အဇာဘိုင်ဂျန်၏ လက်အောက်တွင်မနေလိုခြင်းနှင့် လူမျိုးတုန်းသတ်ဖြတ်မှု အန္တရာယ် စိုးရိမ်သည့်အတွက် နာဂါနို ကရာဘက်ဒေသမှ အာမေးနီးယားလူမျိုးနွယ်စု ၁၂၀၀၀၀ အာမေးနီးယားနိုင်ငံသို့ ပြန်သွားမည်ဖြစ်ကြောင်း ခွဲထွက်ရန်ကြိုးပမ်းနေသော နာဂါနိုကရာဘက် ခေါင်းဆောင်ပိုင်းက တနင်္ဂနွေနေ့က ပြောကြားလိုက်သည်။
အာမေးနီးယားဝန်ကြီးချုပ်ကလည်း နာဂါနို ကရာဘက်ရှိ အာမေးနီးယားလူမျိုးများ ပြန်လာမည်ဖြစ်ကြောင်း နှင့် ၄င်းတို့ကို လက်ခံကြိုဆိုရန် အသင့်ရှိနေကြောင်း ပြောကြားသည်။
ပြီးခဲ့သည့်အပတ်က အဇာဘိုင်ဂျန်တပ်များနှင့် ဖြစ်ပွါးခဲ့သည့် နာဂါနိုကရာဘက်ဒေသ တိုက်ပွဲအတွင်း ခွဲထွက်အဖွဲ့များ အရေးနိမ့်ပြီးနောက် ယခုကဲ့သို့ နာဂါနိုဒေသရှိ အာမေးနီယားလူမျိုးနွယ်စုများ ပြန်လာမည်ဟု ဆိုခြင်းဖြစ်သည်။
အာမေးနီးယန်း ကရာဘက်ဒေသမှာ အဇာဘိုင်ဂျန်၏ အစိတ်အပိုင်းအဖြစ် နိုင်ငံတကာက အသိအမှတ် ပြုထားသော်လည်း လွန်ခဲ့သည့်ရက်များအထိ အဇာဘိုင်ဂျန်၏ ထိန်းချုပ်မှုအောက်မှ ကင်းကွာနေခဲ့သည်။
ပြီးခဲ့သည့် စက်တင်ဘာ ၂၀ ရက်နေ့က နာဂါနိုကရာဘက်ဒေသမှ ခွဲထွက်လက်နက်ကိုင်အဖွဲ့ကို အဇာဘိုင်ဂျန်တပ်များက အလုံးအရင်းဖြင့် ဝင်တိုက်ပြီးနောက် ခွဲထွက်အဖွဲ့များ လက်နက်ချခဲ့ကြသည်။
အဇာဘိုင်ဂျန်က ထိုဒေသရှိ အာမေးနီးယားလူမျိုးများ၏ အခွင့်အရေး နှင့် နယ်မြေပေါင်းစည်းမှုကို အာမခံမည်ဟု ဆိုသော်လည်း ဒေသခံများက ဖိနှိပ်ခံရမည်ကို စိုးရိမ်နေကြသည်။
“ ကျွန်တော်တို့လူမျိုးတွေ အဇာဘိုင်ဂျန်အောက်မှာ မနေချင်ကြဘူး။ ၉၉ ဒဿမ ၉ ရာခိုင်နှုန်းက ကျွန်တော်တို့ရဲ့ သမိုင်းဝင်နေရာက ထွက်ခွါရပါတော့မယ်” ဟု အာ့ဆက်သမ္မတနိုင်ငံ၊ သမ္မတအကြံပေး ဒေးဗစ် ဘာဘာရမ်က ဆိုသည်။
( ကရာဘက်ဒေသကို ခွဲထွက်အုပ်စုများက အာ့ဆက်သမ္မတနိုင်ငံအဖြစ်ကြေညာထားသည်။ )
ကရာဘက်အာမေးနီးယားခေါင်းဆောင်များက အဇာဘိုင်ဂျန်တပ်များ၏ ထိုးစစ်ကြောင့် အိုးမဲ့အိမ်မဲ့ ဖြစ်သွားကြသူများ နှင့် ထိုဒေသမှ ထွက်ခွါလိုသူများအားလုံးကို ရုရှားငြိမ်းချမ်းရေး ထိန်းသိမ်းရေးတပ်များက အာမေးနီးယားအထိ လိုက်ပါစောင့်ရှောက် ပို့ဆောင်ပေးမည်ဟု ကြေညာချက်တွင် ဖော်ပြထားသည်။
NN-27
ref:financial express