အစ္စရေး၏ လေကြောင်း တိုက်ခိုက်မှုအတွင်း ဟားမတ်စ်ထိပ်တန်းတပ်မှူးတစ်ဦးသေဆုံး

ဂါဇာတွင် ဝေဟင်စစ်ဆင်ရေးကို ဦးဆောင်ခဲ့သည့် ဟားမတ်စ်အဖွဲ့၏ အကြီးတန်း တပ်မှူးတစ်ဦး အစ္စရေးလ် လေကြောင်းတိုက်ခိုက်မှုအတွင်း သေဆုံးသွားကြောင်း အစ္စရေးစစ်တပ်က စနေနေ့တွင် ပြောဆိုလိုက်သည်။

သေဆုံးသူမှာ Murad Abu Murad ဖြစ်ပြီး လွန်ခဲ့သည့် ရက်အနည်းငယ်က အစ္စရေးလ် လေကြောင်းတိုက်ခိုက်မှုအတွင်း သေဆုံးသွားခဲ့သည်ဟု ဆိုသည်။

ဟားမတ်စ်၏ ဝေဟင် စစ်ဆင်ရေးကို အဆိုပါ စစ်ဆင်ရေးစင်တာမှ ဆောင်ရွက်နေခြင်းဖြစ်ကာ အစ္စရေးလ်စစ်တပ်၏ လေကြောင်း တိုက်ခိုက်ရေး ဂျက်လေယာဉ်များက ၎င်းအား လုပ်ကြံသတ်ဖြတ် ခံခဲ့ရသည်ဟု အစ္စရေးစစ်တပ်က ပြောသည်။

သို့သော်လည်း အဆိုပါတပ်မှူး Murad Abu Murad သေဆုံးမှုကို ဟားမတ်စ်အဖွဲ့ထံမှ ချက်ခြင်း အတည်ပြုချက်မရှိသေးဟု သတင်းတွင် ဖော်ပြသည်။

အစ္စရေး၏ သမိုင်းတွင် လူအသေအပျောက်အများဆုံး တိုက်ခိုက်မှုအတွက် လက်တုံ့ပြန်သည့်အနေဖြင့် ဟားမတ်စ်ကို မြေပြင်ထိုးစစ်မစတင်မီတွင် အစ္စရေးက ၎င်းတို့အား ဘေးလွတ်ရာသို့ ရွှေ့ပြောင်းရန် သတိပေးခဲ့ပြီးနောက် ထောင်နှင့်ချီသော ပါလက်စတိုင်းတို့သည် စနေနေ့က ဂါဇာတောင်ပိုင်းသို့ ခိုလှုံရန် ထွက်ပြေးခဲ့ကြသည်။

လွန်ခဲ့သည့် တစ်ပတ်က ဟားမတ်စ် တိုက်ခိုက်ရေးသမား၏ တိုက်ခိုက်မှုကြောင့် လူပေါင်း ၁၃၀၀ ကျော် သေဆုံးပြီးနောက် အစ္စရေးက လက်တုံ့ပြန်ရန် ကြိုးပမ်းနေချိန်တွင် တစ်ပတ်နီးပါး အပြင်းအထန် ဗုံးကြဲတိုက်ခိုက်မှုသည် အစသာဖြစ်ကြောင်း အစ္စရေးဝန်ကြီးချုပ် ဘင်ဂျမင် နေတန်ယာဟု   (Benjamin Netanyahu) က သတိပေးခဲ့သည်။

အစ္စရေးမြေပြင်တပ်ဖွဲ့များသည် လွန်ခဲ့သည့် ၂၄ နာရီအတွင်း ဂါဇာကမ်းမြောင်ဒေသသို့ “အကြမ်းဖက်သမားများနှင့် လက်နက်ကိရိယာများ ကင်းစင်ရေး” နှင့် ပျောက်ဆုံးနေသူများကို ရှာဖွေရန် ကြိုးစားခဲ့ကြောင်း ၎င်းတပ်ဖွဲ့က ပြောကြားခဲ့သည်။ NN-30