တိုကျို ဟာနေဒါလေဆိပ်တွင် ဂျပန်ခရီးသည်တင်လေယာဉ်တစ်စီး မီးလောင်ပေါက်ကွဲ၊ ခရီးသည်နှင့်လေယာဉ်ဝန်ထမ်း ၃၇၉ဦးလုံးကယ်တင်နိုင်

ဂျပန်နိုင်ငံ တိုကျိုမြို့ ဟာနေဒါ လေဆိပ်တွင် ယနေ့ဇန်နဝါရီ ၂ ရက်နေ့ ညနေပိုင်းက ဂျပန်ခရီးသည်တင်လေယာဉ်တစ်စီး မီးလောင် ပေါက်ကွဲမှု ဖြစ်ပွားခဲ့သည်။

မီးလောင်ပေါက်ကွဲမှုဖြစ်ပွားရခြင်းမှာ ဂျပန်ကမ်းခြေစောင့်တပ်မှ လေယာဉ်တစ်စီးနှင့် လေဆိပ် ပြေးလမ်းပေါ်တွင် တိုက်မိသောကြောင့် ဖြစ်သည်ဟု ကနဦးသတင်းများက ဆိုသည်။

ဂျပန် NHK သတင်းဌာနက တိုက်ရိုက်ထုတ်လွှင့်သော ရုပ်သံများအရ လေဆိပ်ပြေးလမ်းပေါ်တွင် ပေါက်ကွဲပြီး မီးစွဲလောင်နေသော ခရီးသည်တင်လေယာဉ်ကို မြင်တွေ့ကြရသည်။

ဂျပန်ခရီးသည်တင်လေယာဉ်ပေါ်တွင် လေယာဉ်ဝန်ထမ်း နှင့် ခရီးသည် စုစုပေါင်း ၃၇၉ ဦး လိုက်ပါလာခဲ့ရာ အားလုံး အချိန်မီ ကယ်တင်နိုင်ခဲ့ပြီး အသက်ဘေးမှ လွတ်မြောက်ခဲ့သည်ဟု သိရှိရသည်။

ဂျပန်လေကြောင်းလိုင်း​မှ A-350 အဲယားဘတ်စ်အမျိုးအစား ခရီးသည်တင်လေယာဉ်သည် ခရီးစဉ်အမှတ် JL516 ဖြင့် ဟော့ကိုင်းဒိုကျွန်း၊ ဆပ်ပိုရိုမြို့ ချီတိုဆီလေဆိပ်သစ်မှ တိုကျို ဟာနေဒါလေဆိပ်သို့ ပျံသန်းဆင်းသက်လာစဉ် ညနေ ၅:၄၇ နာရီအချိန်တွင် လေဆိပ် ပြေးလမ်းပေါ်၌ ဂျပန်ကမ်းခြေစောင့်လေယာဉ်နှင့် တိုက်မိပြီး မီးလောင်ပေါက်ကွဲသွားခြင်းဖြစ်သည်။

လေယာဉ်တစ်စီးလုံး မီးလောင်သွားပြီး လေဆိပ်ပြေးလမ်းပေါ်တွင် မီးသတ်သမားများက ပြင်းအားမြင့် ရေပန်းများဖြင့် ရေဖျန်းပြီး မီးငြှိမ်းသတ်နေကြသည်ကို ရုပ်သံသတင်းများတွင် မြင်တွေ့ကြရသည်။

လေယာဉ်မီးလောင်မှုဖြစ်ပွားသဖြင့် ဟာနေဒါလေဆိပ်ကို ပိတ်ထားလိုက်ရသည်ဟု သိရသည်။ ယခု သတင်းရေးနေချိန်ထိ မီးလောင်နေသည့် လေယာဉ်ကို မီးငြှိမ်းသတ်နေကြဆဲဖြစ်သည်။

 NN-27

ref:NHK/can