ထိုင်းရေတပ်သင်္ဘောနှစ်စီး မတော်တဆပစ်ခတ်မှုဖြစ်ရာမှ တစ်စီးမီးလောင်ပြီးရေတပ်သား ၁၃ ဦး ဒဏ်ရာရ

နွေနေ/နိရဉ္စရာ၊ မတ် ၁၆/၂၀၂၄

ထိုင်းရေတပ်သင်္ဘောနှစ်စီး ကြာသပတေးနေ့က အချင်းချင်း မတော်တဆ ပစ်ခတ်မှုဖြစ်ပွားခဲ့ရာ ပစ်ခတ်ခံရသော ရေတပ်သင်္ဘော မီးလောင်ကျွမ်းပြီး ရေတပ်သား ၁၃ ဦး ဒဏ်ရာရခဲ့သည်ဟု သိရသည်။

ဖရီးဂိတ်အမျိုးအစား ထိုင်းရေတပ်သင်္ဘော HTMS ချွန်ဘူရီ သည် အခြားရေတပ်သင်္ဘော HTMS ခီရီရတ်အား မတော်တဆ ပစ်ခတ်ခဲ့သဖြင့် သင်္ဘောမီးလောင်မှုဖြစ်ပွားခဲ့ပြီး ရေတပ်သား ၁၃ ဦး ဒဏ်ရာရရှိခဲ့သည်။

အဆိုပါ ရေတပ်သင်္ဘော နှစ်စီးစလုံးမှာ ချွန်ဘူရီပြည်နယ်၊ ဆတ်တာဟစ် ရေတပ်စခန်းရှိ လေသီယန် ဆိပ်ကမ်းတွင် ကျောက်ချရပ်နားနေသော သင်္ဘောများဖြစ်ကြသည်။

ကြာသပတေးနေ့ နံနက် ၁၁:၅၀ အချိန်တွင် ပစ်ခတ်မှုဖြစ်ပွားခဲ့ခြင်းဖြစ်ပြီး HTMS ချွန်ဘူရီ ရေတပ်သင်္ဘောတွင် တပ်ဆင်ထားသည့် အမြောက်က ရုတ်တရက် ကျည်ထွက်ပြီး ရှေ့တွင်ရပ်ထားသည့် ရေတပ်သင်္ဘော HTMS ခီရီရတ်ကို သွားရောက် ထိမှန်ခြင်းဖြစ်သည်။

ထိုင်းတော်ဝင်ရေတပ်​၏ ပြောကြားချက်အရ ရေတပ်သား ၁၃ ဦး ဒဏ်ရာရခဲ့ပြီး ၎င်းတို့အနက် ၁၀ ဦးမှာ ဒဏ်ရာပြင်းထန်သည်ဟု ဆိုသည်။

မီဒီယာများတွင် ဖော်ပြသော သတင်းများအရ တပ်ဖွဲ့ဝင်အများအပြား မီးခိုးငွေ့မွှန်ဝေဒနာ ခံစားရသည်ဟု ဆို​သည်။

HTMS ချွန်ဘူရီ ရေတပ်သင်္ဘောသည် ဗုဒ္ဓဟူးနေ့က ပင်လယ်ပြင် စမ်းသပ်ပစ်ခတ် လေ့ကျင့်မှု ပြုလုပ်ပြီး ဆိပ်ကမ်းသို့ ပြန်လည် ဝင်ရောက်လာခြင်းဖြစ်သည်။

ထိုသို့ စမ်းသပ်ပစ်ခတ်လေ့ကျင့်စဉ် အမြောက်တစ်လက်မှာ ကျည်မထွက်ဘဲ ဖြစ်ခဲ့သည်ဟု ဆိုသည်။ ​Ref: Bangkok Post