ပြီးခဲ့သည့်နှစ်ရက်က အီရန်နိုင်ငံက ပါကစ္စတန်ရှိ အကြမ်းဖက်အုပ်စုပစ်မှတ်များအားဒုံးကျည်ဖြင့် ပစ်ခတ်တိုက်ခိုက်မှုကို လက်တုန့်ပြန်သည့်အနေဖြင့်ပါကစ္စတန်က အီရန်နယ်မြေအတွင်းကို ကြာသပတေးနေ့ကဒုံးပျံဖြင့် ပြန်လည်ပစ်ခတ်ရာအမျိုးသမီး နှင့် ကလေးငယ် ၉ ဦး သေဆုံးသွားသည်ဟု သိရှိ၇သည်။

ယခုကဲ့သို့ပါကစ္စတန်၏ လက်တုန့်ပြန်တိုက်ခိုက်မှုကြောင့် အီရန် နှင့် ပါကစ္စတန်တို့အကြားတင်းမာမှုဖြစ်ပေါ်ခဲ့ပြီး အီရန်က တီဟီရန်ရှိ ပါကစ္စတန်သံအမတ်ကိုခေါ်ယူတွေ့ဆုံကာ သတိပေးခဲ့သည်ဟု သိ၇သည်။

အီရန်IRNA သတင်းဌာန၏ဖော်ပြချက်အ၇ ဆစ္စတန်-ဘလူချီစတန် ပြည်နယ်တွင် ပါကစ္စတန်တို့၏တိုက်ခိုက်မှုကြောင့် လူ ၉ ဦး သေဆုံးခဲ့ရာတွင် အမျိုးသမီး သုံးဦးနှင့် ကလေးငယ် လေးဦးပါဝင်သည်ဟုဆိုသည်။

ပါကစ္စတန်တို့၏တိုက်ခိုက်မှုမှာ လွန်ခဲ့သည့် နှစ်ရက်က အီရန်နိုင်ငံက ပါကစ္စတန်ရှိအကြမ်းဖက်အုပ်စု ပစ်မှတ်များကိုဒုံးကျည်ဖြင့် ပစ်ခတ် တိုက်ခိုက်ခဲ့ပြီးအနည်းဆုံး ကလေးနှစ်ဦးသေဆုံးခဲ့ရသည့်ဖြစ်ရပ် ပေါ်ပေါက်ပြီးနောက်ဖြစ်ပေါ်လာခြင်းဖြစ်သည်။

အီရန်နှင့် နျူးကလီးယားလက်နက်ပိုင်ရှင် ပါကစ္စတန်တို့သည် ယခင်ကတည်းက အကြမ်းဖက် အုပ်စုများကိုမိမိတို့နယ်မြေအတွင်း ခြေကုပ်ယူခွင့် ပြုထားသည့်အတွက်အပြန်အလှန်ပြစ်တင်မှုများ ရှိခဲ့သော်လည်း ယခုကဲသို့နိုင်ငံချင်း စစ်ရေးထိတွေ့မှုမှာ မရှိသလောက်ဖြစ်သည်။

ဒရုန်းများနှင့် ဒုံးကျည်များကို အသုံးပြု၍ ဘာလုချ် ခွဲထွက်ရေးလှုပ်ရှားမှုအဖွဲ့ပစ်မှတ်များကို တိုက်ခိုက်ခဲ့ကြောင်း ပါကစ္စတန်စစ်တပ်ကဆိုသည်။

ပါကစ္စတန်စစ်တပ်သည်အီရန်နှင့် ပါကစ္စတန်နယ်ခြားတစ်လျှောက် လှုပ်ရှားနေသော ခွဲထွက်ရေးလှုပ်ရှားမှုအကြမ်းဖက်အုပ်စုများကို ဆယ်စုနှစ်ချီ၍ တိုက်ခိုက်နေခဲ့သည်။

အီရန်နိုင်ငံကယခုကဲ့သို့ ၎င်းတို့နယ်မြေအတွင်း ပါကစ္စတန်က လာရောက်တိုက်ခိုက်မှုကိုပြစ်တင်ရှုတ်ချလိုက်ပြီး အီရန်ရှိ ပါကစ္စတန် သံအမတ်ကြီးကိုခေါ်ယူတွေ့ဆုံကာ ရှင်းလင်းချက်ပေးရန် တောင်းဆိုခဲ့သည်ဟုအီရန်နိုင်ငံခြားရေးဝန်ကြီးဌာန ပြောရေးဆိုခွင့်ရှိသူ နက်ဆာကာနာနီက ပြောသည်။

ပါကစ္စတန်ကအီရန်နိုင်ငံ၏ အချုပ်အခြာကို အပြည့်အ၀ လေးစားကြောင်း၊ ယခုတိုက်ခိုက်မှုမှာပါကစ္စတန်၏ ကိုယ်ပိုင်လုံခြုံရေးနှင့် အမျိုးသားအကျိုးစီးပွားအတွက်သာဖြစ်ကြောင်းပြောကြားခဲ့သည်။

အီရန်မီဒီယာများ၏ ဖော်ပြချက်အရ ပါကစ္စတန်တို့၏ တိုက်ခိုက်မှုသည်ဆာရာဗန်မြို့အနီးရှိကျေးရွာကို ထိမှန်ခဲ့သည်ဟု ဆိုသည်။

အီရန်နိုင်ငံခြားရေးဝန်ကြီးဟိုစိန် အေမာအဗ္ဗဒူလာဟီရန်က အီရန်၏ ဒုံးပျံပစ်ခတ်မှုမှာအီရန်နိုင်ငံအား အကြမ်းဖက်တိုက်ခိုက်နေသည့် ပါကစ္စတန်နိုင်ငံရှိဂျိုင်းရှ် အယ် အဒယ်( Jaishal-Adl )အဖွဲ့များကို လက်တုန့်ပြန်ခြင်းသာ ဖြစ်သည်ဟု အစောပိုင်းတွင် ပြောကြားခဲ့သည်။

၂၀၁၂ခုနှစ်တွင်စတင်ဖွဲ့စည်းခဲ့သော ဂျိုင်းရှ် အယ်လ် အဒယ် အဖွဲ့သည် မကြာမီနှစ်များအတွင်းက အီရန်နိုင်ငံအတွင်း အကြမ်းဖက် တိုက်ခိုက်မှုများပြုလုပ်ခဲ့ပြီး၎င်းတို့အား အီရန်အစိုး၇က အကြမ်းဖက်အုပ်စုအဖြစ်သတ်မှတ်ထားသည်။

ပါကစ္စတန်နိုင်ငံသည်မိမိ၏ နယ်ခြားဒေသအား အီရန်က ဒုံးပျံဖြင့် တိုက်ခိုက်မှုကိုရှုတ်ချခဲ့ပြီး အီရန်ရှိပါကစ္စတန်သံအမတ်ကြီးကို ပြန်လည်ခေါ်ယူခဲ့သည်။

NN-27

 Ref: dhakatribune