ယူကရိန်းစစ်ဦးစီးချုပ် ဗယ်လာရီ ဇာလုဇ်ညီကို သမ္မတဇီလင်းစကီး ထုတ်ပယ်

ယူကရိန်းသမ္မတ ဇီလင်းစကီးက ယူကရိန်းစစ်ပွဲကို ဦးဆောင်တိုက်ခိုက်နေသည့် စစ်ဦးစီးချုပ် ဗယ်လာရီ ဇာလုဇ်ညီ ကို ရာထူးမှ ထုတ်ပယ်လိုက်သည်ဟု သိရှိရသည်။

သမ္မတ ဇီလင်းစကီး နှင့် စစ်ဦးစီးချုပ် ဗယ်လာရီ ဇာလုဇ်ညီ တို့အကြား အချိန်ကာလအတန်ကြာ သဘောထားမတိုက်ဆိုင်မှုများ ဖြစ်ပေါ်နေသည်ဟု သတင်းများ ထွက်ပေါ်ခဲ့ပြီးနောက် ယခုကဲ့သို့ ရာထူးမှ ဖယ်ရှားခံလိုက်ရခြင်းဖြစ်သည်။

စစ်ဦးစီးချုပ် ဇာလုဇ်ညီ ​၏ နေရာတွင် စစ်ပွဲအတွေ့အကြုံရင့်ကျက်သူ ဗိုလ်ချုပ် အိုလက်ဆန်းဒါ ဆာဆကီးကို အစားထိုးခန့်အပ်လိုက်သည်ဟု သိရသည်။

ယခု ရာထူးအပြောင်းအလဲမှာ ၂၀၂၂ခုနှစ် ဖေဖော်ဝါရီလ ရုရှားက ယူကရိန်းအား အလုံးအရင်းဖြင့် ကျူးကျော်စစ်ဆင်နွှဲပြီးနောက်ပိုင်း ယူကရိန်းစစ်တပ်အတွင်း အကြီးမားဆုံး အပြောင်းအလဲတစ်ခု ဖြစ်သည်။

သမ္မတ ဇီလင်းစကီးက အဆင့်မြင့်အမိန့်ပေးစနစ်တွင် သွေးသစ်လောင်းရန် လိုအပ်နေပြီး ဇာလုဇ်ညီ အနေဖြင့် စစ်ဦးစီးအဖွဲ့တွင် အဖွဲ့ဝင်အဖြစ် ဆက်လက်ရှိနေမည်ဟု ပြောကြားခဲ့သည်။

ဗိုလ်ချုပ် ဇာလုဇ်ညီသည် ယူကရိန်းပြည်သူများနှင့် တပ်ဖွဲ့ဝင်များ​အကြား ယုံကြည်လေးစားခံရသူ ဖြစ်ပြီး အမျိုးသားသူရဲကောင်းတစ်ဦးအဖြစ် ထင်ရှားသူဖြစ်သည်။

သမ္မတ ဇီလင်းစကီးက မိမိ နှင့် ဗိုလ်ချုပ် ဇာလုဇ်ညီတို့အကြား စစ်တပ်တွင်း အပြောင်းအလဲပြုလုပ်ရန် လိုအပ်ပုံနှင့် ပွင့်လင်းသော တွေ့ဆုံဆွေးနွေးမှု ရှိခဲ့ပြီး ဗိုလ်ချုပ် ဇာလုဇ်ညီ​၏ ယူကရိန်းအား ရုရှားကျူးကျော်မှုမှ ခုခံကာကွယ်မှုအတွက် ကျေးဇူးတင်ကြောင်းကို ပြောကြားခဲ့သည်။

ယူကရိန်းစစ်ဦးစီးချုပ် ဗိုလ်ချုပ် ဆာဆကီးသည် အတွေ့အကြုံရင့်ကျက်သည့် စစ်ဗိုလ်ချုပ်တစ်ဦး ဖြစ်ပြီး ၂၀၂၂ခုနှစ် ရုရှားကျူးကျော်စစ် စတင်ချိန်တွင် မြို့တော် ကိယက်ဗ်ကို ဦးဆောင် ကာကွယ်ပေးခဲ့သူ ဖြစ်သည်။

ဗိုလ်ချုပ် ဆာဆကီးသည် ထိုနှစ် နွေရာသီက ခါကိယက်ဗ်မြို့အား လျှပ်တစ်ပြက် တန်ပြန်ထိုးစစ်ဆင်ရာတွင် ဦးဆောင်ခဲ့ပြီးနောက် ယူကရိန်းအရှေ့ပိုင်းစစ်ဆင်ရေးများ​၏ ဦးစီးချုပ်ဖြစ်လာခဲ့သည်။ NN- 27/ ref: Reuters