏ ချောင်းမြောင်းပစ်ခတ်မှုအန္တရာယ်မှလည်း ကင်းဝေးသွားသည်။

ထို့ကြောင့် ဘာရက် တင့်ကားများ​၏ စွမ်းဆောင်ရည်ဖြင့် ရန်သူနှင့် အနီးကပ်တိုက်ပွဲများ ဆင်နွှဲနိုင်မည် ဖြစ်သည်။ အလားတူ တင့်ကားအမြောက်၊ မြင်ကွင်းကြည့်ရှုမှု နှင့် ညကြည့်ကိရိယာများကိုလည်း အဆင့်မြင့်တပ်ဆင်ထားသည်။

" ဘာရက် တင့်ကားတွေဟာ ကမ္ဘာပေါ်မှာ အဆင့်အမြင့်ဆုံး တိုက်ခိုက်ရေး ယန္တယားတွေဖြစ်ပြီး မြေပြင်တပ်ဖွဲ့တွေရဲ့ တိုက်ခိုက်ရေး စွမ်းဆောင်ရည်ကို အေအိုင်နည်းပညာနဲ့အတူ မြှင့်တင်ပေးနိုင်ခဲ့တယ်" ဟု အစ္စရေးကာကွယ်ရေးဝန်ကြီးဌာန ညွှန်ကြားရေးမှူးချုပ် ဗိုလ်မှူးချုပ် အီရယ် ဇမိုင်းယားက ပြောကြားခဲ့သည်။

NN-27

Ref:(ANI/TPS)