- Web Master
- ၁၂ မေ ၂၀၂၄
“ဂါဇာဆေးရုံတွင် အလောင်းများပုံနေပြီး အလောင်းပတ်ရန် ပိတ်စ ကုန်သွားပြီဟုဆို”
အစ္စရေး နှင့် ဟားမတ်စ်တို့အကြား ဖြစ်ပွါးနေသော စစ်ပွဲမှာ အရှိန်အဟုန်မြင့်နေဆဲဖြစ်ပြီး အစ္စရေးတို့၏ လေကြောင်းတိုက်ခိုက်မှုများ ဆက်လက်တိုးမြှင့်နေဆဲဖြစ်သည်ဟု သိရသည်။အစ္စရေးတို့က မြောက်ပိုင်းတွင် ကျန်နေသေးသော ပါလက်စတိုင်းများကို တောင်ပိုင်းသို့ အမြန်ထွက်ပြေးကြရန် သတိပေးထားပြီး မထွက်ခွါဘဲ ကျန်နေသူများကို အကြမ်းဖက်သမားများနှင့် ပူးပေါင်းသူဟု သတ်မှတ်မည်ဟုဆိုသည်။
ယခုကဲ့သို့ သတိပေးရခြင်းမှာ မကြာမီပြုလုပ်တော့မည့် မြေပြင်ထိုးစစ်တွင် အရပ်သားများ ထိခိုက်မှု အနည်းဆုံးဖြစ်ရန်ရည်ရွယ်သည်ဟု ဆိုသည်။
ဂါဇာဆေးရုံမှ နောက်ဆုံးထွက်ပေါ်လာသော ဓါတ်ပုံတွင် ဆေးရုံဝင်းအတွင်း အလောင်းများ တန်းစီနေသည်ကို တွေ့မြင်ရသည်။
ထိုအထဲတွင် ကလေးငယ် ၁၂ဦး ပါဝင်သည်။ ဆေးရုံဝန်ထမ်းတစ်ဦး၏ ဘီဘီစီသို့ ပြောကြားချက်အရ ဂါဇာဆေးရုံတွင် လူသေအလောင်းပတ်ရန် ပိတ်စအဖြူ ကုန်သွားပြီဟု သိရသည်။
ဟားမတ်စ်တို့၏ ထုတ်ပြန်ချက်အရ လွန်ခဲ့သည့် ၂၄ နာရီအတွင်း ပါလက်စတိုင်း ၂၆၆ဦး သေဆုံးခဲ့ပြီး ၁၁၇ ဦးမှာ ကလေးငယ်များဖြစ်သည်ဟု ဆိုသည်။
အစ္စရေးဘက်ကမူ အကြမ်းဖက်သမားအများအပြားကို ပစ်ခတ်သတ်ဖြတ်နိုင်ခဲ့သည်ဟု ဆိုသည်။
ယနေ့တွင် ဂါဇာဒေသအတွက် နောက်ထပ် ကယ်ဆယ်ထောက်ပံ့ရေးပစ္စည်းများ တင်ဆောင်လာသည့် ထရပ်ကား ၁၇ စီး အီဂျစ် နှင့် ဂါဇာတောင်ပိုင်း ရာဖာ နယ်စပ်ဂိတ်သို့ ရောက်ရှိလာသည်ဟု အီဂျစ်သတင်းမီဒီယာများက ဖော်ပြသည်။
ယမန်နေ့ကလည်း ဂါဇာဒေသအတွက် ဆေးဝါး၊ အစားအစာ နှင့် ရေများ တင်ဆောင်လာသည့် ထရပ်ကား ၂၀ စီး ရာဖာနယ်စပ်ဂိတ်ကို ဖြတ်ကျော်ပြီး ရောက်ရှိလာခဲ့သည်။
ဂါဇာရှိ ဟားမတ်စ် ကျန်းမာရေးဝန်ကြီးဌာနက ထုတ်ပြန်သော စာရင်းအရ အောက်တိုဘာ(၇)ရက်မှစ၍ အစ္စရေးတို့၏ လေကြောင်းတိုက်ခိုက်မှုကြောင့် သေဆုံးခဲ့ရသည့် ပါလက်စတိုင်း ၄၆၅၁ ဦး ရှိသွားပြီဟု ဆိုသည်။
NN-27
ref:BBCWorld