ထိုင်းအမျိုးသားရဲတပ်ဖွဲ့ ဒုတိယရဲချုပ်နေအိမ် ဝင်ရောက်ရှာဖွေ စီးနင်းခံရ

“အွန်လိုင်း လောင်းကစားလုပ်ငန်းနှင့် ပတ်သက်နေဟုဆို”

 

အွန်လိုင်းလောင်းကစားလုပ်ငန်းများနှင့် ပတ်သက်နေသည့် အထောက်အထားများ တွေ့ရှိရပြီးနောက် ထိုင်းအမျိုးသားရဲတပ်ဖွဲ့ ဒုတိယ ရဲချုပ် ရဲဗိုလ်ချုပ်ကြီး ဆူရာချိတ်၏ နေအိမ်အား ယနေ့နံနက်ပိုင်းက ထိုင်းနိုင်ငံ ဆိုင်ဘာရာဇဝတ်မှု စုံစမ်းစစ်ဆေးရေးဗျူရို(CCIB) ရဲတပ်ဖွဲ့ဝင်များက ဝင်ရောက်စီးနင်းပြီး ရှာဖွေမှုများ ပြုလုပ်ခဲ့သည်ဟု သိရသည်။

 

ဆိုင်ဘာ ရာဇဝတ်မှုရဲများသည် တရားရုံး၏ ရှာဖွေအမိန့်ကို ကိုင်ဆောင်လျှက် အကျင့်ပျက်ခြစားမှုတိုက်ဖျက်ရေး ဌာနခွဲရဲများ နှင့် ဘန်ကောက်မြို့တော် အထူးစစ်ဆင်ရေး ကွန်မင်ဒိုရဲများ လိုက်ပါလျှက် ဒုတိယရဲချုပ်နေအိမ်သို့ ရောက်ရှိလာကြခြင်းဖြစ်သည်။

 

အလားတူ ရဲကလပ် အနောက်ဘက် ဝိဗ္ဗဝဒီ ၆၀ လမ်းရှိ နေအိမ် ငါးလုံးကိုလည်း ရှာဖွေမိန့်ဖြင့် ဝင်ရောက် ရှာဖွေမှုများ ပြုလုပ်ခဲ့ကြသည်။

 

အဆိုပါနေအိမ်များမှာ ဒုရဲချုပ် ဆူရာချိတ်၏ လက်ထောက်များ နေထိုင်ကြသည်ဟု ဆိုသည်။ နံနက် ၈ နာရီအချိန် ဆိုင်ဘာရဲများ ရောက်ရှိလာချိန်တွင် ဒုရဲချုပ် ဆူရာချိတ်အား ဘောင်းဘီတို တီရှပ်နှင့် တွေ့ရပြီး သူသည် ထိုင်းရဲတပ်ဖွဲ့၏ ဒုတိယအကြီးဆုံးဖြစ်၍ အစပထမပိုင်းတွင် အိမ်ထဲသို့ အဝင်မခံဟု ဆိုသည်။

 

ရဲတပ်ဖွဲ့ဝင်များသည် ဆိုင်ဘာရာဇဝတ်မှု စုံစမ်းစစ်ဆေးရေးအဖွဲ့ CCIB မှ ရဲချုပ် ဝိုရာဝတ် ဝါတနာခွန်ဘန်ချာ ရောက်လာသည်အထိ စောင့်ဆိုင်းနေခဲ့ရပြီးမှ အိမ်ထဲသို့ ဝင်ရောက်ရှာဖွေခွင့် ရခဲ့ကြသည်။

 

ဘန်ကောက်မြို့ ဝဗ္ဗဝဒီ ၆၀ လမ်းရှိ ရဲဗိုလ်ချုပ်ကြီး ဆူရာချိတ်၏ နေအိမ်အပါအဝင် ပက်ချာဘူရီ၊ တမွတ်ပရာကန်၊ ခွန်ခမ်း၊ အူဒုံသာနီ နှင့် ဆာရာဘူရီ စသည့် ပြည်နယ် ငါးခုမှ နေအိမ် ၃၀ ကို တနင်္လာနေ့တွင် တစ်ပြိုင်နက်တည်း ရှာဖွေမှု ပြုလုပ်ကြသည်ဟု ဆိုသည်။

 

အခြားသော နေအိမ်များမှာ ဆူရာချိတ်နှင့် နီးစပ်သော ရဲအရာရှိငယ်များ ပိုင်ဆိုင်ပြီး ၄င်းတို့အားလုံး မှာ လာအိုနိုင်ငံတွင် လုပ်ကိုင်နေသည့် တစ်ဘီလျံ ဘတ် ပမာဇဏရှိ အွန်လိုင်းလောင်းကစားလုပ်ငန်းနှင့် ပတ်သက်နေကြသည်ဟု ဆိုသည်။

 

Big Cleaning Day စစ်ဆင်ရေးဟု အမည်ပေးထားသည့် တင်္နလာနေ့စစ်ဆင်ရေးတွင် ရဲဗိုလ်ချုပ်ကြီး ဆူရာချိတ်၏ လက်အောက်မှ ရဲမှူးချုပ်တစ်ဦး၊ရဲမှူးကြီးတစ်ဦးအပါဝင် ရဲအရာရှိအများအပြား ဖမ်းဆီးခံရသည်ဟု သိရသည်။

 

၄င်းတို့အားလုံးကို ဆာထွန်လမ်းရှိ မြို့တော်ရဲတပ်ဖွဲ့ ၊ အမှတ် ၅ ဌာနချုပ်ရုံးသို့ စုံစမ်းစစ်ဆေးရန် ခေါ်ဆောင်သွားသည်ဟု ဆိုသည်။

 

NN-27

ref: Bangkok post