ပိုမိုဆိုးရွားလာနေသော မြန်မာပြည်တွင်းစစ် ပဋိပက္ခအပေါ် ဝမ်းနည်းမိကြောင်း အင်ဒိုနီးရှား ကာကွယ်ရေးဝန်ကြီး ပြောကြား

အာဆီယံကာကွယ်ရေးဝန်ကြီးများ အစည်းအဝေးကို နိုဝင်ဘာ(၁၅)ရက်က အင်ဒိုနီးရှားနိုင်ငံ ဂျာကာတာမြို့တွင် ကျင်းပခဲ့ရာ အင်ဒိုနီးရှား ကာကွယ်ရေးဝန်ကြီး ပရာဘိုဝို ဆူဘီယန်တို က မြန်မာနိုင်ငံတွင် ဖြစ်ပေါ်နေသော ပြည်တွင်းစစ်အခြေအနေ ပိုမိုဆိုးရွားလာနေသည့်အတွက် ဝမ်းနည်းမိကြောင်း အဖွင့်မိန့်ခွန်းတွင် ပြောကြားသွားခဲ့သည်။

မြန်မာနိုင်ငံမှအပ ကျန်အာဆီယံနိုင်ငံအားလုံးမှ ကာကွယ်ရေးဝန်ကြီးများတက်ရောက်ခဲ့သည့် အဆိုပါအစည်းအဝေးတွင် ပရာဘိုဝိုက အစ္စရေး-ဟားမတ်စ် စစ်ပွဲကို အမြန်ဆုံးရပ်စဲပြီး လူသားချင်းစာနာမှု အကူအညီပေးရေး လမ်းကြောင်းတစ်ခုဖွင့်ပေရန် တိုက်တွန်းခဲ့သလို အငြင်းပွါးနေသော တောင်တရုတ်ပင်လယ်အရေးတွင် နိုင်ငံတကာဥပဒေများကို လိုက်နာပြီး လွတ်လပ်စွာ ရေကြောင်း လေကြောင်းသွားလာခွင့် ရရှိရေး၊ ပဋိပက္ခရှောင်ရှားရေးတို့ကို တိုက်တွန်းသွားခဲ့သည်။

သို့သော် မြန်မာ့အရေး နှင့် ပတ်သက်၍ တစ်စုံတစ်ရာ ဆုံးဖြတ်ချက်မပေးနိုင်ခဲ့ဘဲ မြန်မာနိုင်ငံတွင် တစ်နေ့တခြား ဆိုးရွားလာနေသည့် အခြေအနေများအတွက် ဝမ်းနည်းမိကြောင်းသာ ပြောကြားခဲ့သည်။

“ မြန်မာနိုင်ငံမှာ တစ်နေ့တခြား အခြေအနေတွေ ဆိုးရွားလာတဲ့အတွက် ကျွန်တော်တို့ ဝမ်းနည်းရပါတယ်။ မြန်မာနိုင်ငံမှာ ဖြစ်ပေါ်နေတဲ့ အခြေအနေတွေကို ခိုင်မာပြီး ငြိမ်းချမ်းတဲ့နည်းလမ်းနဲ့ အဖြေရှာဖို့ အာဆီယံအဖွဲ့ဝင်တွေကို အင်ဒိုနီးရှားက တိုက်တွန်းပါတယ်” ဟု အင်ဒိုနီးရှား ကာကွယ်ရေး ဝန်ကြီး ပရာဘိုဝိုက ပြောကြားခဲ့သည်။

အာဆီယံ ကာကွယ်ရေးဝန်ကြီးများအစည်းအဝေးသို့ ဆွေးနွေးဖက်နိုင်ငံများဖြစ်သော အမေရိကန် ကာကွယ်ရေးဝန်ကြီး အယ်လွိုက် အော်စတင်၊ ရုရှားကာကွယ်ရေးဝန်ကြီး ဆာဂေး ရှိုအီဂူ၊ တရုတ်လက်ထောက်ကာကွယ်ရေးဝန်ကြီး ကျင်ကျန်ဖန်းတို့လည်း တက်ရောက်ကြသည်ဟု သိရသည်။

မြန်မာစစ်ကောင်စီသည် ၂၀၂၁ ဖေဖော်ဝါရီ ၁ ရက်က အရပ်သားအစိုးရထံမှ အာဏာသိမ်းခဲ့ပြီးနောက် အင်ဒိုနီးရှား နိုင်ငံတွင် ပြုလုပ်သော အာဆီယံခေါင်းဆောင်များအစည်းအဝေးတွင် အကြမ်းဖက်မှု လျှော့ချရေး၊ အာဆီယံ အထူးကိုယ်စားလှယ်နှင့်အတူ ပဋိပက္ခတွင် ပါဝင်ပတ်သက်နေကြသူများ တွေ့ဆုံဆွေးနွေးရေး၊ နေရပ်စွန့်ခွာ ဒုက္ခသည်များကို အကူအညီပေးရေး စသည့် သဘောတူညီချက် (၅)ရပ်ကို လက်မှတ်ရေးထိုးခဲ့သော်လည်း အကောင်အထည်ဖော်မှု လုံးဝနီးပါး မရှိသည့်အတွက် အာဆီယံနိုင်ငံများက ခေါင်းဆောင်များတက်ရောက်သည့် အစည်းအဝေးအားလုံးတွင် မြန်မာအား တက်ရောက်ခွင့် ပိတ်ပင်ထားခဲ့သည်။ ထို့ကြောင့် ယခုကျင်းပသော အာဆီယံကာကွယ်ရေး ဝန်ကြီးများအစည်းအဝေးတွင် မြန်မာနိုင်ငံပါဝင်ခြင်း မရှိပေ။ NN-27

ref:CNA