ဖိလစ်ပိုင်နိုင်ငံတောင်ပိုင်းတွင် အင်အားပြင်းထန်သောငလျင်လှုပ်ခတ်မှုကြောင့် ဆူနာမီသတိပေးချက် ထုတ်ပြန်ခဲ့ရပြီး ပြန်လည်ရုပ်သိမ်းခဲ့ရ

ဖိလစ်ပိုင်နိုင်ငံတောင်ပိုင်း မင်ဒါနာအိုကျွန်းတွင် ဒီဇင်ဘာ (၂)ရက် ညပိုင်းက အင်အား ၇ ဒဿမ ၅ မဂ္ဂနီကျု ပြင်းအားရှိ ငလျင်ကြီးတစ်ခု လှုပ်ခတ်ခဲ့ပြီးနောက် အမေရိကန် ဆူနာမီ သတိပေးစနစ်က ဆူနာမီရေလှိုင်း အန္တရာယ် သတိပေးချက် ထုတ်ပြန်ခဲ့ရသည်။

 ဖိလစ်ပိုင် နှင့် ဂျပန်ကမ်းခြေတို့တွင် အမြင့် ၉ ပေကျော်အထိ ဆူနာမီရေလှိုင်း ဖြစ်ပေါ်နိုင်ကြောင်း ကနဦး သတိပေးခဲ့သော်လည်း ထုတ်ပြန်ပြီး မကြာမီ ဆူနာမီရေလှိုင်းအန္တရာယ်မဖြစ်နိုင်တော့ကြောင်း ထပ်မံထုတ်ပြန်ခဲ့သည်။

ဖိလစ်ပိုင်တောင်ပိုင်းတွင် နောက်ဆက်တွဲငလျင်များ ဆက်တိုက်လှုပ်နေစဉ် ကယ်ဆယ်ရွှေ့ပြောင်းရေး လုပ်ငန်များ အရေးပေါ်လုပ်ဆောင်နေရပြီး ငလျင်ကြောင့် ထိခိုက်ပျက်စီးမှုနှင့် သေဆုံးဒဏ်ရာရသူ စာရင်းကို မသိရှိရသေးဟု ဆိုသည်။

ဖိလစ်ပိုင် မီးတောင် နှင့် ငလျင်ဆိုင်ရာတက္ကသိုလ် Phivolcs ကမူ ဆူနာမီသတိပေးချက် ရုပ်သိမ်းခြင်း မရှိသေးဘဲ ဆက်လက်သတိပေးထားသည်။

ဂျပန်နိုင်ငံ တိုကျိုမြို့တောင်ဘက်မိုင် ၁၈၀အကွာရှိ ဟာချီဂျိုဂျီးမား ကမ်းခြေတွင် အမြင့် ၃၀ စင်တီမီတာရှိ ရေလှိုင်းများ တွေ့ရှိရသည်ဟု ဂျပန်မိုးလေဝသအေဂျင်စီက ကြေညာသည်။

ဖိလစ်ပိုင် မီးတောင်နှင့်ငလျင် တက္ကသိုလ်က ဆူရီဂါအို နှင့် ဒါဗာအို အိုရီယင်တယ် ပြည်နယ် ကမ်းခြေအနီး နေထိုင်ကြသူများကို ကုန်းတွင်းပိုင်းသို့ ပြောင်းရွှေ့ကြရန် သတိပေးထားသည်။

သို့သော် အဆိုပါပြည်နယ်နှစ်ခုမှာ ကျေးလက်ဒေသများဖြစ်ပြီး လူဦးရေထူထပ်ခြင်းမရှိသည့်အတွက် စိုးရိမ်စရာ မရှိဟုဆိုသည်။

ပြင်းအား ၆ ဒဿမ ၅ မဂ္ဂနီကျုရှိ နောက်ဆက်တွဲငလျင် အပါအဝင် နောက်ဆက်တွဲငလျင်အကြိမ်ရေ နှစ်ဆယ်ကျော် လှုပ်ခတ်ခဲ့သော အဆုပါပြည်နယ်မှ လူဦးရေ ၄၄၀၀၀ နေထိုင်သည့် ဟီနာတူအန်မြို့တွင် လျှပ်စစ်ဓါတ်အား ပြတ်တောက်သွားပြီး လူအများကို ဘေးလွတ်ရာကုန်းတွင်းပိုင်းသို့ ရွှေ့ပြောင်းစေခဲ့ကြောင်း ရဲတပ်ဖွဲ့အကြီးအကဲ ရေမတ် ဂျင်တယ်လန်က ပြောကြားသည်။

ဖိလစ်ပိုင်နိုင်ငံသည် မီးတောင်များဝန်းရံလျှက်ရှိသည့် ပစိဖိတ် မီးစက်ဝိုင်း (Ring of Fire) အတွင်း ကျရောက်နေသဖြင့် မကြာခဏ ငလျင်လှုပ်ခတ်လေ့ရှိသည်ဟု သိရသည်။ NN-27

ref:can