- Web Master
- ၀၅ စက်တင်ဘာ ၂၀၂၄
အီရတ်နိုင်ငံ၊ ဘဂ္ဂဒက်မြို့အရှေ့ပိုင်းရှိ လူစည်ကားသောနေရာတစ်ခုကို ဖေဖော်ဝါရီ-၇ ရက် (ဗုဒ္ဓဟူးနေ့) ညပိုင်းက အမေရိကန်က ဒရုန်းဖြင့် တိုက်ခိုက်ခဲ့ရာ မော်တော်ကားတစ်စီး ထိမှန်ပေါက်ကွဲပြီး လွန်ခဲ့သည့်အပတ်က ဂျော်ဒန်ရှိ အမေရိကန်စစ်သားများကို တိုက်ခိုက်ခဲ့ရာတွင် အဓိက ဦးဆောင်ပါဝင်ခဲ့သည့် ခါတစ် ဟစ်ဇ်ဘိုလာ စစ်သွေးကြွအုပ်စုမှ ထိပ်တန်းခေါင်းဆောင်တစ်ဦး သေဆုံးသွားသည်ဟု သိရှိရသည်။
ဘဂ္ဂဒက်အရှေ့ပိုင်း မက်ရှ်တယ်လ်အရပ်ရှိ လူစည်ကားသော လမ်းပေါ်တွင် သွားနေသည့် မော်တော်ကားကို အမေရိကန်ဒရုန်းက ပစ်မှတ်တိကျစွာဖြင့် ဖောက်ခွဲတိုက်ခိုက်ခဲ့ခြင်းဖြစ်သည်။
တိုက်ခိုက်မှုကြောင့် မော်တော်ကား ပေါက်ကွဲသွားပြီး ကားပေါ်တွင်လိုက်ပါလာသော စစ်သွေးကြွခေါင်းဆောင် သေဆုံးသွားသည်ဟု အမေရိကန်အရာရှိများက ပြောကြားသော်လည်း အီရတ်ရှိ အီရန်ကျောထောက်နောက်ခံ စစ်သွေးကြွအဖွဲ့က လူ သုံးဦး သေဆုံးကြောင်း၊ သေဆုံးသူများထဲတွင် ဆီးရီးယားရှိ ခါတစ် ဟစ်ဇဘိုလာ စစ်ဆင်ရေးခေါင်းဆောင်တပ်မှူး အဘူဘေကာ အယ်လ် ဆာဒီ ဟု လူသိများသည့် ဝစ်ဆမ် မိုဟာမက် ဆာဘီ အယ်လ် ဆာဒီ လည်း ပါဝင်သည်ဟု ပြောကြားခဲ့သည်။
လူစည်ကားရာနေရာရှိ မော်တော်ကားအား ပစ်မှတ်ထားတိုက်ခိုက်မှုတွင် အရပ်သားများ ထိခိုက်သေဆုံးမှုမရှိဘဲ ပေါက်ကွဲမှုဖြစ်ပွားပြီးနောက် အရေးပေါ်ကားများ ရောက်ရှိလာပြီး လူအများ ဝိုင်းအုံကြည့်ရှုနေသည်ကို တွေ့မြင်ရသည်ဟုဆိုသည်။
အစောင့်အကြပ်ထူထဲစွာ ချထားပြီး သံတမန်အိမ်ရာအများအပြားရှိသည့် ဘဂ္ဂဒက်မြို့၊ အစိမ်းရောင်နယ်မြေ( Green Zone )ကို အဆိုပါတိုက်ခိုက်မှုဖြစ်ပွားပြီးနောက် ပိတ်ထားလိုက်သည်ဟု သိရှိရသည်။ အမေရိကန် ကျူးကျော်တပ်ဖွဲ့များ၏ ဗုံးခွဲတိုက်ခိုက်မှုကြောင့် အဖွဲ့ခေါင်းဆောင် အဘူဘေကာ သေဆုံးသွားသည်ဟု ခါတစ် ဟစ်ဇဘိုလာအဖွဲ့က ကြေညာခဲ့သည်။
အမေရိကန် အလယ်ပိုင်းဒေသစစ်ဌာနချုပ်(central command) ၏ ထုတ်ပြန်ကြေညာချက်အရ တိုက်ခိုက်မှုတွင် အရပ်သားများ ထိခိုက်သေဆုံးမှု မရှိကြောင်း၊ မိမိတို့ တပ်ဖွဲ့ကို ခြိမ်းခြောက်လာသူမှန်သမျှကို အမေရိကန်က လက်တုန့်ပြန်ရန် နှေင့်နှေးနေမည်မဟုတ်ကြောင်း ဖော်ပြထားသည်။\
ယခု တိုက်ခိုက်မှုကြောင့် အမေရိကန် နှင့် အီရတ်အကြား ဆက်ဆံရေးတင်းမာမှု ပိုမိုမြင့်မားလာဖွယ် ရှိသည်ဟု သိရသည်။
လွန်ခဲ့သည့်ရက်များအတွင်းကပင် အမေရိကန်သည် အီရတ် နှင့် ဆီးရီးယားရှိ အီရန်တော်လှန်ရေး အစောင့်တပ်များနှင့် အီရန်ထောက်ခံအားပေးသော စစ်သွေးကြွများ၏ ပစ်မှတ်များကို တိုက်ခိုက်ခဲ့သည်။
အဆိုပါ စစ်သွေးကြွအုပ်စုများသည် ဂျော်ဒန်တွင် အမေရိကန်စစ်သား သုံးဦး သေဆုံးခဲ့ရသည့် တိုက်ခိုက်မှုကို ဦးဆောင်ခဲ့သည်ဟု အမေရိကန်က ဆိုသည်။ အီရတ်နိုင်ငံရှိ အစ္စလာမ်မစ် တော်လှန်ရေးအုပ်စုတစ်ခု ဖြစ်သည့် ခါတစ် ဟစ်ဇ်ဘိုလာအဖွဲ့သည် အီရတ် နှင့် ဆီးရီးယားရှိ အမေရိကန်စစ်စခန်းများကို အခါအားလျော်စွာ တိုက်ခိုက်လေ့ရှိပြီး ဂါဇာစစ်ပွဲတွင် အစ္စရေးဘက်မှ ထောက်ခံအားပေးနေသော အမေရိကန်ကို လက်တုန့်ပြန်ခြင်းဖြစ်သည်ဟု ၎င်းတို့ကဆိုသည်။ NN-27
ref:Reuters / cna